សៀមរាប ៖ គំនូររូបផ្កាចំនួន២៣ផ្ទាំង ត្រូវបានកុមារ ចន្នី ហ្សាវ(Jonny Zhao) អាយុ១១ឆ្នាំ មកពីប្រទេសសិង្ហបុរី យកមកដាក់តាំងលក់ ដើម្បីប្រមូលថវិកាជូនមន្ទីរពេទ្យកុមារអង្គរខេត្តសៀមរាប។
ការដាក់តាំងលក់នេះ ធ្វើឡើងរយៈពេល១ខែ ចាប់ពីល្ងាចថ្ងៃទី០៧ ខែមីនា ដល់ថ្ងៃទី០៧ ខែមេសា ឆ្នាំ២០១៩ នៅក្នុងមន្ទីរពេទ្យកុមារអង្គរ ស្ថិតក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប ខេត្ដសៀមរាប។
ប្រធានទំនាក់ទំនងសាធារណៈនៃមន្ទីរពេទ្យកុមារអង្គរខេត្ដសៀមរាប អ្នកស្រី ស៊ិនកេត អរុណ បានឲ្យដឹងថា មន្ទីរពេទ្យកុមារអង្គរ ឬហៅថា មន្ទីរពេទ្យបេះដូង បាននិងកំពុងព្យាបាលជំងឺកុមាររាប់រយនាក់ក្នុងមួយថ្ងៃៗ ដោយមិនគិតថ្លៃ ហើយសេវាការព្យាបាលនេះ ពឹងផ្អែកទាំងស្រុងទៅសប្បុរសជនទាំងក្នុងប្រទេស និងក្រៅប្រទេស។ ដោយមើលឃើញនូវបញ្ហានេះ ទើបកុមារចន្នី ហ្សាវ ស្វែងរកជំនួយដើម្បីជួយសង្គ្រោះដល់កុមារកម្ពុជា តាមរយៈការដាក់តាំងលក់រូបគំនូរផ្កានេះនៅមន្ទីរពេទ្យកុមារអង្គរនេះ។ អ្នកស្រីបានបន្ដថា គំនូរ២៣ផ្ទាំង ដែលដាក់តាំងលក់នេះ ជាស្នាដៃផ្ទាល់របស់កុមារា ចន្នី ហ្សាវ។
តាមរយៈអ្នកបកប្រែ កុមារា ចន្នី ហ្សាវ បានឲ្យដឹងថា រូបគេបានចេះគូរគំនូររូបផ្កានេះតាំងអាយុ៣ឆ្នាំមកម្ល៉េះ ព្រោះថាផ្កានេះរូបគេយល់ថា បានធ្វើអោយកុមារសប្បាយចិត្ដមិនថាជនជាតិអ្វីនោះទេ។ ចន្នី បានបន្ដថា ដោយមើលឃើញពីកុមារកម្ពុជាកំពុងតែមានជំងឺមហារីកហើយ ខ្វះខាតថវិកាច្រើនសម្រាប់ព្យាបាលទើបរូបគេយកគំនូរផ្កានេះដាក់លក់និងតាំងពិព័រណ៍ ដើម្បីយកថវិកានេះជួយដល់កុមារកម្ពុជាទទួលបានការព្យាបាលមួយដែលមានគុណភាព។ រូបគាត់បានបន្ដតាមរយៈអ្នកបកប្រែថា ការតាំងពិព័រណ៍គំនូរផ្កានេះ បានធ្វើឡើងជាច្រើនលើកនៅប្រទេសសិង្ហបុរី ហើយប្រមូលថវិកាសម្រាប់ជួយក្មេងៗដែលមានជំងឺមហារីក។
លោក ងួន ច័ន្ទភក្រា្ដ នាយកមន្ទីរពេទ្យកុមារអង្គរ បានមានប្រសាសន៍ថា មន្ទីរពេទ្យកុមារអង្គរនេះ ត្រូវបានបង្កើតឡើងដោយស្ថាបនិកជនជាតិជប៉ុនគឺលោក ខិនរ៉ូ អ៊ីស៊ុ នៅក្នុងឆ្នាំ១៩៩៩ ក្នុងទស្សនៈវិស័យផ្ដល់ការព្យាបាល និងថែទាំងសុខភាពដល់កុមារកម្ពុជាប្រកបដោយមេត្ដាករុណា គុណភាពខ្ពស់ និងមិនយកកម្រៃ។ មន្ទីរពេទ្យនេះក៏ជាកន្លែងបណ្ដុះបណ្ដាលដល់បុគ្គលិក មន្ដ្រីសុខាភិបាល និស្សិតវេជ្ជសាស្ត្រ និងសិស្សគិលានុបដ្ឋានមកពីទូទាំងប្រទេសកម្ពុជាផងដែរ។
លោកបានបន្ដថា ជារឿងរាល់ថ្ងៃ ជាមធ្យមមានកុមារប្រមាណ៥០០នាក់ បានទទួលព្យាបាលនៅមន្ទីរពេទ្យកុមារអង្គរនេះ ដោយមិនគិតថ្លៃផងដែរ និងបានចំណាយថវិកាប្រមាណ៦,៥លានដុល្លារអាមេរិក ក្នុងមួយឆ្នាំ ទៅលើការព្យាបាលជំងឺកុមារទូទៅ និងជំងឺវះកាត់បេះដូងផងដែរ។ ចាប់តាំងពីឆ្នាំពីឆ្នាំ១៩៩៩មកមន្ទីរពេទ្យនេះ បានព្យាបាលកុមារចំនួន២លាននាក់មកហើយ។
បើតាមអ្នកស្រី ស៊ិនកេត អរុណ ឲ្យដឹងថា សម្រាប់ថវិកាទ្រទ្រង់មន្ទីរពេទ្យកុមារអង្គរនេះ មួយផ្នែកធំគឺទទួលបានពីសប្បុរសជនខាងក្រៅប្រទេស ដោយឡែកនៅក្នុងប្រទេសឯណេះវិញ ខាងមន្ទីរពេទ្យទទួលបានថវិកាពីសប្បុរសជនតាមរយៈការរៀបចំព្រឹត្តិការណ៍នានាប្រមាណពី៤០ម៉ឺនទៅ៦០ម៉ឺន ដុល្លារអាមេរិកក្នុងមួយឆ្នាំៗ។ សម្រាប់នៅដើមឆ្នាំ២០១៩នេះ ខាងមន្ទីរពេទ្យបានរៀបចំកម្មវិធីស្វែងរកថវិកាបានចំនួន៧ដងរួចមកហើយ៕
Source: Kampuchea Thmey Daily
0 Comments