បាត់ដំបង ៖ ក្រុមក្មេងទំនើងចំនួន២នាក់ ដែលពួកគេមានទាំងដាវសាំម៉ូរ៉ៃដាក់ជាប់តាមម៉ូតូផងនោះ ត្រូវបានកម្លាំងអធិការដ្ឋាន នគរបាលក្រុង សហការជាមួយកម្លាំងព្រហ្មទណ្ឌកម្រិតស្រាល តាមប្រមាញ់រហូតឈានដល់ការចាប់ខ្លួនបាន ក្រោយពីពួកគេបានធ្វើសកម្មភាព ហើយបានរត់គេចខ្លួនអស់មួយរយៈ។
គួរបញ្ជាក់ដែរថា ករណីហិង្សា ដោយចេតនាមានស្ថានទម្ងន់ទោស ( កាប់ដោយកាំបិត ) បានកើតឡើង កាលពីថ្ងៃទី៣ ខែ មីនា ឆ្នាំ ២០១៩ វេលាម៉ោង ០០:៤០នាទីរំលងអធ្រាត្រ នៅលើផ្លូវជាតិលេខ៥៧ ស្ថិតក្នុងភូមិច្រាបក្រសាំង សង្កាត់វត្តគរ ក្រុងបាត់ដំបង ខេត្តបាត់ដំបង។ មូលហេតុដោយសារតែក្រុមជនរងគ្រោះជិះម៉ូតូសម្លឹងមើលមុខគ្នាក្នុងន័យ ឌឺដង នៅចំណុចក្បាលស្ពានថ្ម ក្បែរអាហារដ្ឋានRIVER ទើបជនសង្ស័យទាំង ២ នាក់នោះ បានបើកម៉ូតូតាមកាប់រហូតដល់ចំណុចខាងលើ។
បន្ទាប់ពីបានធ្វើការស្រាវជ្រាវមួយរយៈរួចមក នៅថ្ងៃទី ០៩ ខែ មីនា ឆ្នាំ ២០១៩ វេលាម៉ោង ៥ និង ០៥នាទី កម្លាំងជំនាញនៃអធិការនគរបាលក្រុងបាត់ដំបង បានសហការជាមួយក្រុមអន្តរាគមន៍បង្ការ បង្ក្រាប ធ្វើការនាំខ្លួនជនសង្ស័យចំនួន ២ នាក់ ដែលពាក់ព័ន្ធករណី ហិង្សាដោយចេតនា នាពេលកន្លងមកដើម្បីកសាងសំណុំរឿងបញ្ជូនទៅតុលាការ។
ជនសង្ស័យទាំង ២ នាក់ នោះ មានឈ្មោះ រ៉ាំ បូរី ហៅ ហៅ សល់ ហៅយក្ស ភេទប្រុស អាយុ ២១ឆ្នាំ មានទីលំនៅភូមិអណ្តូងព្រីង សង្កាត់អូរម៉ាល់ ក្រុងបាត់ដំបង ខេត្តបាត់ដំបង ( ជាជនដៃដល់ ) និងឈ្មោះ រ៉ើយ សារ៉ាន ភេទប្រុស អាយុ ២៤ឆ្នាំ មានទីលំនៅភូមិច្រាបក្រសាំង សង្កាត់វត្តគរ ក្រុងបាត់ដំបង ខេត្តបាត់ដំបង ( ជាអ្នកឌុប)។
វត្ថុតាងដែលដកហូតបានរួមមាន កាំបិតចំនួន ៣ ដើម ម៉ូតូម៉ាកហុងដាឌ្រីម សេ១២៥ ពណ៌ក្រហម ស៊េរីឆ្នាំ ២០១៩ គ្មានស្លាកលេខ មួយគ្រឿង ម៉ូតូម៉ាកហុងដាឌ្រីម សេ១២៥ ពណ៌ ខ្មៅ ស៊េរីឆ្នាំ ២០១២ ពាក់ស្លាកលេខ បាត់ដំបង 1M 6051ចំនួន ១ គ្រឿង។
ដោយឡែកជនរងគ្រោះ ដែលត្រូវជនសង្ស័យកាប់អោយរបួសគឺមានឈ្មោះ១. ភី សុធារ៉ា ហៅ ចិន ភេទប្រុស អាយុ ១៩ឆ្នាំ មានទីលំនៅភូមិជាមន្ត្រី ឃុំត្រែង (រងរបួសត្រង់ស្លាបប្រចៀវខាងស្តាំបណ្តាលឲ្យមុតរយះដេរចំនួន ១០ ថ្នេរ) ២. ឈ្មោះ កែវ វ៉ាន់នី ភេទប្រុស អាយុ ១៧ ឆ្នាំ មានទីលំនៅភូមិជាមន្ត្រី ឃុំត្រែង( រងរបួសត្រង់ស្លាបប្រចៀវខាងស្តាំ មុតរយះដេរចំនួន ២៤ថ្នេរ ) ៣. ឈ្មោះ ភី សុខហៃ ភេទប្រុស អាយុ ២១ឆ្នាំ មានទីលំនៅភូមិត្រែង ឃុំត្រែង ( រងរបួសត្រង់ដៃខាងឆ្វេងរយះចេញឈាមបណ្តាលឲ្យបាក់ដ ) ៤. ឈ្មោះ កែវ ឆដា ភេទប្រុស អាយុ ១៨ឆ្នាំ មានទីលំនៅភូមិគីឡូ ឃុំត្រែង ( រងរបួសត្រង់លើស្លាបប្រចៀវខាងស្តាំបណ្តាលឲ្យមុតរយះ ដេរចំនួន ០៥ ថ្នេរ )និង ៥. ឈ្មោះ ឃួម សុខខេង ភេទប្រុស អាយុ ១៩ឆ្នាំ មានទីលំនៅភូមិទឹកសាប ឃុំផ្លូវមាស ( រងរបួសត្រង់ស្មាខាងឆ្វេងបណ្តាលឲ្យមុតរយះ ដេរចំនួន ១៥ ថ្នេរ។
បច្ចុប្បន្នការិយាល័យជំនាញកំពុងតែកសាងសំណុំរឿងបញ្ជូនទៅសាលាដំបូងខេត្តបាត់ដំបងហើយ ដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments