ស្វាយរៀង ៖ យ៉ាងហោចណាស់ ស្ត្រីម្នាក់និងកូនខ្ចី២នាក់ បានស្លាប់ក្រោមរថយន្ត និងប្តីរងរបួសធ្ងន់សង្ឃឹមតិចតួចខ្លាំងណាស់ក្នុងករណីគ្រោះថ្នាក់ចរាចរណ៍មួយ ដោយសាររថយន្តយីឌុប រេចង្កូតបុកចូលផ្ទះក្រឡាប់សង្កត់៤នាក់ប្តីប្រពន្ធកូនគួរអោយរន្ធត់។
ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោងប្រហែល៣ទៀបភ្លឺ ថ្ងៃទី១០ ខែមីនា ឆ្នាំ២០១៩ នៅជាប់ផ្លូវជាតិលេខ១ត្រង់ចំណុចភូមិត្របែកប្រហោង ឃុំតាសួស ស្រុកស្វាយជ្រំ ខេត្តស្វាយរៀង។
យោងតាមសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះគឺមកពីតៃកុងរថយន្តងងុយដេក ទើបរេចង្កូតបុកផ្ទះពលរដ្ឋ និងក្រឡាប់សង្កត់ពីលើម្ចាស់ផ្ទះទាំង៤នាក់តែម្តង ដែលក្នុងហេតុការណ៍នេះប្តីនៅមានដង្ហើម ប៉ុន្តែសង្ឃឹមតិចតួចខ្លាំងណាស់។ ចំណែកប្រពន្ធកូនគឺបានស្លាប់ទាំង៣នាក់ក្រោមរថយន្ត។
ជនរងគ្រោះដែលជាម្ចាស់ផ្ទះមានឈ្មោះ នាង សុផាន់តារ៉ា ភេទប្រុស អាយុ៤០ឆ្នាំ មុខរបរជួសជុល មានប្រពន្ធឈ្មោះ សាក់ វណ្ណា អាយុ២៨ឆ្នាំ ទើបតែសម្រាលកូនបាន២ខែប៉ុណ្ណោះ ចំណែកកូនទាំង២នាក់នោះទី១.ឈ្មោះ ស្តើង ភារ៉ុន ភេទប្រុស អាយុ២ឆ្នាំ ទី២.ឈ្មោះ ស្តើង ផារិន ភេទប្រុស អាយុ២ខែ។
សមត្ថកិច្ចបានបន្តទៀតថា ក្រោយពីបង្កគ្រោះថ្នាក់និងបណ្តាលឲ្យមនុស្សស្លាប់ដ៏គួរឲ្យរន្ធត់នេះមក អ្នកបើករថយន្ត បានរត់គេចខ្លួនបាត់ស្រមោល ហើយសមត្ថកិច្ចកំពុងស្ទូចរថយន្តយកមករក្សានៅអធិការស្រុកស្វាយជ្រំរង់ចាំម្ចាស់ចូលខ្លួនមកដោះស្រាយ៕
Source: Kampuchea Thmey Daily
0 Comments