ក្រុមហ៊ុនធ្វើអាជីវកម្មធនធានរ៉ែ ខ្សាច់ ថ្ម និងជីកអាចម៍ដី ប្រឈមមុខការបិទអាជីវកម្ម ប្រសិនបើមិនគោរពតាមកិច្ចសន្យា និងការណែនាំរបស់មន្ត្រីជំនាញ

កំពង់ស្ពឺ ៖ ក្រុមហ៊ុនដែលកំពុងធ្វើអាជីវកម្មធនធានរ៉ែខ្សាច់ ថ្មភ្នំ និងអាចម៍ដីជាច្រើនទូទាំងខេត្តកំពង់ស្ពឺ ដែលមិនគោរពតាមកិច្ចសន្យា និងការណែនាំរបស់មន្ត្រីជំនាញព្រមទាំងអាជ្ញាធរខេត្ត នៅតែបង្កផលប៉ះពាល់ដល់ការរស់នៅរបស់ប្រជាពលរដ្ឋនៅក្បែរការដ្ឋាន និងតាមដងផ្លូវនានា ត្រូវប្រឈមមុខនឹងការបិទអាជីវកម្មតែម្តង។

ដើម្បីអនុវត្តការងារឱ្យមានប្រសិទ្ធភាព និងការទទួលខុសត្រូវខ្ពស់ កម្លាំងនគរបាលសណ្តាប់ធ្នាប់ ចរាចរណ៍ នៃស្នងការនគរបាលខេត្តកំពង់ស្ពឺ នាថ្ងៃទី០៩ ខែមីនា ឆ្នាំ២០១៩កន្លងទៅ បានប្រតិបត្តិការចាប់រថយន្តដឹកខ្សាច់ អាចម៍ដី និងថ្មចេញពីការដ្ឋានមួយចំនួនដែលមិនគោរពតាមការណែនាំ និងកិច្ចសន្យារបស់មន្ត្រីជំនាញ។

លោកឧត្ដមសេនីយ៍ទោ សម សាមួន ស្នងការនគរបាលខេត្តកំពុងស្ពឺ បានដាក់កម្លាំងនគរបាលចុះ អនុវត្តតាមគោលការណ៍ ស្មារតីអង្គប្រជុំរបស់លោក ស៊ុយ សែម រដ្ឋមន្ត្រីក្រសួងរ៉ែ និងថាមពល និងតាមបញ្ជាដឹកនាំផ្ទាល់របស់លោក វ៉ី សំណាង អភិបាលខេត្តកំពង់ស្ពឺ ឲ្យធ្វើការឃាត់រថយន្តដឹកថ្ម ខ្សាច់ ល្មើសនឹងស្មារតីអង្គប្រជុំបានឯកភាពរវាងម្ចាស់អាជីវកម្មជាមួយអាជ្ញាធរបានចំនួន ៥៦គ្រឿង នៅថ្ងៃទី០៩ ខែមីនានេះ។

សូមរម្លឹកថា កាលថ្ងៃទី០៧ ខែមីនា ឆ្នាំ២០១៩ កន្លងមក នៅសាលប្រជុំសាលាខេត្តកំពង់ស្ពឺ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានអញ្ជើញជាអធិបតីក្នុងពិធីសំណេះសំណាលជាមួយអាជីវកររ៉ែសំណង់ ក្នុងខេត្តកំពង់ស្ពឺ ដែលគោលបំណងសំខាន់នៃកិច្ចសំណេះសំណាលដើម្បីធ្វើការរំលឹកអំពីលក្ខខណ្ឌមួយចំនួនរបស់ក្រសួងរ៉ែ និងថាមពល ក្នុងពង្រឹងការអនុវត្តច្បាប់ឱ្យកាន់តែមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់។

កិច្ចប្រជុំនោះ រដ្ឋមន្ត្រីក្រសួងរ៉ែ និងថាមពល បានទុកលទ្ធភាពរហូតដល់ថៃ្ងទី១៨ ខែមីនា ឆ្នាំ២០១៩ ខាងមុខនេះ ដើម្បីឱ្យខាងជំនាញធនធានរ៉ែ និងម្ចាស់អាជីវកម្ម សិក្សាផលប៉ះពាល់មួយចំនួននៅមូលដ្ឋានផ្ទាល់តែម្តង។

