ភ្នំពេញ ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ កាលពីថ្ងៃទី៧ ខែមីនា ឆ្នាំ២០១៩ បានសម្រេចបង្កើតក្រុមការងារចំពោះកិច្ច ដើម្បីចុះត្រួតពិនិត្យ និងស្រាវជ្រាវករណីវិវាទដីធ្លី ស្ថិតក្នុងតំបន់ពយម៉ាចូវ និងតំបន់ព្រែកទឹកសាបក្បាលឆាយ ខេត្តព្រះសីហនុ ដែលជាតំបន់មានបញ្ហាវិវាទដីដ៏ក្តៅគគុក និងធ្វើឲ្យអភិបាលរងខេត្តចំនួន២រូប របូតតំណែងកាលពីថ្មីៗនេះ តាមចំណាត់ការអនុវត្តអភិក្រមទី៥របស់រាជរដ្ឋាភិបាល។
យោងតាមសេចក្ដីសម្រេចរបស់លោក ជា សុផារ៉ា ក្រុមការងារចំពោះកិច្ចនេះ មានលោក សៀក វណ្ណា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ជាប្រធាន និងមានលោក ឡោ ដាវុធ អគ្គនាយកនៃអគ្គនាយកដ្ឋានសុរិយោដី និងភូមិសាស្ត្រ ជាអនុប្រធាន លោក ប៉ែន ច័ន្ទសុងខេមរា ជាអនុប្រធានអចិន្ត្រៃយ៍ និងមានសមាជិកចំនួន៩រូបទៀត។
ក្រុមការងារនេះ មានភារកិច្ច ពិនិត្យស្ថានភាពវិវាទដីធ្លីពាក់ព័ន្ធនឹងសាលដីកាលេខ៣៤៨ ឈ ចុះថ្ងៃទី២១ ខែវិច្ឆិកា ឆ្នាំ២០១៧ របស់តុលាការកំពូល មានទីតាំងស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។ កំណត់អត្តសញ្ញាណកម្មដី និងអត្តសញ្ញាណកម្មប្រជាពលរដ្ឋពាក់ព័ន្ធនឹងដី ដែលរាជរដ្ឋាភិបាលបានកាត់ចេញពីតំបន់ប្រើប្រាស់ច្រើនយ៉ាង ព្រែកទឹកសាបក្បាលឆាយ ស្ថិតនៅភូមិ១ សង្កាត់២ ក្រុងព្រះសីហនុ ខេត្តព្រះសីហនុ។ សហការជាមួយអាជ្ញាធរដែនដី រដ្ឋបាលខេត្តព្រះសីហនុ និងស្ថាប័នពាក់ព័ន្ធ ពិនិត្យស្រាវជ្រាវករណីវិវាទដីធ្លីខាងលើធ្វើរបាយការណ៍អំពីលទ្ធផលការងារខាងលើ ដាក់ជូនក្រសួង ដើម្បីពិនិត្យសម្រេច ហើយក្រុមការងារនេះ អាចប្រើប្រាស់មន្ត្រីក្រោមឱវាទក្រសួងឲ្យជួយការងារតាមការចាំបាច់។
សូមបញ្ជាក់ថា ពាក់ព័ន្ធសំណុំរឿងខាងលើនេះ កាលពីថ្ងៃទី០១ ខែមីនា ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ចប់តំណែងអភិបាលរងខេត្តព្រះសីហនុចំនួន២រូប គឺលោក លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ដែលការសម្រេចបញ្ចប់តំណែងអភិបាលរងខេត្តព្រះសីហនុចំនួន២រូបខាងលើនេះ ក្រោយពីមន្ត្រីទាំងពីររូបនេះ បានដឹកនាំកម្លាំងចុះអនុវត្តសាលដីកា លើករណីដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ ដើម្បីយកដីឲ្យលោកឧកញ៉ា ស៊ីវ គង់ទ្រីវ ដោយយកកម្លាំងយោធាចូលរួម ហើយបង្កជាអំពើហិង្សារវាងកម្លាំងចំរុះ ជាមួយប្រជាពលរដ្ឋបណ្តាលឲ្យមានរបួសធ្ងន់ និងស្រាល។
ទាក់ទងបញ្ហានេះដែរ នៅក្នុងកិច្ចប្រជុំប្រចាំឆមាសរបស់ឧត្តមក្រុមប្រឹក្សាពិគ្រោះ និងផ្តល់យោបល់ កាលពីថ្ងៃទី២៨ ខែកុម្ភៈ ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន ចេញបញ្ជាឲ្យធ្វើការសិក្សា ដកមេយោធាខេត្តព្រះសីហនុ លោក សាវិន វិបុល និងអភិបាលរងខេត្ត២នាក់ទៀត ហើយសម្តេចតេជោ ក៏បានបញ្ជាយ៉ាងដាច់ណាត់ មិនអនុញ្ញាតឲ្យយកកងទ័ព ដែលមិនមែនជាមន្ត្រីអនុវត្តច្បាប់ ទៅអនុវត្តសាលដីកាឡើយ ហើយសម្តេចបានស្នើឲ្យសម្តេចពិជ័យសេនា ទៀ បាញ់ ពិនិត្យទៅលើករណីប្រធានយោធាខេត្តព្រះសីហនុ ប្រសិនជាមានការខុសឆ្គង និងវិន័យនោះ ស្នើឲ្យមានវិធានការទៅតាមផ្លូវច្បាប់។ ជាមួយនេះ សម្តេចក៏បានស្នើឲ្យមានការរឹបអូសយកដីទំនាស់នោះត្រឡប់មកវិញ ព្រោះវាជាដីរបស់រដ្ឋ ដើម្បីរក្សាទុកធ្វើជាដីសម្បទានសម្រាប់ផ្តល់ឲ្យប្រជាពលរដ្ឋដែលខ្វះខាតដី ហើយក៏មិនឲ្យអាជ្ញាធរលូកដៃចូលក្នុងការបែងចែកដីសម្បទានសង្គមកិច្ច ដោយដាក់ឈ្មោះ ទៅទទួលយកដីសម្បទានទាំងនោះឡើយ។
កាលពីថ្ងៃទី២៤ ខែមករា ឆ្នាំ២០១៩ មានមានអំពើហិង្សាមួយបានកើតឡើង ខណៈពេលអាជ្ញាធរ និងព្រះរាជអាជ្ញាបានចុះអនុវត្តសាលដីកាតុលាការកំពូល លើករណីដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ ដែលការអនុវត្តពេលនោះ ត្រូវបានមន្ត្រីអះអាងថា មានកម្លាំងយោធាចូលរួមយ៉ាងច្រើនផងដែរ ហើយសកម្មភាពបង្ក្រាបដោយហិង្សា របស់កងកម្លាំងចម្រុះខេត្តព្រះសីហនុ នាពេលនោះ គឺបានកើតឡើងបន្ទាប់ពីក្រុមប្រជាពលរដ្ឋ បានប្រមូលផ្តុំគ្នាតវ៉ាដុតកង់ឡាន គប់ដុំថ្ម និងគប់ដបសាំងទៅលើកម្លាំងសមត្ថកិច្ច ដែលឲ្យចុះទៅអនុវត្តសាលដីការបស់តុលាការកំពូល ក្រោមការបញ្ជាផ្ទាល់អភិបាលរងខេត្ត គឺលោក ផៃ ប៊ុនវណ្ណៈ និងក្រោមការសម្របសម្រួលពីលោកព្រះរាជអាជ្ញារងអមសាលដំបូងខេត្ត គឺលោក ហួត វិចត្រ៕
Source: Kampuchea Thmey Daily
0 Comments