ភ្នំពេញ ៖ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ នៅថ្ងៃទី ២២មិនា ឆ្នាំ២០១៩នេះ បានបើកបន្តសវនាការលើសំណុំរឿងលោកឡាយ វណ្ណៈ អតីតអភិបាលខេត្តតាកែវ និងបងប្រុសជាអតីតស្នងការរងខេត្តតាកែវ ជាប់ចោទពីបទឃាតកម្មលើស្រីកំណាន់ ឈ្មោះ ចេវ សុវឌ្ឍានា កាលពីថ្ងៃទី២៦ ខែមករា ឆ្នាំ២០១៨។
អង្គសវនាការនាថ្ងៃនេះ ផ្ដោតសំខាន់លើការសាកសួរសាក្សីចំនួន៤នាក់ ដែលជាសមត្ថកិច្ចនគរបាលខេត្តតាកែវផ្នែកបច្ចេកទេសវិទ្យាសាស្ត្រ២នាក់ ប្រធានមន្ទីរពេទ្យបង្អែកខេត្ត និងមន្ត្រីជំនាញសុខាភិបាលរាជធានីភ្នំពេញមួយរូប។
ក្នុងសវនាការលោកអនុប្រធានការិយាល័យបច្ចេកទេសវិទ្យាសាស្ត្រ និង លោក អូន នឿន ប្រធានផ្នែកបច្ចេកទេស បានឆ្លើយបំភ្លឺតុលាការថា នៅថ្ងៃទី២៦មករា វេលាម៉ោងប្រមាណ២១និង១៥នាទី ខ្លួនបានទទួលព័ត៌មានតាមទូរស័ព្ទពីលោកស្នងការរងទទួលបន្ទុកបច្ចេកទេសមកថា មានករណីស្លាប់ស្ត្រីម្នាក់នៅក្រុងដូនកែវ។ បន្ទាប់មក លោកស្នងការបញ្ជាឲ្យគណៈកម្មការបច្ចេកទេសចុះទៅកន្លែងកើតហេតុ ដើម្បីធ្វើកោសល្យវិច័យសព។
ក្រុមមន្ត្រីកោសល្យវិច័យបានបញ្ជាក់ទៀតថា ពេលទៅដល់កន្លែងកើតហេតុ ពួកខ្លួនសង្កេតឃើញថា កន្លែងកើតហេតុត្រូវបានគេទន្ទ្រានលុកលុយខុសប្រក្រតីហើយ។ បន្ទាប់មកពួកខ្លួន ក៏ចាប់ផ្ដើមធ្វើការសម្ភាសសាក្សីសំខាន់ម្នាក់ ឈ្មោះ ចាន់ រី ដែលជាអ្នកបម្រើផ្ទាល់របស់ជនរងគ្រោះ ដើម្បីប្រមូលព័ត៌មានទុកជាមូលដ្ឋានក្នុងការស៊ើបអង្កេត។
បន្ទាប់មកទៀត ក៏ចាប់ផ្ដើមធ្វើការត្រួតពិនិត្យក្នុងបន្ទប់បានរកឃើញស្រោមសំបុត្រហែកមួយ ដែលបានសរសេរពីវិបត្តិស្នេហាដ៏ជ្រាលជ្រៅជាមួយនឹងបុរសជាប្ដីរបស់គេ។
ក្រោយពីពិនិត្យស្ថានភាពកន្លែងកើតហេតុហើយ ពួកខ្លួនក៏ពិនិត្យសាកសព រកឃើញថាស្ថានភាពសពស្លាប់នៅប្របមាត់បង្អួច ដោយយកដៃស្ដាំផ្អឹបជាប់នឹង ក ទប់ខ្សែរីដូវាំងនន ដែលចងរឹត,ក ហើយដៃឆ្វេងលើកមកកាន់ខ្សែរីដូ ជើងទម្លាក់ត្រង់ មានទឹកនោមហូរធ្លាក់សើមខោ។ ពេលពិនិត្យប្រដាប់ភេទឃើញថា ជនរងគ្រោះកំពុងមករដូវ ដោយមានសំឡីអនាម័យ និងឈាមក្នុងប្រដាប់ភេទ ។ ពេលពិនិត្យឃើញអាការៈនេះ គណៈកម្មការបច្ចេកទេស ក៏បានពិភាក្សាគ្នា ហើយសម្រេចសរសេររបាយការណ៍ ដោយយោងលើព័ត៌មានដែលប្រមូលបាននៅកន្លែងកើតហេតុបញ្ជាក់ថា ជនរងគ្រោះបានធ្វើអត្តឃាតកម្មដោយខ្លួនឯង។
ចំណែក លោក ឆូវ ឈួន ប្រធានមន្ទីរពេទ្យបង្អែកតាកែវដែលបានទៅពិនិត្យសពនៅកន្លែងកើតហេតុបានបញ្ជាក់ខ្លីថា តាមបទពិសោធន៍របស់លោក និងការពិនិត្យជាក់ស្ដែងនៅកន្លែងកើតហេតុ គឺជនរងគ្រោះពិតជាធ្វើអត្តឃាតមែន។
