អនុរដ្ឋមន្ត្រី​ការពារជាតិ​ហ្វីលីពីន នឹង​បំពេញ​ទស្សនកិច្ច​ផ្លូវការ​រយៈពេល​៤​ថ្ងៃ នៅ​កម្ពុជា​

ភ្នំពេញ​ ៖ គណៈប្រតិភូ​យោធា​ជាន់ខ្ពស់​ហ្វីលីពីន ដឹកនាំ​ដោយ​លោក រី​ខា​ដូ អេ ដា​វីដ ជេ​អា (Ricardo A David JR) អនុរដ្ឋមន្ត្រី​ក្រសួងការពារជាតិ​ហ្វីលីពីន នឹង​អញ្ជើញ​មក​បំពេញ​ទស្សនកិច្ច​មិត្តភាព និង​ផ្លូវការ​រយៈពេល​០៤ ថ្ងៃ​ដោយ​ចាប់ពី​ថ្ងៃទី​១១ ដល់​ថ្ងៃទី​១៤ ខែមីនា ឆ្នាំ​២០១៩ នៅ​ព្រះរាជាណាចក្រ​កម្ពុជា ដែល​ទស្សនកិច្ច​នេះ ធ្វើឡើង​តប​តាម​ការអញ្ជើញ​របស់​ស​ម្ដេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ​។



នាយ​ឧ​ត្ត​ម​សេនីយ៍ ឈុំ សុជាតិ អ្នកនាំពាក្យ​ក្រសួងការពារជាតិ​បាន​ឲ្យ​ដឹង​ថា ក្នុង​ដំណើរ​ពេញ​ទៀត​បំពេញ​ទស្សនកិច្ច​នេះ គណៈប្រតិភូ​យោធា​ជាន់ខ្ពស់​ហ្វីលីពីន នឹង​អញ្ជើញ​ចូលរួម​កិច្ចប្រជុំ​ទ្វេភាគី ស្ដីពី​គណៈកម្មាធិការ​សហប្រតិបត្តិ​ការ​យោធា​រួមគ្នា (JDCC) កម្ពុជា​-​ហ្វីលីពីន ដែល​កិច្ចប្រជុំ​នេះ នឹង​ប្រព្រឹត្តទៅ​ក្រោម​អធិបតីភាព​ឯកឧត្តម នាយ​ឧ​ត្ត​ម​សេនីយ៍ នាង ផាត រដ្ឋលេខាធិការ​ប្រចាំការ​ក្រសួងការពារជាតិ និង​លោក Ricardo A David JR អនុរដ្ឋមន្ត្រី​ក្រសួងការពារជាតិ​ហ្វីលីពីន នា​ស្តី​ការ​ក្រសួងការពារជាតិ​។



បន្ទាប់មក​លោក​Ricardo A David JR ព្រមទាំង​គណៈប្រតិភូ​យោធា​ជាន់ខ្ពស់​ហ្វីលីពីន នឹង​ចូលជួប​សម្ដែង​ការគួរសម សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ​ផងដែរ នៅ​វិមាន​មិត្តភាព ទីស្តីការគណៈរដ្ឋមន្ត្រី​៕

Source: Kampuchea Thmey Daily