ភ្នំពេញ ៖ ក្នុងឱកាសទិវាសិទ្ធិនារីអន្តរជាតិ ៨ មីនា ដែលជាថ្ងៃឈប់សម្រាក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានឆ្លៀតទៅចូលរួមក្នុងពិធីសំណេះសំណាលនិងពិសាអាហារជាមួយកម្មករធាក់ស៊ីក្លូចំនួន៣២០នាក់ នៅមជ្ឈមណ្ឌលកោះពេជ្រ នាព្រឹកថ្ងៃទី៨មីនា។ នៅចំពោះមុខកម្មករធាក់ស៊ីក្លូ សម្តេចតេជោនាយករដ្ឋមន្ត្រី បានបង្ហាញពីការយកចិត្តទុកដាក់របស់ចំពោះបងប្អូនកម្មករធាក់ស៊ីក្លូ ដោយសម្តេចលើកឡើងថា កិច្ចការដែលត្រូវធ្វើបន្តសង្គមត្រូវមើលឲ្យឃើញដោយមិនទុកឲ្យអ្នកណាម្នាក់នៅឃ្លាតឆ្ងាយពីយើងនោះទេ។
សម្តេចតេជោបន្តថា នេះមិនមែនជាការធ្វើប្រជាភិថុតិនោះទេ តែជាការងារមនុស្សធម៌ដែលសម្តេចបានធ្វើវារយៈពេលជាង ៣០ឆ្នាំកន្លងមកហើយ។
សម្តេចតេជោនាយករដ្ឋមន្ត្រីបានមានប្រសាសន៍កោតសរសើរនិងរីករាយចំពោះស្មារតីដ៏សកម្មរបស់កម្មករធាក់ស៊ីក្លូទាំងអស់។ សម្តេចសង្ឃឹមថាអ្វីដែលត្រូវបន្តទៅទៀតនោះគឺសង្គមត្រូវមើលឲ្យឃើញដោយ មិនត្រូវទុកចោលអ្នកណាម្នាក់នៅឃ្លាតឆ្ងាយពីយើងនោះទេ។
សម្តេចតេជោក៏បានធ្វើរិះគន់ចំពោះមនុស្សមួយដែលបានចាត់ទុកសកម្មភាពរបស់សម្តេចថាជាការធ្វើប្រជាភិថុតិដោយសម្តេចបានមានប្រសាសន៍ថា «ពិតហើយមានអ្នកខ្លះថា ខ្ញុំធ្វើប្រជាភិថុតិតើគេបានឃើញខ្ញុំធ្វើប្រជាភិថុតិរបៀបណាទៅបើក្នុងមួយជីវិតរបស់ខ្ញុំចាប់ពីថ្ងៃរំដោះ ៧ មករា ១៩៧៩ បានធ្វើកិច្ចការមនុស្សធម៌រហូតមក ហើយមិនមែនធ្វើដោយឆក់កណ្តៀតនោះទេ តែគឺធ្វើជាទៀងទាត់ដោយបង្កើតជាមូលនិធិសម្រាប់ការធានារ៉ាប់រងក្នុងរយៈពេលវែង»។
សម្តេចតេជោនាយករដ្ឋមន្ត្រីក៏បានថ្លែងក្នុងភាពច្បាស់លាស់និងដោយសត្យានុម័តផងដែរថា មូលនិធិនេះក៏អាចបាត់បង់ទៅវិញផងដែរ ប្រសិនបើសម្តេចមិនត្រូវបានប្រជាពលរដ្ឋគាំទ្រនិងបោះឆ្នោតឲ្យធ្វើជានាយករដ្ឋមន្ត្រីនោះ។ ក៏ប៉ុន្តែបើសម្តេចនៅតែជានាយករដ្ឋមន្ត្រីគឺមូលនិធិនេះនៅតែត្រូវបន្តទៀតជារៀងរហូត។
ជាមួយការទទួលខុសត្រូវចំពោះសង្គម សម្តេចតេជោនាយករដ្ឋមន្ត្រីបានឲ្យដឹងថា សម្តេចបានទទួលរ៉ាប់រង់ ចំពោះមជ្ឈមណ្ឌលកុមារកំព្រា កុមារគថ្លង់ និង ទីកន្លែងជាច្រើនទៀតដ៏ធំក្នុងរយៈកាលរាប់សិបឆ្នាំរួចមកហើយ។ សម្តេចតេជោបានបន្តថា នៅថ្ងៃអាទិត្យនេះសម្តេចត្រូវទទួលរ៉ាប់រងមណ្ឌលពិសេសមួយ នោះគឺជាទីកន្លែងមួយដែលក្មេងស្រីបានទទួលរងនូវការរំលោភបំពានផ្លូវភេទពីឪពុកបង្កើត ពីជីតាបង្កើតរបស់ពួកគេនិងពីអ្នកដទៃទៀត។ ដូច្នេះសម្តេចអាចជួយកសាងអគារស្នាក់នៅសម្រាប់ពួកគេ និង ផ្គត់ផ្គង់ការរស់នៅរបស់ពួកគេ បើទោះបីជាអង្គការនៅក្រៅប្រទេសមិនផ្តល់ការទ្រទ្រង់ដល់មណ្ឌលនេះក៏ដោយ។ សម្តេចបន្តថា សម្តេចនិងភរិយានឹងចូលរួមធ្វើកិច្ចការងារមួយនេះដើម្បីកាត់បន្ថយការឈឺចាប់ និង បង្កើតនូវការបណ្តុះបណ្តាលសម្រាប់ចៅៗកូនៗទាំងឡាយដែលរងគ្រោះដោយសារ តណ្ហាបិសាច រឿងនេះជារឿងមួយដ៏អកុសលបំផុត។
