ស្នងការខេត្តស្វាយរៀង មានស្នាដៃកសាងអង្គភាពបានល្អប្រសើរ គួរឲ្យមោទនភាពក្រៃលែង

Cambodia News March 22, 2019

ស្វាយរៀង ៖ ស្នងការដ្ឋាននគរបាលខេត្តស្វាយរៀង ដែលមានលោកឧត្ដមសេនីយ៍ទោ កឹង ឃន ជាស្នងការនគរបាលខេត្ត ដឹកនាំរក្សាសន្តិសុខសណ្ដាប់ធ្នាប់ បានល្អ ផ្ដល់ភាពកក់ក្ដៅជូនប្រជាពលរដ្ឋពិសេសមានគំនិតច្នៃប្រឌិត កសាងអង្គភាពមានអគារការិយាល័យ ធ្វើការងារបានគ្រប់ផែនទាំងអស់រួមទាំងប្រជុំដ៏ធំខ្នងផងដែរ។

ជាក់ស្ដែង កាលពីព្រឹកថ្ងៃទី១៨ ខែមីនា ឆ្នាំ២០១៩នេះ លោកឧត្ដមសេនីយ៍ទោ កឹង ឃន ស្នងការនគរបាលខេត្ត រួមជាមួយលោកឧត្ដមសេនីយ៍ត្រី នុត នន្ទ មេបញ្ជាការរងកងរាជអាវុធហត្ថខេត្ត តំណាងលោកឧត្ដមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្ត លោក នៃ ស អភិបាលរងស្រុក តំណាងលោកអភិបាលស្រុករំដួល បានអញ្ជើញជាអធិបតីក្នុងពិធីក្រុងពាលី បញ្ចុះបឋមសីលា សាងសង់អគារប៉ុស្តិ៍នគរបាលរដ្ឋបាលកំពង់ចក នៃអធិការដ្ឋាននគរបាលស្រុករំដួល ស្ថិតនៅក្នុងភូមិចក ឃុំកំពង់ចក ស្រុករំដួល។ ដីសាងសង់ទំហំ ២៦,៦០ x៦០ ម៉ែត្រ ចំណាយចាក់ដីអស់តម្លៃ ១៩,៥០០ដុល្លារ និងអគារប៉ុស្តិ៍ទំហំ ៧,៧x១៣ ម៉ែត្រ តម្លៃ១៥.០០០ដុល្លារ សរុបទឹកប្រាក់ ៣៤.៥០០ដុល្លារ ជាអំណោយរបស់លោកឧត្ដមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្ត។

ពិធីនេះមានការអញ្ជើញចូលរួមជាសាក្សីពី លោក លោកស្រីស្នងការរង លោកមេបញ្ជាការរងកងរាជអាវុធហត្ថខេត្ត លោកអនុប្រធានសេនាធិការ លោកអនុប្រធានការិយាល័យកណ្តាល លោក លោកស្រី នាយ នាយរងការិយាល័យ លោកមេបញ្ជាការមូលដ្ឋានអាវុធហត្ថស្រុករំដួល លោកអធិការ អធិការរងស្រុករំដួល លោកនាយប៉ុស្តិ៍ និងមន្ត្រីនគរបាលប៉ុស្តិ៍ ជាច្រើនរូបទៀត។

មន្ត្រីនគរបាលជាច្រើនរូបបានឲ្យដឹងថា ចាប់តាំងពីលោកឧត្ដមសេនីយ៍ទោ កឹង ឃន ឡើងជាស្នងការមកនៅក្នុងបរិវេណស្នងការដ្ឋាននគរបាលខេត្តស្វាយរៀងកសាងទាំងអស់រួមមាន ៖ អគារការិយាល័យគ្រប់ការិយាល័យដែលចំណុះស្នងការដ្ឋាន ត្រូវបានស្ថាបនាហើយទាំងអស់តែម្ដង។

ប្រភពនោះបន្តថា ក្រៅពីនេះ អគារការិយាល័យអធិការដ្ឋាននគរបាលស្រុក ក្រុងទាំង៨ កសាងបានដោយឡែកអធិការដ្ឋាននគរបាលក្រុងស្វាយរៀង កំពុងកសាងជិតរួចរាល់ហើយដែរ។ ចំណែកប៉ុស្តិ៍រដ្ឋបាលវិញ នៅស្រុករមាសហែកប៉ុស្តិ៍រដ្ឋបាល១៦ប៉ុស្តិ៍ ត្រូវបានកសាងរួចរាល់ហើយៗកំពុងកសាងបន្តទៀត។

ក្រោមដឹកនាំរបស់លោកស្នងការប្រកបដោយគំនិតច្នៃប្រឌិតខ្ពស់ធ្វើឲ្យកម្លាំងនគរបាលក្រោមឱវាទនិងថ្នាក់ដឹកនាំគ្រប់ថ្នាក់ គាំទ្រកោតសរសើរថា ថ្នាក់ដឹកនាំគ្រប់លក្ខណៈគ្រប់យ៉ាង៕