សម្ដេចពិជ័យសេនាថា បង្គោល និងចំណុចព្រំដែនមួយចំនួនមិនប្រក្រតី តែកិច្ចសហប្រតិបត្តិការ ព្រំដែននៅតែពង្រឹង

បន្ទាយមានជ័យ ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានថ្លែងថា បង្គោល និងចំណុចព្រំដែនមួយចំនួនរវាងកម្ពុជា ថៃ ក៏ដូចជាមួយ វៀតណាម និងឡាវនៅតែមិនប្រក្រតី ប៉ុន្តែឃើញយ៉ាងនេះយើងមិនមែនបង្កើតជម្លោះ ឬបង្កភាពតានតឹង ឬអរិភាពគ្នាតាមព្រំដែនទេ គឺមានតែពង្រឹង ពង្រីកកិច្ចសហប្រតិបត្តិការ មិត្តភាពនិងអភិវឌ្ឍន៍ព្រំដែន ហើយក៏បន្តចរចា ដោះស្រាយគ្នា ដើម្បីឈានទៅចុះសម្រុងគ្នា ព្រមព្រៀងគ្នា។

សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានថ្លែងដូច្នេះនៅចំណុចបង្គោលព្រំដែនលេខ៣៦ ច្រកព្រំដែនតំបន់បឹងត្រកួនភូមិបន្ទាយមានរឹទ្ធិ ឃុំគោករមៀត ស្រុកថ្មពួក ខេត្តបន្ទាយមានជ័យ ខណៈសម្តេច និងខណៈប្រតិភូបន្តទស្សនកិច្ចសួរសុខទុក្ខ លើកទឹកចិត្តកងកម្លាំងការពារព្រំដែន ក៏ដូចជាពិនិត្យទិដ្ឋភាព ស្ថានភាពទូទៅបណ្ដោយព្រំដែនគោកកម្ពុជា-វៀតណាម , កម្ពុជា-ឡាវ និងកម្ពុជា-ថៃ កាលពីល្ងាចថ្ងៃទី៨ ខែមីនា ឆ្នាំ២០១៩។

សម្ដេចពិជ័យសេនា បានប្រាប់អ្នកយកព័ត៌មានឲ្យដឹងថា ក្នុងដំណើរបេសកកម្មតាមព្រំដែន ដ៏វែងឆ្ងាយរាប់ពាន់គីឡូម៉ែត្រ តាំងពីបង្គោលព្រំដែនទីសូន្យ ដល់ទី៣១៩ មានបង្គោលព្រំដែន ក៏ដូចចំណុចព្រំដែនមួយចំនួនមិនប្រក្រតី មិនទាន់ចុះសម្រុងគ្នានៅឡើយ ក្នុងនោះ ព្រំដែនជាមួយវៀតណាម និងឡាវ បង្គោលព្រំដែន និងចំណុចព្រំដែនមួយចំនួន ក៏មិនប្រក្រតី ប៉ុន្តែអំពីដំណើរការចរចានិងការបោះបង្គោលព្រំដែនមានភាពសកម្ម ជឿនលឿនទៅមុខច្រើន ឯព្រំដែនជាមួយថៃវិញ ប្រវែង៨០៣គីឡូម៉ែត្រ មានបង្គោលសរុបតែ៧៣បង្គោល ចំណុចច្រកជាំ ស្រុកអន្លង់វែង ខេត្តឧត្តរមានជ័យដល់ច្រកចាំយាមខេត្តកោះកុង ឃើញថា បង្គោលព្រំដែន និងចំណុចព្រំដែនមួយចំនួនមិនប្រក្រតីទេ ។

សម្ដេចពិជ័យសេនាថា កុំថាខ្ញុំជាអ្នកវាយតម្លៃអី ខ្ញុំមិនអារកាត់ វែកញែកអីជំនួសគណៈកម្មាធិការកិច្ចព្រំដែន ខ្ញុំអត់ទេ ខ្ញុំគ្រាន់តែកត់សម្គាល់ឃើញជាក់ច្បាស់ ហើយចំណុចព្រំដែនខ្លះមិនប្រក្រតី ហើយបង្គោលខ្លះទ្រេត បង្គោលខ្លះអត់គ្រឹះ ហើយវាប្រហែលជាធ្វើដំណើរខ្លះរំកិល ហើយខ្លះវាដាំបញ្ច្រាស ត្រឡប់ក្បាលកន្ទុយ អក្សរ ឬបង្គោលផ្សេង។ ឧទាហរណ៍កន្លែងដែលសម្តេចពិជ័យ និងប្រតិភូទស្សនកិច្ច ដូចបង្គោលលេខ១ នៅច្រកព្រំដែនជាំ ឃើញថា មិនប្រក្រតី បង្គោលលេខ ខ២២ នៅប្រាសាទតាមាន់ មានប្រក្រតីគួរសម បង្គោលលេខ៣៦ បឹងត្រកួននេះ ដាំបញ្ច្រាស មិនប្រក្រតីទេ វាធ្វើដំណើរត្រូវគេរំកិលហើយ។ ទោះយ៉ាងណា សម្តេចពិជ័យ ចៀសវាងនិយាយថា តើបញ្ហាមិនប្រក្រតី នៃចំណុចព្រំដែន បង្គោលព្រំដែនទាំងនោះបង្កឡើងដោយភាគីណា វៀតណាម ឡាវ ក៏ទេដែរ ហើយកើតឡើងពីកាលណា ជំនាន់ណានោះដែរ។ ហើយប្រមុខកំពូលក្រសួងការពារជាតិរូបនេះបានបញ្ជាក់ថា ព្រំដែនរឹងមាំវាស្ថិតលើកម្លាំងការពារ លើច្បាប់។ ហេតុនេះ ដំណើរការចរចា ដោះស្រាយបញ្ហាព្រំដែន បោះបង្គោលព្រំដែនទាំងគណៈកម្មាធិការកិច្ចការព្រំដែនកម្ពុជា និងស្ថាប័នពាក់ព័ន្ធបាននិងកំពុងបន្តធ្វើយ៉ាងសកម្ម ដើម្បីកុំឲ្យបញ្ហាដ៏រសើបខាងប្រវត្តិសាស្ត្រ និងនយោបាយដែលលង់ពីអតីតកាល បច្ចុប្បន្ននេះ បន្តមានទៅអនាគត។