សម្តេចតេជោនាយករដ្ឋមន្ត្រីសង្ឃឹមថា សង្គមជាតិរបស់យើងនឹងអនុវត្តនូវស្មារតីនៃការចែករំលែក ដើម្បីឲ្យប្រទេសរបស់យើងក្លាយទៅជាប្រទេសដែលមានវប្បធម៌ស្រឡាញ់រាប់អានដោយមិនមានអ្នកណាមើលងាយគ្នាក្នុងឋានៈជាមនុស្សដូចគ្នានោះទេ។ អ្នកមានអ្នកក្រមានតម្រូវការដូចគ្នា ដូច្នេះដោយសារ សេចក្តីស្រឡាញ់ដោយសារការយល់ និង ដោយខ្លួនធ្លាប់មានការលំបាក បានជាខ្ញុំត្រូវខិតខំជាមួយកិច្ចការទាំងឡាយម្ខាងគឺរាជរដ្ឋាភិបាលត្រូវអនុវត្តគោលនយោបាយគាំពារសង្គមជាក់លាក់ និង ម្ខាងទៀតខ្ញុំត្រូវតែធ្វើនៅក្នុងនាមជាសប្បុរសជនម្នាក់ដែលរួមជាមួយសប្បុរសជនដទៃទៀតដើម្បីបង្កើននូវស្ថានភាពដ៏ល្អប្រសើរ។
សម្តេចតេជោនាយករដ្ឋមន្ត្រីក៏បានថ្លែងទៅកាន់បងប្អូនជាកម្មករធាក់ស៊ីក្លូទាំងអស់ឲ្យជឿជាក់ទៅលើអ្វីដែលជាការប្ដេជ្ញាចិត្តរួមគ្នារបស់សម្តេច យ៉ាងហោចណាស់សម្តេចនឹងបន្តក្នុងរយៈពេល ១០ ឆ្នាំទៀតដើម្បីរួមរស់ជាមួយបងប្អូន។
លោក ឃួង ស្រេង អភិបាលរាជធានីភ្នំពេញនិងជាប្រធានក្រុមប្រឹក្សាភិបាលសមាគមមូលនិធិត្រីចក្រយានកម្ពុជាបានមានប្រសាសន៍ថា នៅពេលចាប់ផ្ដើមដំណើរការសមាគម មានសមាជិកសកម្មដែលជាអ្នកប្រកបរបរធាក់ស៊ីក្លូសរុបចំនួន៣២៣រូប ប៉ុន្តែនាពេលបច្ចុប្បន្នសមាគមនៅសល់សមាជិកសកម្មត្រឹមតែ ៣២០ រូបតែប៉ុណ្ណោះដោយមូលហេតុ សមាជិកចំនួន ០៣ រូប បានទទួលមរណភាពដោយជរាពាធ និងរោគាពាធក្រោយការប្រកាសដាក់ឲ្យដំណើរការជាផ្លូវការនូវមូលនិធិស៊ីក្លូរបស់ សម្ដេចតេជោនាយករដ្ឋមន្ត្រី សមាគមបានផ្ដល់ជូនសមាជិកសកម្មនូវអត្ថប្រយោជន៍ជាច្រើនស្របតាមលក្ខន្តិកៈនិងបទបញ្ជាផ្ទៃក្នុងរបស់សមាគមដែលបានតម្កល់ទុកនៅក្រសួងមហាផ្ទៃក្នុងនោះសមិទ្ធផលសំខាន់ៗគួរកត់សម្គាល់រួមមាន បានផ្ដល់ឯកសណ្ឋានជូនសមាជិកនីមួយៗចំនួន ០២ កំប្លេ បានធ្វើកាតសម្គាល់សមាជិក និងបានសហការជាមួយធនាគារវីង (Wing) ដើម្បីបោះពុម្ពកាតគណនីផ្ទាល់ខ្លួនសម្រាប់បើកផ្ដល់ថវិកាឧបត្ថម្ភប្រចាំថ្ងៃចំនួន ៧.០០០៛ (ប្រាំពីរពាន់រៀល)ក្នុងមួយថ្ងៃស្មើនឹង ២១០.០០០៛ (ម្ភៃមួយម៉ឺនរៀល) ក្នុងមួយខែដោយបានបញ្ចូលជាស្វ័យប្រវត្តិរៀងរាល់១០ថ្ងៃម្ដង ជាទៀងទាត់ ធ្វើឲ្យសមាជិកសមាគមមានភាពងាយស្រួលក្នុងការទទួលបានប្រាក់ឧបត្ថម្ភ។ បានបើកផ្ដល់ប្រាក់ឧបត្ថម្ភក្នុងឱកាសបុណ្យចូលឆ្នាំប្រពៃណីជាតិ ឆ្នាំ២០១៨ កន្លងទៅជូនសមាជិករបស់សមាគមក្នុងម្នាក់ៗចំនួន ៥០.