បាត់ដំបង ៖ ករណីគាស់ទម្លុះទម្លាយបានកើតឡើងជាញឹកញាប់ នៅក្នុងភូមិសាស្ត្រស្រុកថ្មគោល ប៉ុន្តែអ្វីៗ ត្រូវបានកម្លាំងសមត្ថកិច្ចមូលដ្ឋាន ព្យាយាមបិទបាំងដើម្បីកុំឲ្យរឿងអាស្រូវនេះខ្ចរខ្ចាយទៅខាងក្រៅ និងចង់បង្ហាញថា នៅក្នុងមូលដ្ឋានគ្មានសកម្មភាពចោរកម្ម។
គួរបញ្ជាក់ថា កន្លងមកនៅក្នុងស្រុកថ្មគោល គឺមានករណីចោរកម្មបានកើតឡើងជាញឹកញាប់ លើសពីស្រុកនានា ក្នុងខេត្តបាត់ដំបង ហើយរឿងដែលកើតឡើងគឺសមត្ថកិច្ចមូលដ្ឋានបានព្យាយាមបិទបាំង រហូតមានរឿងខ្លះគេមិនរាយការណ៍ថែមទៀត ព្រោះខ្លាចខូចឈ្មោះលោកអធិការ ដែលសំណុំរឿងចោរកម្មនេះ កាន់តែមានកំណើនដោយសារតែគេមិនអាចបំបែកបាន។
ជាក់ស្តែង កាលពីថ្ងៃទី៦ ខែមីនា ឆ្នាំ២០១៩ វេលាម៉ោង១១និង១៥នាទី ថ្ងៃត្រង់ នៅចំណុចវត្តនិគមារាម ហៅវត្តនិគមក្រៅ ស្ថិតក្នុងភូមិនិគមក្រៅ ឃុំជ្រោយស្តៅ ស្រុកថ្មគោល ខេត្តបាត់ដំបង ក៏មានករណីលួចមានស្ថានទម្ងន់ ឬ ករណីគាស់ទម្លុះទម្លាយ ទៅលើកុដិព្រះសង្ឃ ដោយបានប្រមូលគ្មានសល់។
រឿងនេះ ត្រូវបានសមត្ថកិច្ចព្យាយាមបិទបាំង ដោយអាងលេសថា កំពុងស្រាវជ្រាវ ប៉ុន្តែមកទល់នឹងពេលនេះនៅតែស្ងៀមស្ងាត់ដដែល។ ដោយនៅពេលកើតហេតុគេឃើញជនមិនស្គាល់មុខបានធ្វើសកម្មភាពគាស់សោទ្វារកុដិរបស់ព្រះសង្ឃ ព្រះនាម ឆោម មាឃ ព្រះជន្ម៤១ព្រះវស្សា។
ក្នុងករណីនេះដែរ ជនសង្ស័យបានប្រមូលយកនូវទ្រព្យសម្បត្តិ និងលុយកាក់ជាច្រើនដូចជា ប្រាក់រៀលចំនួន ៤០០.០០០រៀល ប្រាក់ដុល្លារ ចំនួន៩០០ដុល្លារ ប្រាក់បាត ចំនួន ៧.០០០បាត ឡេបថប ពណ៌ទឹកប្រាក់១គ្រឿង និង អាយផេត ពណ៌ទឹកប្រាក់១គ្រឿង ហើយគេចខ្លួនដោយសុវត្ថិភាព។
រហូតមកទល់នឹងពេលនេះ សមត្ថកិច្ចមូលដ្ឋានដែលមាន លោក ផង់ សុភាព ជាអធិការ នៅតែប្រើភាសាថា កំពុងស្រាវជ្រាវ នៅឡើយ ដែលបញ្ហានេះស្ទើរតែធ្វើឲ្យពលរដ្ឋនៅក្នុងមូលដ្ឋានអស់ជំនឿ និងគ្មានភាពកក់ក្តៅក្នុងអារម្មណ៍៕
Source: Kampuchea Thmey Daily
0 Comments