ក្លិប​វិសាខា ចុះ​កុងត្រា​រយៈពេល​៣​ឆ្នាំ​ចាប់​ដៃគូ​ជាមួយ​ក្រុម​ផលិតផល​បម្រើ​ដល់​សុខភាព​មួយ​

នៅ​ថ្ងៃទី​០៨ ខែមីនា​នេះ ក្លិប​កីឡាបាល់ទាត់​វិសាខា សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) បាន​ចុះ​កិច្ច​ព្រមព្រៀង​លើ​កិច្ចសហប្រតិបត្តិការ​រ​យៈ​ពេល ៣​ឆ្នាំ​ជាមួយ​ក្រុមហ៊ុន​ផលិតផល​បម្រើ​ដល់​សុខភាព STARBALM ។ ការចុះ​កិច្ចព្រមព្រៀង​នេះ បានធ្វើ​ឡើង​ក្នុង​សន្និសីទ​សារព័ត៌មាន នៅ​កីឡដ្ឋាន​វិសាខា ដោយមាន​ការចូលរួម​ពី​លោក ឈួ​រ ម៉េង​តុង អគ្គលេខាធិការ​ក្លិប​កីឡាបាល់ទាត់ វិសាខា និង​លោក Dick Van Tintelen ប្រធាន​ក្រុមហ៊ុន STARBALM រួមទាំង​កីឡាករ​របស់​ក្លិប​កីឡាបាល់ទាត់​វិសាខា​ផងដែរ ។​

​លោក ឈួ​រ ម៉េង​តុង តំណាង​លោកជំទាវ កែ សួន​សុ​ភី ប្រធាន​ក្លិប​កីឡាបាល់ទាត់​វិសាខា បាន​សម្ដែង​ការស្វាគមន៍ និង​រីករាយ​ជាខ្លាំង ចំពោះ​ក្រុមហ៊ុន STARBALM ដែល​បាន​សហការ​ឧបត្ថម្ភ​ដល់​ក្លិប ដើម្បី​រួមចំណែក​ជួយ​សម្រួល​ដល់​កីឡាករ ពេល​មាន​បញ្ហា​របួស និង​មាន​បញ្ហា​សាច់ដុំ​ជាដើម​។ តាមរយៈ​កិច្ចសហប្រតិបត្តិការ​នេះ លោក​សង្ឃឹមថា ក្លិប​កីឡាបាល់ទាត់ វិសាខា នឹង​កាន់តែ​រីកចម្រើន និង​ទទួលបាន​ជោគជ័យ​បន្ថែមទៀត ។​



​ចំណែក​លោក Dick Van Tintelen បាន​មានប្រសាសន៍ថា ការចាប់​ដៃគូ​ឧបត្ថម្ភ​ដល់​ក្លិប​កីឡាបាល់ទាត់​វិសាខា​ពេលនេះ ដោយសារ​ក្រុមហ៊ុន​ជឿជាក់​លើ​ក្លិប ដែល​បានសម្រេច​នូវ​សមិទ្ធផល​ល្អៗ​ជាច្រើន ក៏ដូចជា​ការកំណត់​គោលដៅ​ដ៏​ច្បាស់លាស់ នា​រដូវ​កាល​ថ្មី​។ ដូច្នេះ​លោក​ជឿជាក់ថា ការឧបត្ថម្ភ​នេះ ក៏​នឹង​ក្លាយជា​ផ្នែក​មួយ ដើម្បី​ជួយ​ឲ្យ​ក្លិប​កីឡាបាល់ទាត់​វិសាខា​សម្រេច​គោលដៅ ពិសេស​ការជួយ​សម្រួល​ដល់​កីឡាករ ដែល​ត្រូវ​ប្រើប្រាស់​កម្លាំង និង​សាច់ដុំ​ខ្លាំង ជាមួយនឹង​ផលិតផល​ស្ដង់ដារ​នេះ ។​

គួរ​បញ្ជាក់ថា STARBALM គឺជា​ផលិតផល​ដ៏​ល្បី​របស់​ហូ​ឡង់ ដែល​នាំចូល​ដោយ​ក្រុមហ៊ុន​ដូនពេញ​ម៉េ​ត​ហ្វា​ម ហើយក៏​ជា​ផលិតផល​។ តាមរយៈ​កិច្ចសហប្រតិបត្តិការ​ខាងលើ ក្រុមហ៊ុន STARBALM បាន​ផ្ដល់នូវ​ការឧបត្ថម្ភ​សម្ភារៈ និង​ថ្នាំ សម្រាប់​ប្រើប្រាស់​គ្រប់​ប្រភេទ ដល់​ក្លិប​កីឡាបាល់ទាត់​វិសាខា​។ ផលិតផល​នេះ​បាន​ចូល​ខ្លួន​ក្នុង​វិស័យ​កីឡា​របស់​កម្ពុជា ជាច្រើន​មកហើយ​ដែរ​ទាំង​ខាង​គុន​ដាវ​, តេខ្វាន់ដូ​ ម៉ារ៉ាតុន​ជា​ដើម៕

Source: Kampuchea Thmey Daily