០០០៛ (ប្រាំម៉ឺនរៀល)។បានបើកផ្ដល់ប្រាក់ឧបត្ថម្ភក្នុងឱកាសពិធីបុណ្យភ្ជុំបិណ្ឌ ឆ្នាំ២០១៨ កន្លងទៅ ជូនសមាជិករបស់សមាគម ក្នុងម្នាក់ៗចំនួន ៥០.០០០៛ (ប្រាំម៉ឺនរៀល)។បានបើកផ្ដល់ថវិកាឧបត្ថម្ភដល់ក្រុមគ្រួសារសមាជិក ដែលបានទទួលមរណភាពចំនួន ០៣ រូប ក្នុងនោះ គ្រួសារសពទទួលបានថវិកាចំនួន ១.០៥០.០០០៛ (មួយលានហាសិបពាន់រៀល)ស្របតាមគោលការណ៍កំណត់របស់សមាគម។ បានផ្ដល់ប័ណ្ណបេឡាជាតិរបបសន្តិសុខសង្គម (ប.ស.ស) ជូនសមាជិកសមាគមទាំងអស់ ដើម្បីទទួលបានការពិនិត្យ និងព្យាបាលជំងឺនៅតាមមន្ទីរពេទ្យរដ្ឋ និងមណ្ឌលសុខភាពនានាដោយឥតគិតថ្លៃ ។ បានរៀបចំក្រុមការងារចុះសាកសួរសុខទុក្ខ និងផ្ដល់ថវិកាឧបត្ថម្ភបន្ថែមដល់សមាជិកសមាគម ដែលរងរបួសក្នុងពេលបំពេញការងារ និងត្រូវសម្រាកព្យាបាលនៅតាមមន្ទីរពេទ្យ។ បានរៀបចំកែហ្វ្រាំងស៊ីក្លូដែលកន្លងមកបានកែច្នៃខុសទម្រង់ដើមពីការចាប់ខាងក្រោយមកចាប់ខាងមុខវិញដើម្បីអភិរក្សទម្រង់ដើមនៃស៊ីក្លូបានរៀបចំដំឡើងស្លាកលេខសម្គាល់ស៊ីក្លូជូនសមាជិកទាំងអស់។
ចំពោះប្រភពថវិការបស់សមាគម ក្នុងឆ្នាំ២០១៨ សមាគមបានទទួលថវិកាវិភាគទានដ៏ខ្ពង់ខ្ពស់បំផុតរបស់ សម្ដេចតេជោនាយករដ្ឋមន្ត្រី និង សម្ដេចកិត្តិព្រឹទ្ធបណ្ឌិតចំនួន ៥០០លានរៀល ជាការឧបត្ថម្ភដំបូងនិង២៤ម៉ឺនដុល្លារប្រចាំឆ្នាំ ព្រមទាំងមានការចូលរួមពីសំណាក់អស់លោក លោកស្រីឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី អ្នកតំណាងរាស្ត្រ អ្នកឧកញ៉ា លោកឧកញ៉ា និងរូបលោកផ្ទាល់ សរុបថវិកាទទួលបានមានចំនួន ៥៧០.០០០.០០០៛ (ប្រាំរយចិតសិបលានរៀល) និង ៤៩៦.០០០ដុល្លារ (បួនរយកៅសិបប្រាំមួយពាន់ដុល្លារអាមេរិក)។
លោកអភិបាលរាជធានីបានឲ្យដឹងទៀតថា សម្រាប់ឆ្នាំ២០១៩ នេះសម្ដេចតេជោនាយករដ្ឋមន្ត្រី និង សម្ដេចកិត្តិព្រឹទ្ធបណ្ឌិតបានបន្តផ្ដល់ថវិកាវិភាគទានប្រចាំឆ្នាំចំនួន ២៤ម៉ឺនដុល្លារក្នុង១ឆ្នាំនិងទទួលបានការចូលរួមពីសប្បុរសជន សរុបថវិកាទទួលបានបឋមមានចំនួន ៤០.០០០.០០០៛ (សែសិបលានរៀល) និង ៤៤០.០០០ដុល្លារ (បួនរយសែសិបពាន់ដុល្លារអាមេរិក)។
ជាមួយនឹងថវិកាដែលទទួលបានមកទល់ពេលនេះ សមាគមបានបើកផ្ដល់ប្រាក់ឧបត្ថម្ភជូនសមាជិកនិងចំណាយរដ្ឋបាលទូទៅសរុបអស់ថវិកាចំនួន ១.០៩៥.៩៥៩.២០០៛ (មួយពាន់កៅសិបប្រាំលាន ប្រាំបួនរយហាសិបប្រាំបួនពាន់ ពីររយរៀល)៕
Source: Kampuchea Thmey Daily
0 Comments