ភ្នំពេញ ៖ ដោយមើលឃើញថា អតីតតំណាងរាស្ត្រ ក៏ដូចជាថ្នាក់ដឹកនាំអតីតបក្សសង្គ្រោះជាតិមានចំនួនកាន់តែច្រើនឡើងៗ បានដាក់ពាក្យស្នើសុំសិទ្ធិធ្វើនយោបាយឡើងវិញ ហើយទទួលបាននីតិសម្បទាធ្វើនយោបាយជាបន្តបន្ទាប់នោះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា នៅពេលនេះ គឺជាឱកាសមាស ឱកាសពេជ្រ សម្រាប់ឥស្សរជនដទៃទៀត ដែលនៅមិនទាន់បានដាក់ពាក្យសុំនីតិសម្បទាធ្វើនយោបាយឡើងវិញ ពីព្រោះ ពេលវេលាមិននៅរង់ចាំមនុស្សនោះទេ។
ការបញ្ជាក់របស់អ្នកនាំពាក្យគណបក្សប្រជាជនកម្ពុជាបែបនេះ បានធ្វើឡើងបន្ទាប់ពីមានអតីតតំណាងរាស្ត្រ ក៏ដូចជាថ្នាក់ដឹកនាំអតីតបក្សសង្គ្រោះជាតិចំនួន៩រូបហើយ បានដាក់ពាក្យទៅក្រសួងមហាផ្ទៃ ដើម្បីស្នើសុំសិទ្ធិធ្វើនយោបាយឡើងវិញ ហើយមួយចំនួនក៏ត្រូវបានព្រះមហាក្សត្រចេញព្រះរាជក្រឹត្យត្រាស់បង្គាប់ផ្តល់នីតិសម្បទាផងដែរ។
តាមលោក សុខ ឥសាន ពេលវេលា គឺជាមាសប្រាក់ ពេលវេលាចេះតែធ្វើដំណើរទៅមុខឥតឈប់ ឬបង្អង់រង់ចាំអ្វីឡើយ អាយុក៏ចេះតែកើនឡើងពីមួយឆ្នាំទៅមួយឆ្នាំ។ ប្រទេសក៏ចេះតែការអភិវឌ្ឍន៍រីកចម្រើនទៅមុខ ដើម្បីកែប្រែជីវភាពរស់នៅរបស់ប្រជាជនឲ្យកាន់តែប្រសើរឡើងស្របតាមសំណូមពរត្រូវការ។ លោកបញ្ជាក់ថា “ចំពោះអ្នកនយោបាយ ក៏មានពេលកាន់តែតិចទៅៗក្នុងការចាប់យកឱកាសធ្វើនយោបាយរបស់ខ្លួន ជាពិសេសឥស្សរជននយោបាយរបស់អតីតបក្សប្រឆាំង ដែលត្រូវព្យួរសិទ្ធិធ្វើនយោបាយរយៈពេល៥ឆ្នាំ ដោយតុលាការ”។
លោក សុខ ឥសាន អះអាងថា នៅក្នុងបរិបថ ដែលពេលវេលាចេះតែដើរទៅមុខ មានឥស្សរជនមួយចំនួនបានរូតរះដាក់ពាក្យសុំនីតិសម្បទា ធ្វើនយោបាយឡើងវិញ និងបានទទួលនីតិសម្បទាធ្វើនយោបាយពីព្រះមហាក្សត្ររួចហើយ។ ដូច្នេះនៅពេលនេះ គឺជាឱកាសមាស ឱកាសពេជ្រសម្រាប់ឥស្សរជនដទៃទៀត ដែលនៅមិនទាន់បានដាក់ពាក្យសុំនីតិសម្បទាធ្វើនយោបាយឡើងវិញ ដោយមានហេតុផលផ្សេងៗរៀងខ្លួន។ លោកបញ្ជាក់ទៀតថា ឥឡូវនេះ ពេលវេលាអត់នៅរង់ចាំយើងនោះទេ ឱកាសមាស ឱកាសពេជ្រ ក៏មិនមែនចេះតែមានគ្រប់ពេលដែរ ដូច្នេះអ្នកដែលមិនទាន់ដាក់ពាក្យ គួរតែពិនិត្យពិចារណាឲ្យបានទាន់ពេលវេលា ហើយក៏មិនគួរនៅបន្តផ្ញើជីវិតនយោបាយលើអ្វីដែលមិនទៀតទាត់នោះដែរ។