ក្នុងនោះ សម្ដេចពិជ័យសេនា ដែលក៏ជាសហប្រធានគណៈកម្មាធិការព្រំដែនទូទៅកម្ពុជា-ថៃ ផងនោះ បញ្ជាក់ជាសារនយោបាយ និងបច្ចេកទេសថា បញ្ហាបូរណភាព និងព្រំដែនទាំងចំណុចព្រំដែន ទាំងបង្គោលព្រំដែនរវាងប្រទេសជិតខាងជាមួយកម្ពុជា ថ្វីត្បិតតែនៅមានបញ្ហាមិនប្រក្រតីមួយចំនួន តែយើងមិនអាចលើកទឹកចិត្តឲ្យមានការបង្កអរីភាព មានជម្លោះព្រំដែនមានភាពតានតឹងនៅព្រំដែនជាថ្មីទេ គឺយើងបន្តចរចា វែកញែកដោះស្រាយគ្រប់យន្តការសំខាន់ចំពោះមុខ និងទៅខាងមុខ ត្រូវពង្រឹងពង្រីកទំនាក់ទំនងកិច្ចសហប្រតិបត្តិការ មិត្តភាព អភិវឌ្ឍន៍ បង្កើនជីវភាព សេដ្ឋកិច្ចតាមបណ្តោយ និងឆ្លងកាត់ព្រំដែនដែលប្រក្រតី។ ឯកន្លែងមិនប្រក្រតីទុកសិន ហើយបន្តដោះស្រាយតាមក្រោយ។

ក្នុងនោះ សម្ដេចពិជ័យសេនា ទៀ បាញ់ ក៏ឆ្លៀតវាយបក ទៅក្រុមគណបក្សប្រឆាំងដែលតែងរិះគន់ វាយប្រហាររាជរដ្ឋាភិបាលថា បណ្ដោយឲ្យវៀតណាម និងប្រទេសជិតខាងបានទន្ទ្រាន រំលោភបំពានចូលព្រំដែនទឹក ព្រំដែនគោករបស់កម្ពុជារាល់ថ្ងៃ។ ដោយថា បើគេរំលោភដូចមែន ម្ល៉េះសមពីនោះ មកដល់សព្វថ្ងៃ ទឹកដីកម្ពុជា យើងវាបាត់អស់ទៅហើយចឹង កុំអ្នកឯងចេះតែស្រែក ដោយគ្មានមូលដ្ឋាននោះ។

លោកឧត្ដមសេនីយ៍ ពេជ្រ វណ្ណា នាយករងទីចាត់ការកិច្ចការព្រំដែនអគ្គបញ្ជាការដ្ឋានកង ខ ភ ម និងជាប្រធានការិយាល័យទំនាក់ទំនងព្រំដែនកម្ពុជា-ថៃ ប្រាប់ថា បណ្ដោយព្រំដែនកម្ពុជា ថៃ ប្រវែង៨០៣គីឡូម៉ែត្រ ដែលមានបង្គោលព្រំដែនតែចំនួន៧៣បង្គោល ពីចំណុចច្រកព្រំដែនអន្តរជាតិជាំស្រុកអន្លង់វែង ខេត្តឧត្តរមានជ័យ ដល់ច្រកព្រំដែនអន្តរជាតិចាំយាមស្រុកមណ្ឌលសីមា ខេត្តកោះកុងនោះ រួមទាំងបណ្ដោយព្រំដែនពីច្រកជាំទៅមុំបី ខេត្តព្រះវិហារ ដែលគ្មានបង្គោលព្រំដែនពឹងលើខ្សែចែកទឹក នៃជួរភ្នំ ក្នុងផែនទីដងរែក នៃបារាំងជាដើម៕