រីឯ លោក នង សុវណ្ណារ័ត្ន មន្ត្រីបច្ចេកទេស នៃមន្ទីរសុខាភិបាល បានពន្យល់យ៉ាងលម្អិតអំពីភាពខុសគ្នា នៃការធ្វើអត្តឃាតដោយចង.ក រួមទាំងការពិនិត្យលើកត្តាផ្សេងៗជុំវិញកន្លែងកើតហេតុ ដែលផ្ទុយពីករណីសម្លាប់មនុស្សរួចហើយ ទើបយកទៅចង.ក ជាក្រោយ ដោយសង្ឃឹមថាសេចក្ដីពន្យល់របស់អ្នកបច្ចេកទេសផ្នែកកោសល្យវិច័យ គឺជាប្រទីបមួយដែលអាចជួយរកយុត្តិធម៌ដល់ជនជាប់ចោទ និងទាំងជនរងគ្រោះ។ នេះគ្រាន់តែជារបាយការណ៍ និងកោសល្យវិច័យរបស់សមត្ថកិច្ចមូលដ្ឋានប៉ុណ្ណោះ។ នៅសវនាការលើកក្រោយ តុលាការ នឹងលើកបង្ហាញពីរបាយការណ៍ និងកោសល្យវិច័យរបស់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ដែលរកឃើញលទ្ធផលផ្ទុយពីនគរបាលមូលដ្ឋាន។
សំណុំរឿងក្ដីនេះ ដោយសារផុតម៉ោងរដ្ឋបាល តុលាការ សម្រេចផ្អាកសវនាការនៅម៉ោង១២ហើយ នឹងបន្តនៅថ្ងៃទី០១ ខែឧសភា ឆ្នាំ២០១៩ខាងមុខ។
សូមរំលឹកថា នៅក្នុងសំណុំរឿងនេះ តុលាការ បានចោទប្រកាន់លើជនជាប់ចោទ ទី១-ឈ្មោះ ឡាយ វណ្ណៈ ភេទប្រុស អាយុ៤៥ឆ្នាំ និងទី២-ឈ្មោះ ឡាយ ណារិទ្ធ ភេទប្រុស អាយុ៤៦ឆ្នាំ (ជាបងប្រុស របស់លោក ឡាយ វណ្ណៈ) ពីបទ ឃាតកម្ម ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ យោងតាមមាត្រា១៩៩ នៃក្រមព្រហ្មទណ្ឌ។
ជនជាប់ចោទទី៣-ឈ្មោះ ម៉េន សាម៉ៃ ភេទប្រុស អាយុ៣៦ឆ្នាំ ជាតៃកុងឡានរបស់ លោក ឡាយ វណ្ណៈ និងទី៤-ឈ្មោះ ជឹម វុធ ហៅថូត ភេទប្រុស អាយុ៤១ឆ្នាំ ជាអ្នកបម្រើនៅផ្ទះរបស់ លោកស្រី ចែវ សុវឌ្ឍនា ពីបទ លាក់បំបាំងតម្រុយ ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ យោងតាមមាត្រា៥៣២ នៃក្រមព្រហ្មទណ្ឌ។
លោកស្រី ចេវ សុវឌ្ឍនា ត្រូវគេប្រទះឃើញស្លាប់ដោយចង.ក នៅក្នុងបន្ទប់គេងរបស់នាង នៅក្នុងផ្ទះជួលដ៏ធំមួយ ដែល លោក ឡាយ វណ្ណៈ ជាអ្នកជួលឲ្យ នៅក្នុងភូមិផ្សារតាកោរ សង្កាត់រការ ក្នុង ក្រុងដូនកែវ ខេត្តតាកែវ កាលពីល្ងាចថ្ងៃទី២៦ ខែមករា ឆ្នាំ២០១៨កន្លងទៅ។
ភ្លាមៗ ករណីនេះ ត្រូវសមត្ថកិច្ចខេត្តតាកែវសន្និដ្ឋានថា ជារឿងអត្តឃាត ព្រោះតែវិបត្តិស្នេហា ប៉ុន្តែក្រោយពីបើកការស្រាវជ្រាវ សមត្ថកិច្ចជំនាញរបស់នាយកដ្ឋានព្រហ្មទណ្ឌក្រសួងមហាផ្ទៃ បានរកឃើញថា ករណីខាងលើ មិនមែនជារឿងអត្តឃាតឡើយ ពោល គឺជារឿងឃាតកម្មទៅវិញ ដោយមានអ្នកបញ្ជា និងរៀបចំទុកដើម្បីសម្លាប់ជនរងគ្រោះ។ ក្រោយពីបើកការស៊ើបអង្កេត សមត្ថកិច្ចជំនាញ បានឃាត់ខ្លួនក្រុមជនជាប់ចោទទាំង៤នាក់ខាងលើ បញ្ជូនមកតុលាការឃុំខ្លួនរហូតដល់ថ្ងៃកាត់ទោសនេះ។
សវនាការកន្លងមក លោក ឡាយ វណ្ណៈ ដែលជាអ្នកជាប់ពាក់ព័ន្ធដោយផ្ទាល់ទៅក្នុងអន្លង់ស្នេហ៍ដ៏សែនផ្អែមល្ហែមមានជម្រៅកាត់ថ្លៃពុំបាន តែងតែបដិសេធថា ខ្លួនមិនល្ងង់ខ្លៅរហូតសម្លាប់ស្រីកំណាន់របស់ខ្លួននោះឡើយ៕
Source: Kampuchea Thmey Daily
0 Comments