គ្រូបង្វឹក​ក្រុម​ជើងឯក​ឆ្នាំ​ចាស់​ណាហ្គា​វើ​ល នៅតែ​សម្លឹង​ឃើញ​ចំណុចខ្សោយ​របស់​កូនក្រុម​ក្រោយ​បញ្ចប់​សប្ដាហ៍​ដំបូង

ក្រុម​ជើងឯក​ឆ្នាំ​ចាស់​ណាហ្គា​វើ​ល បាន​អាច​រកបាន​៣​ពិន្ទុ ក្នុង​ប្រកួត​បើកឆាក​ដំបូង​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) កាលពី​ចុង​សប្ដាហ៍​មែន ប៉ុន្តែ​លោក មាស ចាន់ណា ដែលជា​គ្រូបង្វឹក​បាន​បង្ហាញ​គំនិត​ថា​លោក​មិន​ពេញចិត្ត នោះទេ​ចំពោះ​ការបញ្ចប់​ទី​នៅ​តំបន់​ប្រយុទ្ធ​របស់​កូនក្រុម​របស់លោក ហើយ​លោក​បន្ដ​ថា បើ​នៅតែ​រក្សា​ទម្រង់​លេង​បែបនេះ​រហូត​នោះ ប្រហែល​មិនអាច​ការពារ​តំណែង​ជើងឯក​បាន​ទៀតផង​។



​គ្រូបង្វឹក​កាន់​អាជ្ញា​ប័​ណ្ណ AFC A License រូបនេះ​បាន​លើកឡើង​ថា ​លោក​និយាយថា «​ទាក់ទង​តាំងពី​លេង​ជាមួយ Hanoi មក យើង​អនុវត្ត​ជាមួយ​ទម្រង់​ការពារ រហូតដល់​ប៉ះ Yangon បានធ្វើ​ឲ្យ​ការការពារ​ល្អប្រសើរ​។ ប៉ុន្ដែ​ពេល​ជួប​អាស៊ី​អឺរ៉ុប វា​កើតជា​បញ្ហា​នៅ​តំបន់​ប្រយុទ្ធ​វិញ​។ ដូច្នេះ​ពាក់ព័ន្ធ​នឹង​ក្ដី​រំពឹង​រក្សា​ជើងឯក ខ្ញុំ​មិនទាន់​និយាយ​បាន ព្រោះ​ខ្ញុំ​កំពុង​រង់​ចាំមើល​ប្រកួត​បន្ទាប់​ទៀត តែបើ​ពួកគាត់​នៅ​រក្សា​ការ​លេង​កម្រិត​ហ្នឹង យើង​អត់​អាច​រក្សា​ជើងឯក​បានទេ​»​។

​លោក មាស ចាន់ណា បានបន្ត​ថា ពេល​ប៉ះ​អាស៊ី​អឺរ៉ុប ថ្មីៗ​នេះ​មិនគួរ​ណា​ក្រុម​លោក​រកបាន​ត្រឹម ១​គ្រាប់​ឡើយ ព្រោះ​ក្រុម​ណាហ្គា​វើ​ល មានឱកាស​ច្រើន​ក្នុង​ការ​បញ្ចប់​ទី​តែ​ធ្វើ​មិនបាន​សម្រេច​។ លោក​ទទួលស្គាល់ថា ក្រុម​ខ្លួន​ពិត​ជាមាន​បញ្ហា និង​ខ្វះខាត​ច្រើន​ក្នុង​ការបញ្ចប់​ទី ហើយ​បើ​រក្សា​ការលេង​បែបនេះ វា​នឹងធ្វើ​ឲ្យ​ណាហ្គា​វើ​ល​ជួប​ការលំបាក ក្នុងការ​ប្រជែង​ជើងឯក នា​រដូវ​កាល​ថ្មី​។



ក្រុម​ណាហ្គា​វើ​ល មាន​អ​ម្រែ​ក​ដល់​ទៅ​៣​នៅ​ឆ្នាំ​២០១៩ នេះ​ពោល​គឺ​ត្រូវ​ប្រកួត​ក្នុង​ពានរង្វាន់​លី​គ​កំពូល​កម្ពុជា ពានរង្វាន់​សម្តេច​តេ​ជោ ហ៊ុន សែន និង​ត្រូវ​តំណាង​ឲ្យ​ក្រុម​កម្ពុជា​ប្រកួត​ក្នុង​ពានរង្វាន់​លី​គ​លំដាប់​ទី​២ ប្រចាំ​ទ្វីបអាស៊ី AFC Cup 2019​។ ប្រកួត​បន្ត​ណាហ្គា​វើ​ល ត្រូវ​ជួប​ក្រុម​ក្រសួងការពារជាតិ ក្នុង​សប្ដាហ៍​ទី​២ នៃ​លី​គ​កំពូល​កម្ពុជា នៅ​ថ្ងៃទី​៣០ ខែមីនា ឆ្នាំ​២០១៩ បន្ទាប់មក​ត្រូវ​ជួប​ក្រុម​សិង្ហ​បុរី Tampines Rovers ក្នុងជំនួប​វគ្គ​ជម្រុះ​ពានរង្វាន់ AFC Cup 2019 ប្រចាំ​ពូ​ល F នៅ​ថ្ងៃទី​០២ ខែមេសា លើ​ទីលាន​ពហុកីឡដ្ឋាន​ជាតិ​៕

Source: Kampuchea Thmey Daily