ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានកំពុងកសាងសំណុំរឿងប្តឹងម្ចាស់សិប្បកម្មផលិតឥដ្ឋនៅខេត្តកណ្ដាលដែលបណ្តាលឲ្យកុមារីម្នាក់ជួបគ្រោះថ្នាក់ដាច់ដៃ។
សូមរំលឹកថាកាលពីថ្ងៃទី៩ខែមីនាឆ្នាំ២០១៩មាន កុមារីអាយុ១០ឆ្នាំម្នាក់ ដែលជាកូនរបស់កម្មករឡឥដ្ឋ បានជួបគ្រោះថ្នាក់នៅសិប្បកម្មផលិតឥដ្ឋរបស់ម្ចាស់ឈ្មោះ លាង ស្រ៊ុន ក្នុងឃុំព្រះប្រសប់ ស្រុកខ្សាច់កណ្ដាល ខេត្តកណ្ដាល ដោយធ្វើឲ្យកុមារីរូបនោះ បានដាច់ដៃចូលក្នុងម៉ាស៊ីនផលិតឥដ្ឋ។
យោងតាមសេចក្ដីប្រកាសព័ត៌មានរបស់ក្រសួងចុះថ្ងៃទី១១ខែមីនាកន្លងទៅនេះបានឲ្យដឹងថាក្រោយពីទទួលបានព័ត៌មាននេះភ្លាមក្រសួងបានចាត់ក្រុមអធិការកិច្ចការងាររបស់ក្រសួងមន្ត្រីបេឡាជាតិរបបសន្តិសុខសង្គមនិងមន្ត្រីមន្ទីរការងារនិងបណ្ដុះបណ្ដាលវិជ្ជាជីវៈខេត្តកណ្តាល ចុះធ្វើការអង្កេតនិងចាត់វិធានការចំពោះសិប្បកម្មផលិតឥដ្ឋនេះដូចខាងក្រោមគឺទី១បានសម្រេចពិន័យសិប្បកម្មផលិតឥដ្ឋមួយនេះស្របតាមមាត្រា ៣៦៨នៃច្បាប់ការងារ និងកសាងសំណុំរឿងព្រហ្មទណ្ឌលើម្ចាស់សិប្បកម្មនេះ អំពីករណីប្រើប្រាស់ពលកម្មកុមារ និងខ្វះវិធានការការពារសុវត្ថិភាពកុមារ មិនឲ្យចូលកៀកទៅកន្លែងខ្សែសង្វាក់ផលិតកម្ម។
ក្រសួងការងារបានឲ្យដឹងទៀតថា កុមារីរងគ្រោះទទួលបានការគាំទ្រពីរបបសន្តិសុខសង្គម ដូចជា ការព្យាបាលរបួស សេវាស្ដារនីតិសម្បទាឡើងវិញ ប្រាក់ឧបត្ថម្ភសម្រាប់ការបាត់បង់សមត្ថភាពអចិន្ត្រៃយ៍មួយជីវិត និងប្រាក់ឧបត្ថម្ភអំឡុងពេលព្យាបាលរបួស។
ជាមួយគ្នានេះដែរក្រសួងបានក្រើនរំលឹកដល់ម្ចាស់សិប្បកម្មផលិតឥដ្ឋ សហគ្រាស គ្រឹះស្ថានទាំងអស់ ត្រូវការប្រើប្រាស់កម្លាំងពលកម្មកុមារឲ្យបានត្រឹមត្រូវតាមប្រកាសលេខ៣០៩ ក.ប/ប្រ.ក ចុះថ្ងៃទី១៤ ខែធ្នូ ឆ្នាំ២០០៧ ស្ដីពីលក្ខខណ្ឌការងារ និងជីវភាពរស់នៅក្នុងសហគ្រាសឡឥដ្ឋហើយការប្រើប្រាស់កុមារអាយុក្រោម១២ឆ្នាំ គឺជាបទល្មើសព្រហ្មទណ្ឌ។
ទន្ទឹមនឹងនេះចំពោះការប្រើប្រាស់ពលកម្មកុមារអាយុក្រោម១៨ឆ្នាំនៅតាមមណ្ឌលហប់ ទីខ្ពស់ និងកន្លែងដែលមានប្រើប្រាស់សាធាតុគីមីត្រូវហាមឃាត់ ហើយក្រសួងនឹងចាត់វិធានការតឹងរ៉ឹងទាំងផ្នែករដ្ឋប្បវេណី និងព្រហ្មទណ្ឌចំពោះសិប្បកម្មឡឥដ្ឋ សហគ្រាស គ្រឹះស្ថានដែលល្មើសនឹងករណីខាងលើនេះ៕
Source: Kampuchea Thmey Daily
0 Comments