ភ្នំពេញ ៖ គ្រូបង្រៀនសាលាឯកជន ម្នាក់ និងជានាយករងផងដែរនោះ ត្រូវបានសមត្ថកិច្ចចុះទៅឃាត់ខ្លួន បន្ទាប់ពីទទួលបានពាក្យបណ្តឹងពីក្រុមគ្រួសារជនរងគ្រោះថា លោកគ្រូម្នាក់នេះ ពីបទល្បួងកូនសិស្សស្រីមិនទាន់គ្រប់អាយុយកទៅរំលោភនៅក្នុងបន្ទប់ការិយាល័យ និងនៅក្នុងបន្ទប់ផ្ទះសំណាក់តាំងពីឆ្នាំ២០១៨ មកនោះ។
បើតាមសមត្ថកិច្ចបញ្ជាក់ថា ក្មេងស្រីរងគ្រោះ ត្រូវជនសង្ស័យល្បួង យកទៅរំលោភ នៅផ្ទះសំណាក់ភ្នំមាស តាមផ្លូវជាតិលេខ៣ ស្ថិតនៅភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ ជាបន្ដបន្ទាប់តាំងពីចុងឆ្នាំ២០១៨មកម្ល៉េះ ទើបមកដល់ពេលនេះ បែកការណ៍ដោយសារឪពុកម្ដាយសួរដេញដោល ក្រោយពីមានការសង្ស័យ។
ក្មេងស្រីរងគ្រោះ អាយុ១៥ឆ្នាំ មុខរបរសិស្ស មានទីលំនៅរាជធានីភ្នំពេញ ចំណែកជនសង្ស័យ ឈ្មោះ ចិន មករា ភេទប្រុស អាយុ ២៦ឆ្នាំ ជនជាតិ ខ្មែរ មុខរបរគ្រូបង្រៀន ជានាយករងសាលាភាសាអង់គ្លេសភាសាសាស្ត្រ ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ត្រូវបានឃាត់ខ្លួន នៅថ្ងៃទី១៨ ខែមីនា ឆ្នាំ២០១៩។
សមត្ថកិច្ចបានឲ្យដឹងថា កាលពីដំបូងជនសង្ស័យជាគ្រូបង្រៀន បានជិះម៉ូតូឌុបក្មេងស្រីរងគ្រោះ ចូលទៅជួលបន្ទប់ រួចនិយាយលួងលោមក្មេងស្រីរងគ្រោះ ហើយបានធ្វើសកម្មភាព រំលោភសេពសន្ថវៈ បានសម្រេចមួយលើក ហើយនិយាយគំរាមក្មេងស្រីរងគ្រោះថា ទៅវិញកុំនិយាយប្រាប់ក្រុមគ្រួសារ និងអ្នកដទៃ បើហ៊ានប្រាប់គេសម្លាប់ចោល។
សមត្ថកិច្ចបន្តថា កាលពី ល្ងាចថ្ងៃទី ២០ ខែធ្នូ ឆ្នាំ២០១៨ មានករណីក្មេងស្រីម្នាក់ ត្រូវជនសង្ស័យល្បួង យកទៅរំលោភ នៅផ្ទះសំណាក់ភ្នំមាស តាមផ្លូវជាតិលេខ៣ ស្ថិតនៅភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញរួចម្តងហើយ។ លុះដល់ថ្ងៃទី ២៤ ខែធ្នូ ឆ្នាំ២០១៨ ជនសង្ស័យបានទូរស័ព្ទហៅក្មេងស្រីរងគ្រោះ ឲ្យទៅជួយរៀបចំឥវ៉ាន់នៅក្នុងសាលា ពេលក្មេងស្រីរងគ្រោះទៅដល់ ជនសង្ស័យបាននាំចូលក្នុងបន្ទប់ការិយាល័យ រួចធ្វើសកម្មភាពចាប់រំលោភសេពសន្ថវៈ លើក្មេងស្រីរងគ្រោះ បានសម្រេចមួយលើកទៀត ហើយនិយាយគំរាមសម្លាប់បើសិនហ៊ាននិយាយប្រាប់គេឲ្យដឹង។
រហូតមកដល់ល្ងាច ទី១៦ ខែមិនា ឆ្នាំ២០១៩ ក្រុមគ្រួសាររបស់ក្មេងស្រីរងគ្រោះ ដោយមានការសង្ស័យឃើញ ក្មេងស្រីរងគ្រោះ មានសភាពស្ងៀមស្ងាត់ សំងំតែក្នុងបន្ទប់ ហើយនិយាយថា ចង់តែស្លាប់ ទើបក្រុមគ្រួសារ បាននាំគ្នាសួរនាំ ហើយក្មេងរងគ្រោះប្រាប់រឿងរ៉ាវដល់ឪពុកម្តាយ និងក្រុមគ្រួសារឲ្យបានដឹងពីដំណើររឿង។
ក្រោយមកនៅថ្ងៃទី១៨ ខែមិនា ឆ្នាំ២០១៩ ម្តាយរបស់ក្មេងស្រីរងគ្រោះ បាននាំក្មេងស្រីរងគ្រោះ មកដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលក្រាំងពង្រខណ្ឌដង្កោដែលជាទីលំនៅរបស់នាង ដើម្បីឲ្យសមត្ថកិច្ចជួយអន្តរាគមន៍។
សមត្ថកិច្ចបានចុះធ្វើការស្រាវជ្រាវ ឃាត់ខ្លួនជនសង្ស័យ បានត្រង់ចំណុចសាលាភាសាសាស្ត្រ ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ ជាកន្លែងសាលារៀន រួមនឹងវត្ថុតាង ម៉ូតូ០១គ្រឿង ម៉ាកហុងដាសេ១២៥ ពណ៌ខ្មៅ និងទូរស័ព្ទដៃម៉ាកណូគា ចុចពិល ពណ៌ក្រហមលាយខ្មៅ យកមកធ្វើការសាកសួរនៅ ប៉ុស្តិ៍នគរបាលរដ្ឋបាលក្រាំងពង្រ ដើម្បីកសាងសំណុំរឿង បញ្ជូនទៅសាលាដំបូង រាជធានីភ្នំពេញ៕
Source: Kampuchea Thmey Daily
0 Comments