លោករស់ ផារឹទ្ធ ផ្ដាំផ្ញើដល់សិស្សានុសិស្ស ត្រូវយកចិត្តទុកដាក់រៀនសូត្រ ឲ្យក្លាយជា កូនល្អ សិស្សល្អ មិត្តល្អ ដើម្បីជាសសរទ្រូងប្រទេសជាតិ

ស្វាយរៀង ៖ នៅព្រឹកថ្ងៃទី២២ ខែមីនា ឆ្នាំ២០១៩នេះ លោក រស់ ផារិទ្ធ អភិបាលរងខេត្តស្វាយរៀងបានថ្លែងទៅកាន់សិស្សានុសិស្សប្រមាណ៣០០នាក់ នៅសាលាបឋមសិក្សាឡឹក សំបុណ្យ ឃុំកំពង់ចក ស្រុករំដួល ខេត្តស្វាយរៀង ថា ស្របពេលដែលមានសាលារៀនល្អ សូមសិស្សានុសិស្សត្រូវយកចិត្តទុកដាក់រៀនសូត្រ ក្រេបយកចំណេះវិជ្ជា ដើម្បីក្លាយជាកូនល្អ សិស្សល្អ មិត្តល្អ និងក្លាយជាទំពាំងស្នងឫស្សី នៃប្រទេសជាតិប្រកបដោយចំណេះ ជំនាញពិតប្រាកដ។

ការថ្លែងរបស់លោកអភិបាលរងខេត្តស្វាយរៀងបែបនេះ ខណៈដែលលោកតំណាង លោក ម៉ែន វិបុល អភិបាលខេត្តក្នុងពិធីសម្ពោធអគារសិក្សា និងសំណង់គាំទ្រ ក្នុងសាលាបឋមសិក្សា ឡឹក សំបុណ្យ វត្តលាក់រាជាដែលចំណាយថវិកាសាងសង់ និងទិញសម្ភារៈការិយាល័យសម្រាប់ទីចាត់ការអស់ប្រមាណជាង៧ម៉ឺនដុល្លារ។ ពិធីនេះមានចូលរួមពី លោក ម៉ៅ សោភ័ណ ប្រធាននាយកដ្ឋានលទ្ធកម្មក្រសួងសេដ្ឋកិច្ច និងហិរញ្ញវត្ថុ ព្រមទាំងអស់លោក លោកស្រីជាសប្បុរសជនជិតឆ្ងាយជាច្រើនរូបផងដែរ។

លោក រស់ ផារិទ្ធ បានបន្តទៀតថា លោកគ្រូអ្នកគ្រូ គួរគប្បីយកចិត្តទុកដាក់ខិតខំធ្វើការសិក្សាស្រាវជ្រាវស្វែងយល់ នូវចំណេះដឹងថ្មីៗថែមទៀត និងអនុវត្តតាមនិយាមគរុកោសល្យ ឲ្យបានត្រឹមត្រូវ ដើម្បីលើកកម្ពស់គុណភាពអប់រំផ្តល់ចំណេះដឹងដល់សិស្សានុសិស្សទទួលបានការអប់រំប្រកបដោយគុណភាពខ្ពស់ ហើយក្រសួងអប់រំបានធ្វើការកំណែទម្រង់ការប្រលងសញ្ញាប័ត្រមធ្យមសិក្សាទុតិយភូមិ និងមានការគាំទ្រពីគ្រប់មជ្ឈដ្ឋានដោយអនុវត្តតាមគោលការណ៍"អ្នកចេះគឺជាប់"។

លោក រស់ ផារិទ្ធ បានជំរុញដល់សិស្សានុសិស្ស និងបងប្អូនប្រជាពលរដ្ឋទាំងអស់ ត្រូវនៅឲ្យឆ្ងាយពីគ្រឿងញៀន មិនត្រូវពាក់ព័ន្ធនឹងបទល្មើសគ្រឿងញៀន មិនត្រូវប្រើប្រាស់គ្រឿងញៀនជាដាច់ខាត ព្រោះគ្រឿងញៀន នាំឲ្យអន្តរាយដល់សុខភាព និងអាយុជីវិត ប៉ះពាល់សតិបញ្ញាស្មារតី និងបំផ្លាញអនាគតខ្លួនឯង និងប៉ះពាល់ដល់សង្គមជាតិទៀតផង។

លោកអភិបាលរងខេត្ត ក៏បានណែនាំដល់សិស្សានុសិស្ស និងប្រជាពលរដ្ឋ ត្រូវចូលរួមគោរពច្បាប់ចរាចរណ៍ទាំងអស់គ្នា ដើម្បីការពារអាយុជីវិតផ្ទាល់ខ្លួន និងអ្នកដទៃព្រមទាំងការពារសណ្ដាប់ធ្នាប់ ទ្រព្យសម្បត្តិ និងផលប្រយោជន៍សាធារណៈ។

ជាមួយគ្នានេះ លោក រស់ ផារិទ្ធ បានផ្ដាំផ្ញើដល់អាជ្ញាធរ ដែនដី ស្រុក ឃុំនិងការិយាល័យជំនាញពាក់ព័ន្ធ រួមទាំងបងប្អូនប្រជាពលរដ្ឋត្រូវចូលរួមអនុវត្តតាមសារាចរណែនាំរបស់រាជរដ្ឋាភិបាល ស្តីពីការចាត់វិធានការថែរក្សាទឹកទុក ព្រោះនៅរដូវប្រាំងនេះ ប្រទេសកម្ពុជាយើងទទួលរងដោយប្រយោលពីឥទ្ធិពលបាតុភូត អ៊ែលនីណូ បង្កអោយធាតុអាកាសក្តៅ ហួតហែង សីតុណ្ហភាពអាចឡើងដល់៤០ទៅ៤២អង្សាសេ មានភ្លៀងកក់ខែតិច មានបាតុភូត ផ្គររន្ទះ និងខ្យល់កន្ត្រាក់កើតឡើង ដូច្នេះសូមបងប្អូនប្រជាពលរដ្ឋ មានការប្រុងប្រយ័ត្នខ្ពស់បញ្ចៀសការគ្រោះថ្នាក់កើតឡើងជាយថាហេតុ។

លោក រស់ ផារិទ្ធ ជំរុញឲ្យអាជ្ញាធរដែនដី កងកម្លាំងប្រដាប់អាវុធបន្តការពារសន្តិសុខសណ្ដាប់ធ្នាប់សង្គមឲ្យបានល្អប្រសើរ ជាពិសេសត្រូវអនុវត្តគោលនយោបាយរបស់រាជរដ្ឋាភិបាល ស្តីពីភូមិ/ឃុំ មានសុវត្ថិភាពទាំង៩ចំណុច ឲ្យទទួលបានជោគជ័យបន្តបន្ទាប់ទៀត ពោលមិនត្រូវឲ្យមានបងតូចបងធំ ចោរលួចចោរប្លន់ គ្រឿងញៀន និងការជួញដូរមនុស្សខុសច្បាប់ នៅមូលដ្ឋានជាដាច់ខាត។

នៅក្នុងពិធីនេះ ក៏មានការចែកជូននូវអំណោយដល់ លោកគ្រូ អ្នកគ្រូ សិស្សានុសិស្ស យាយជីតាជី ប្រជាពលរដ្ឋ កងកម្លាំងទាំងបីប្រភេទ និងប្រគល់ជូនថវិកាដល់សាលារៀនបឋមសិក្សាឡឹកសំបុណ្យ ចំនួន៨លានរៀនផងដែរ៕