កងកម្លាំងប្រជាធិបតេយ្យស៊ីរី (SDF) ដែលគាំទ្រដោយសហរដ្ឋអាមេរិកបាននិយាយកាលពីថ្ងៃសុក្រថា កូនប្រុសតូចរបស់នាង Shamima Begum ដែលជាយុវតីដើមកំណើតអង់គ្លេសដែលបានចាកចេញពីទីក្រុងឡុងដ៍ដើម្បីចូលរួមក្រុមរដ្ឋឥស្លាមគឺបានស្លាប់នៅក្នុងប្រទេសស៊ីរី។
នាង Begum អាយុ១៩ឆ្នាំដែលត្រូវបានដកហូតសញ្ជាតិដោយរដ្ឋាភិបាលអង់គ្លេសបើទោះបីជានាងមានបំណងវិលត្រលប់ទៅវិញក៏ដោយនោះគឺបានផ្តល់កំណើតដល់កូនកាលពីខែមុននៅក្នុងជំរំជនភៀសខ្លួនមួយនៅភាគឦសានប្រទេសស៊ីរី។
យោងតាមសំបុត្រពេទ្យបានឲ្យដឹងថា ទារកបានស្លាប់ដោយសារជំងឺរលាកសួត។
កាលពីមុន នាងបានផ្តល់កំណើតដល់កូនចំនួនពីរនាក់ទៀតដែលត្រូវបានគេនិយាយថាបានស្លាប់ដោយសារជំងឺនិងកង្វះអាហារូបត្ថម្ភ។
អ្នកនាំពាក្យរបស់ SDF លោក Mustefa Bali បានបញ្ជាក់ពីការស្លាប់នេះទៅកាន់ AFP ប៉ុន្តែបានបដិសេធអះអាងពីរបៀបនិងពេលវេលាដែលកើតឡើង។
ករណីរបស់នាងបានគូសបញ្ជាក់ពីបញ្ហាដែលប្រទេសជាច្រើននៅតំបន់អឺរ៉ុបត្រូវប្រឈមនិងមានការបែងចែកគ្នាថាតើត្រូវអនុញ្ញាតឲ្យក្រុមជីហាដនិយម និងអ្នកគាំទ្រក្រុម IS ត្រូវប្រឈមមុខនឹងការកាត់ទោសឬក៏រារាំងពួកគេពីការចូលក្នុងប្រទេសនៅពេលរដ្ឋ Caliphate របស់ក្រុមរដ្ឋឥស្លាមដួលរលំ។
ក្មេងជំទង់ដែលរត់គេចពីទីក្រុងឡុងដ៍ភាគខាងកើតប្រទេសស៊ីរីនៅពេលនាងមានអាយុ១៥ឆ្នាំជាមួយក្មេងស្រីសិស្សសាលាដទៃទៀតបាននិយាយកាលពីខែមុនថា នាងចង់វិលត្រឡប់ទៅកាន់ចក្រភពអង់គ្លេសវិញបន្ទាប់ពីរត់គេចពីការប្រយុទ្ធគ្នារវាងក្រុមភេរវកម្មនិងកងកម្លាំងដែលគាំទ្រដោយអាមេរិក។
រដ្ឋមន្ត្រីក្រសួងមហាផ្ទៃលោក Sajid Javid បានដកហូតភាពជាពលរដ្ឋរបស់នាងដោយចាត់ទុកវាថាជាបញ្ហាសុវត្ថិភាពបើទោះបីជារដ្ឋាភិបាលបានលើកឡើងថា កូនប្រុសទើបកើតរបស់នាងអាចត្រូវបានគេចាត់ទុកថាខុសគ្នាក៏ដោយ។
គណៈកម្មាធិការជួយសង្គ្រោះអន្ដរជាតិ (IRC) កាលពីថ្ងៃសុក្របាននិយាយថា ស្ត្រីនិងកុមារចំនួន១២,០០០នាក់បានមកដល់ជំរំ Al-Hol ដែលគ្រប់គ្រងដោយពួកឃើដចាប់តាំងពីថ្ងៃពុធមក។
IRC បាននិយាយថា ចាប់តាំងពីខែធ្នូមក មនុស្សយ៉ាងតិច១០០នាក់បានស្លាប់នៅតាមផ្លូវទៅកាន់ជំរំនេះឬមិនយូរប៉ុន្មានក្រោយពីបានមកដល់ដែលភាគច្រើនគឺជាកុមារអាយុក្រោម៥ឆ្នាំ៕ AFP
Source: Kampuchea Thmey Daily
0 Comments