បារាំង​បើក​ការស៊ើបអង្កេត ​បន្ទាប់ពី​បាតុករ “​អាវកាក់​ពណ៌​លឿង​” វ័យ​ចំណាស់​រង​របួស

មន្ត្រី​បារាំង​បាន​ប្រឈម​នឹង​សំណួរ​ថ្មីៗ​ កាលពី​ថ្ងៃអាទិត្យ​អំពី​ការគ្រប់គ្រង​លើ​បាតុកម្ម "​អាវកាក់​ពណ៌​លឿង​" បន្ទាប់ពី​សកម្មជន​វ័យ​ចំណាស់​ម្នាក់ ​ត្រូវ​បាន​រងរបួស​យ៉ាងធ្ងន់ធ្ងរ​នៅក្នុង​ទីក្រុង Nice ភាគខាងត្បូង។

រដ្ឋអាជ្ញា​នៅ​ទីនោះ​បាន​បើក​ការសាកសួរ​មួយ​ដើម្បី​ព្យាយាម​រកឱ្យឃើញ​នូវ​អ្វីដែល​បាន​កើតឡើង​កាលពី​ថ្ងៃ​សៅរ៍​នៅពេលដែល​លោកស្រី Genevieve Legay អាយុ​៧៣​ឆ្នាំ​បាន​រងរបួស​ក្បាល​។​

អ្នកកាសែត AFP នៅ​កន្លែងកើតហេតុ​បាន​កត់សម្គាល់ថា នៅពេល​ក្រុមគ្រូពេទ្យ​ជម្លៀស​សកម្មជន​ជើងចាស់​ឈ្មោះ Legay ចេញពី​បាតុកម្ម លោកស្រី​បាន​ហូរឈាម​ពី​ក្បាល​ប៉ុន្តែ​នៅតែ​ដឹងខ្លួន​។​
​ក្រោយមក កូនស្រី​របស់លោក​ស្រី បាន​និយាយថា លោកស្រី​បាន​រង​ការបាក់​ឆ្អឹង​ជាច្រើន​នៅ​លលាដ៍ក្បាល​និង​ឆ្អឹងខ្នង​។​

លោក Arie Alimi ដែលជា​មេធាវី​របស់​គ្រួសារ​នេះ​បាន​ប្រាប់ AFP ថា ពួកគេ​នឹងដាក់​ពាក្យបណ្តឹង​ជា​ផ្លូវការ​ប្រឆាំងនឹង​អាជ្ញាធរ​ចំពោះ​អំពើ​ហឹ​ង្សា​លើ "​មនុស្ស​ងាយ​រងគ្រោះ​" ។ អភិបាល​របស់​តំបន់​នេះ​នឹងត្រូវ​ដាក់ឈ្មោះ​នៅក្នុង​ពាក្យបណ្តឹង​នេះ​ដែល​នឹងដាក់​នៅ​ថ្ងៃ​ចន្ទ​។​

រូបថត​និង​វីដេអូ​ពី​ការតវ៉ា​កាលពី​ថ្ងៃ​សៅរ៍​បាន​បង្ហាញថា លោកស្រី Legay កាន់​ទង់​ពណ៌​ឥ​ន្ធ​នូ​ដែលមាន​ពាក្យ​ថា "​សន្តិភាព​" សរសេរ​នៅលើ​វា​។​

លោកស្រី Legay គឺជា​សកម្មជន​មួយរូប​ជាមួយ​ក្រុម​យុទ្ធនាការ​យុត្តិធម៌​សង្គម Attac ។ ក្រុម​នេះ​បាន​ផ្សព្វផ្សាយ​សារ​មួយ​នៅលើ​គេហទំព័រ​របស់ខ្លួន​ដែល​អំពាវនាវ​ឱ្យមាន​ការស៊ើបអង្កេត​ដើម្បី​ស្វែងរក​អ្នក​ដែល​ទទួលខុសត្រូវ​ចំពោះ​ការរង​របួស​របស់លោក​ស្រី​។​

លោក Jean-Michel Pretre រដ្ឋអាជ្ញា​បាន​និយាយថា ពួកគេ​កំពុង​ធ្វើ​អ្វី​គ្រប់បែបយ៉ាង​ដែល​ពួកគេ​អាចធ្វើ​បាន​ដើម្បី​រកឱ្យឃើញ​នូវ​អ្វីដែល​បានកើត​ឡើង​៕AFP

​

Source: Kampuchea Thmey Daily