សូមបញ្ជាក់ថា ក្រុមការងារចម្រុះក្រសួងរ៉ែ និងថាមពល ព្រមទាំងអាជ្ញាធរខេត្តកំពង់ស្ពឺ និងស្រុកក្រោមការចុះដោះស្រាយផ្ទាល់របស់លោក ហ៊ុន ម៉ានី អ្នកតំណាងរាស្ត្រខេត្តកំពង់ស្ពឺ កំពុងតាមដានបន្តរាល់សកម្មភាពក្រុមហ៊ុនមួយណាមិនគោរពតាមការណែនាំ និងកិច្ចព្រមព្រាងជាមួយមន្ត្រីជំនាញ។

ការចុះតាមដានជាប្រចាំពីសកម្មភាពដឹកជញ្ជូនថ្ម ខ្សាច់នេះ បន្ទាប់ពីមានចំណាត់ការលើក្រុមហ៊ុនអាជីវកម្មចំនួន ០៦ ក្រុមហ៊ុនក្រុមការងារក៏បានសង្កេតឃើញនូវស្មារតីគាំទ្រ និងការចូលរួមសហការយ៉ាងស្មោះស្ម័គ្រពីសំណាក់ក្រុមហ៊ុនមួយចំនួនធំស្របតាមស្មារតីដែលបានឯកភាពគ្នាក្នុងកិច្ចព្រមព្រៀង កាលពីថ្ងៃទី០១ ខែមីនា ឆ្នាំ២០១៩កន្លងមក។ ក្រុមការងារប្តេជ្ញាបន្តតាមដានការអនុវត្តស្មារតី នៃកិច្ចប្រជុំខាងលើដើម្បីធានាថាផលប្រយោជន៍រួមមួយអាចសម្រេចបានសម្រាប់គ្រប់ភាគីពាក់ព័ន្ធ។

សូមបញ្ជាក់ថា បើទោះជាមានការឯកភាពគ្នាក្នុងជំនួប កាលពីថ្ងៃទី០១ ខែមីនា ឆ្នាំ២០១៩ រវាងភាគីពាក់ព័ន្ធ និងតំណាងក្រុមហ៊ុនអាជីវកម្មរ៉ែខ្សាច់ និងថ្ម នៅក្នុងស្រុកភ្នំស្រួច ខេត្តកំពង់ស្ពឺ ក៏ដោយក្រុមការងារសង្កេតឃើញថា ក្រុមហ៊ុនមួយចំនួននៅតែបន្តសកម្មភាពប្រាសចាកពីស្មារតីនៃកិច្ចព្រមព្រៀងខាងលើនេះដដែល។

ជាចំណាត់ការឆ្លើយតបទៅនឹងសកម្មភាពគឃ្លើននេះ កាលពីព្រឹកថ្ងៃទី០៤ ខែមីនា ឆ្នាំ២០១៩ អាជ្ញាធរខេត្តរួមជាមួយនឹងតំណាងក្រសួងរ៉ែ និងថាមពល បានចុះផ្អាកសកម្មភាពប្រតិបត្តិការរបស់ក្រុមហ៊ុនចំនួន០៦ និងបានឈានទៅដល់ការព្យួរអាជ្ញាប័ណ្ណអាជីវកម្មរយៈពេល ០១សប្តាហ៍ទុកជាការព្រមាន។

ក្រុមការងារបានកោតសរសើរ និងថ្លែងអំណរគុណដល់អាជ្ញាធរពាក់ព័ន្ធ ដែលមាននូវចំណាត់ការទាន់ពេលវេលា និងប្រកបដោយភាពម៉ឺងម៉ាត់ចំពោះសកម្មភាពទាំងនេះ។