សូមបញ្ជាក់ថា ការដាក់លិខិតស្នើសុំសិទ្ធិធ្វើនយោបាយជាបន្តបន្ទាប់របស់អតីតតំណាងរាស្ត្រ និងអតីតថ្នាក់ដឹកនាំអតីតគណបក្សសង្គ្រោះជាតិ ដែលតុលាការហាមឃាត់សិទ្ធិធ្វើនយោបាយនេះ បានធ្វើឡើងបន្ទាប់ពីវិសោធនកម្ម ច្បាប់ស្តីពីគណបក្សនយោបាយ បានចូលជាធរមាន កាលពីថ្ងៃទី០២ ខែមករា ឆ្នាំ២០១៩ ដែលច្បាប់នេះ បានបើកផ្លូវឲ្យជនទាំងឡាយណា ដែលតុលាការហាមឃាត់សិទ្ធិធ្វើនយោបាយ ហើយបិទផ្លូវតវ៉ានោះ មានច្រកដើម្បីសុំនីតិសម្បទាយោបាយឡើងវិញ តាមរយៈការស្នើសុំរបស់នាយករដ្ឋមន្ត្រី។
រហូតមកដល់ពេលនេះ អតីតតំណាងរាស្ត្រ និងអតីតថ្នាក់ដឹកនាំអតីតគណបក្សសង្គ្រោះជាតិ ចំនួន០៩នាក់ហើយ ដាក់ពាក្យស្នើសុំសិទ្ធិធ្វើនយោបាយឡើងវិញ ដែលក្នុងនោះរួមមាន ទី១, លោក គង់ គាំ អតីតទីប្រឹក្សាជាន់ខ្ពស់គណបក្សសង្គ្រោះជាតិ ទី២, លោក គង់ បូរ៉ា អតីតតំណាងរាស្ត្រគណបក្សសង្គ្រោះជាតិមណ្ឌលព្រៃវែង ទី៣, លោក ស៊ីម សុវណ្ណនី ហៅ ស៊ីម វ៉ាន់នី អតីតសមាជិកគណៈកម្មាធិការនាយក របស់អតីតគណបក្សសង្គ្រោះជាតិ (CNRP) ទី៤, លោក កង គឹមហាក់ អតីតតំណាងរាស្ត្រមណ្ឌលកំពង់ចាម និងជាសមាជិកគណៈកម្មាធិការនាយកអតីតគណបក្សសង្គ្រោះជាតិ ទី៥, លោក ជីវ កត្តា អតីតតំណាងរាស្ត្រមណ្ឌលកំពង់ចាម និងជាសមាជិកគណៈកម្មាធិការនាយកអតីតគណបក្សសង្គ្រោះជាតិ ទី៦, លោក អ៊ូ ចាន់រ័ត្ន អតីតតំណាងរាស្ត្រមណ្ឌលតាកែវ និងជាសមាជិកគណៈកម្មាធិការអចិន្ត្រៃយ៍នៃអតីតគណបក្សសង្គ្រោះជាតិ ទី៧, លោក ច័ន្ទ សិលា ជាសមាជិកគណៈកម្មាធិការនាយកនៃអតីតគណបក្សសង្គ្រោះជាតិ ទី៨, លោកស្រី ទេព សុទ្ធី អតីតតំណាងរាស្ត្រមណ្ឌលតាកែវ និងជាសមាជិកគណៈកម្មាធិការនាយកនៃអតីតគណបក្សសង្គ្រោះជាតិ និងទី៩, លោក រៀល ខេមរិន្ទ្រ អតីតតំណាងរាស្ត្រអតីតគណបក្សសង្គ្រោះជាតិមណ្ឌលស្វាយរៀង និងជាសមាជិកគណៈកម្មាធិការនាយកនៃអតីតគណបក្សសង្គ្រោះជាតិ៕
Source: Kampuchea Thmey Daily
0 Comments