កណ្ដាល ៖ មនុស្សម្នាក់ បានស្លាប់បាត់បង់ជីវិតនៅនឹងកន្លែងកើតហេតុ ក្នុងករណីគ្រោះថ្នាក់ចរាចរណ៍រវាង រថយន្ត និងម៉ូតូ។
ករណីនេះ កើតឡើងនៅវេលាម៉ោង៨យប់ ថ្ងៃទី០៨ ខែមីនា ឆ្នាំ២០១៩ លើផ្លូវជាតិលេខ១ ក្នុងចន្លោះគីឡូម៉ែត្រលេខ២៤-២៥ ចំណុចភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល។
ប្រភពកន្លែងកើតហេតុបានឲ្យដឹងថា មុនពេលកើតហេតុ មានរថយន្ត០១គ្រឿង ម៉ាកSSANG YONG ISTANA ពណ៌ស ប្រភេទដឹកអ្នកដំណើរ ពាក់ស្លាកលេខ ភ្នំពេញ2R.6436 បើកបរដោយជនមិនស្គាល់អត្តសញ្ញាណ ទិសដៅពីលិចទៅកើត(ពីភ្នំពេញទៅអ្នកលឿង)។ លុះពេលបើកមកដល់ចំណុចកើតហេតុខាងលើ បានបុកជាមួយម៉ូតូ០១គ្រឿងម៉ាកសង់កូរ៉េ ពណ៌ក្រហម ប្រភេទស្រី ពាក់ស្លាកលេខ ភ្នំពេញ.1A.7756 បើកបរដោយ ឈ្មោះ ស៊ូ សារ៉ន ភេទប្រុស អាយុ៥៨ឆ្នាំ មានទីលំនៅ ភូមិកណ្ដាលលើ ឃុំបន្ទាយដែក ស្រុកកៀនស្វាយ ខេត្តកណ្តាល ខណៈពេលបើកឆ្លងកាត់ផ្លូវជាតិលេខ០១ ពីជើងទៅត្បូង បណ្តាលឲ្យរថយន្តបុកពេញទំហឹង ស្លាប់អ្នកបើកបរម៉ូតូនៅនឹងកន្លែងកើតហេតុ។
ក្រោយឃើញថា មានមនុស្សស្លាប់ តៃកុងឡានបង្កហេតុខាងលើ បើកទ្វារឡានរត់គេចខ្លួនបាត់ បន្សល់ទុករថយន្តនៅកន្លែងកើតហេតុមុនពេលសមត្ថកិច្ចទៅដល់។ នៅយប់ថ្ងៃកើតហេតុ សមត្ថកិច្ចក៏បានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី។ ចំណែករថយន្ត និងម៉ូតូ យកមករក្សាទុកជាភស្តុតាងនៅអធិការដ្ឋានស្រុកកៀនស្វាយ។
តាមការសន្និដ្ឋាន អ្នកបើកបរម៉ូតូធ្វេសប្រហែស ខ្ជីខ្ជាមិនប្រុងប្រយ័ត្ន មិនបានពិនិត្យគ្រប់ជ្រុងជ្រោយមុន ពេលបើកឆ្លងកាត់ថ្នល់។ រីឯអ្នកបើកបររថយន្ត ធ្វេសប្រហែសបើកបរក្នុងល្បឿនលឿននៅពេលជួបឧបសគ្គជាន់ហ្វ្រាំងមិនជាប់ នាំឲ្យមហន្តរាយដល់ជីវិតមនុស្ស និងខូចខាតទ្រព្យសម្បត្តិផ្ទាល់ខ្លួន៕
Source: Kampuchea Thmey Daily
0 Comments