ជាមួយគ្នានេះដែរ ក្រុមការងារក៏សូមថ្លែងអំណរគុណដល់ម្ចាស់អាជីវកម្មផ្សេងៗទៀត ដែលបានចូលរួមអនុវត្តនូវកិច្ចព្រមព្រៀងខាងលើបានយ៉ាងខ្ជាប់ខ្ជួន។ ក្រុមការងារនឹងនៅតែបន្តតាមដានយ៉ាងយកចិត្តទុកដាក់បំផុតចំពោះការអនុវត្តស្មារតីនៃកិច្ចព្រមព្រៀងខាងលើ។

ដើម្បីឆ្លើយតមអំពីផលប៉ះពាល់ដែលបណ្តាលមកពីអាជីវកម្មរ៉ែខ្សាច់ និងថ្ម ក្រុមការងារបានអញ្ជើញភាគីដែលពាក់ព័ន្ធរួមមាន៖ តំណាងក្រសួងរ៉ែ និងថាមពល អាជ្ញាធរខេត្ត ស្រុក មន្ទីរ អង្គភាពជុំវិញខេត្ត និងតំណាងក្រុមហ៊ុន ដើម្បីពិភាក្សា ជំរុញឱ្យមានការដោះស្រាយ និងឈានទៅដល់ការអនុវត្តជាក់ស្តែងលើចំណុចដែលបានឯកភាពមួយចំនួន ដែលក្នុងនោះរួមមាន៖ ១)សកម្មភាពនៃការកិន និងការបំផ្ទុះ មិនត្រូវធ្វើហួសពីម៉ោង ៦ ព្រឹក ដល់ម៉ោង ៦ល្ងាច។ ២) ការស្រោចទឹកថ្នល់ជាប្រចាំ ដើម្បីបញ្ចៀសផលប៉ះពាល់ដល់ជីវភាព និងសុខភាពប្រជាពលរដ្ឋរស់នៅតាមដងផ្លូវ។ ៣) ការដឹកជញ្ជូនត្រូវរក្សានូវគម្លាតយ៉ាងតិច ១៥០ម៉ែត្រ ពីរថយន្តមួយទៅរថយន្តមួយ និងដោយរក្សាល្បឿនយឺតបំផុតនៅក្នុងទីប្រជុំជន។ ៤) ក្រុមហ៊ុនត្រូវរួមគ្នាចេញបដិភាគជួសជុលផ្លូវ ដែលរងការខូចខាតដោយសារការដឹកជញ្ជូនរបស់ខ្លួន។

គួររំឮកផងដែរថា រាជរដ្ឋាភិបាលកម្ពុជាស្វាគមន៍ចំពោះការវិនិយោគធនធានរ៉ែ ដើម្បីចូលរួមចំណែកចំពោះតម្រូវការនៃការអភិវឌ្ឍសេដ្ឋកិច្ច តែការប្រកបអាជីវកម្មនោះត្រូវគោរពតាមបទដ្ឋានបច្ចេកទេស មិនត្រូវធ្វើឱ្យប៉ះពាល់ដល់សហគមន៍ ជីវភាព និងសុខុមាលភាពប្រជាពលរដ្ឋឡើយ។ចំពោះបញ្ហានេះ ក្រុមការងារនឹងបន្តតាមដានយ៉ាងយកចិត្តទុកដាក់បំផុតចំពោះការអនុវត្តនូវកិច្ចព្រមព្រៀងខាងលើ ធ្វើយ៉ាងណាដើម្បីធានាអោយបាននូវភាព «ឈ្នះ ឈ្នះ» សម្រាប់ភាគីទាំងអស់នៅក្នុងរឿងនេះផងដែរ។

សូមបញ្ជាក់ថា ក្រោយកិច្ចប្រជុំនៅសាលាខេត្ដម្ចាស់អាជីវកម្មការដ្ឋានប្រមូលធនធានរ៉ែមួយចំនួននៅតែបន្ដធ្វើការដឹកជញ្ជូនធនធានរ៉ែថ្មចេញពីការដ្ឋានផ្ទុយ និងល្មើសស្មារតីអង្គប្រជុំ កងកម្លាំងនគរបាលបានចេញប្រតិបត្ដិការក្ដៅតាមចាប់រថយន្ដទាំងនោះតែម្តង៕