ក្រចេះ ៖ ដោយមានកិច្ចសហប្រតិបត្តិការល្អ កម្ពុជាបានធ្វើម្ចាស់ផ្ទះ បើកសម្ពោធពិព័រណ៍ពាណិជ្ជកម្មតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ឆ្នាំ២០១៩កាលពីរសៀលថ្ងៃទី០៧ ខែមីនា ឆ្នាំ២០១៩ នៅក្នុងបរិវេណមន្ទីរវប្បធម៌ និងវិចិត្រសិល្បៈ ខេត្តក្រចេះ ដោយមានការចូលរួមពី លោក ឈួន ដារ៉ា រដ្ឋលេខាធិការ ក្រសួងពាណិជ្ជកម្ម រួមនិង ថ្នាក់ដឹកនាំខេត្តទាំងអស់របស់ប្រទេសឡាវ និងវៀតណាម ដែលស្ថិតក្នុងតំបន់ត្រីកោណ។
មានប្រសាសន៍ក្នុងពិធីបើកនោះ លោក ឈួន ដារ៉ា បានជម្រាបជូនភ្ញៀវជាតិ និងអន្តរជាតិទាំងអស់ថា ប្រមុខរដ្ឋាភិបាល នៃប្រទេសទាំង៣ កំពុងបានយកចិត្តទុកដាក់ និងជំរុញសកម្មភាពពាក់ព័ន្ធទាំងឡាយក្នុងវិស័យសេដ្ឋកិច្ច ដើម្បីអភិវឌ្ឍន៍តំបន់ត្រីកោណកម្ពុជា-វៀតណាម-ឡាវ ឲ្យមានការរីកចម្រើនក្នុងបំណងបម្រើផលប្រយោជន៍ប្រជាជន និងលើកកម្ពស់ជីវភាពប្រជាជនក្នុងតំបន់ត្រីកោណនេះឲ្យកាន់តែល្អប្រសើរ។
“គណៈកម្មាធិការសម្របសម្រួលចម្រុះតំបន់ត្រីកោណកម្ពុជា-ឡាវ-វៀតណាម បានធ្វើការប្រជុំជាច្រើនលើក ដែលក្នុងកិច្ចប្រជុំទាំងនោះមានគំនិតផ្តួចផ្តើម និងយុទ្ធសាស្ត្រជាច្រើនក្នុងការអភិវឌ្ឍតំបន់ត្រីកោណកម្ពុជា-ឡាវ-វៀតណាម ដែលក្នុងនោះប្រធានបទសំខាន់បំផុត គឺការលើកឡើងនូវសកម្មភាពជំរុញពាណិជ្ជកម្ម និងវិនិយោគ ហើយពិព័រណ៍ពាណិជ្ជកម្ម គឺជាចំណែកមួយនៃការទ្រទ្រង់ឲ្យសកម្មភាពទាំងនោះទទួលបានលទ្ធផលជាផ្លែផ្កា។ អាស្រ័យហេតុនេះហើយ ទើបរាល់កិច្ចប្រជុំគណៈកម្មាធិការសម្របសម្រួលចម្រុះតំបន់ត្រីកោណកម្ពុជា-ឡាវ-វៀតណាម តែងតែមានការភ្ជាប់នូវរាល់ព្រឹត្តិការណ៍ពិព័រណ៍ពាណិជ្ជកម្ម” លោកឈួន ដារ៉ា បានគូសបញ្ជាក់។
លោករដ្ឋលេខាធិការ បានចាត់ទុកពិព័រណ៍ពាណិជ្ជកម្មនេះ ជាវេទិកាពាណិជ្ជកម្មមួយដ៏មានសារៈសំខាន់ សម្រាប់ឲ្យបងប្អូនពាណិជ្ជករអាចសិក្សាស្វែងយល់ ពិភាក្សាគ្នា និងផ្លាស់ប្តូរគំនិត ទៅវិញទៅមកក្នុងប្រយោជន៍បង្កើតដៃគូពាណិជ្ជកម្មផង និងប្រយោជន៍ចែករំលែកបទពិសោធន៍ ឈានទៅបង្កើតផលិតផលថ្មីៗ ដែលមានគុណភាពខ្ពស់ តម្លៃអាចប្រកួតប្រជែងបាន ដើម្បីផ្គត់ផ្គង់ទីផ្សារក្នុងស្រុក និងទីផ្សារនាំចេញនាពេលអនាគត។ ក្នុងន័យនេះ លោកក៏បានជំរុញឲ្យអាជីវករពាណិជ្ជករទាំងអស់ប្រើប្រាស់ពេលវេលាដ៏មានតម្លៃនេះ ដើម្បីបង្កើតទំនាក់ទំនងរកស៊ីជាមួយគ្នាមានលក្ខណៈយូរអង្វែង។
សូមជម្រាបថា ពិព័រណ៍ពាណិជ្ជកម្មតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម រៀបចំឡើងរយៈពេល ០៤ថ្ងៃ ចាប់ពីថ្ងៃទី០៧-១០ ខែមីនា ឆ្នាំ២០១៩ ដោយមានការគាំទ្រ និងការចូលរួមយ៉ាងសកម្មពីបណ្ដាផលិតករ អាជីវករ អង្គការ សមាគមនានា ដែលបាននឹងកំពុងផលិតនូវផលិតផលខ្មែរ សម្រាប់ចែកចាយនៅទូទាំងព្រះរាជាណាចក្រកម្ពុជា និងពាណិជ្ជករមកពីប្រទេសឡាវ និងវៀតណាម ហើយមានស្ដង់សរុបចំនួន ២១៥ស្ដង់។ អមជាមួយព្រឹត្ដិការណ៍ពិព័រណ៍នេះ ក៏មានការរៀបចំការប្រគំតន្ត្រីផងដែរ នៅរាត្រីថ្ងៃទី០៨-០៩ ខែមីនា ឆ្នាំ២០១៩ ដើម្បីទាក់ទាញឲ្យមានអ្នកទស្សនាពិព័រណ៍ និងមហាជនទូទៅ មកចូលរួមគាំទ្រកាន់តែច្រើនឡើងៗ៕
Source: Kampuchea Thmey Daily
0 Comments