រតនគិរី ៖ យុវជនម្នាក់ ខណៈយកគ្រាប់រំសេវផាវមកកែច្នៃបោកត្រី បានភ្លាត់ស្នៀត ត្រូវខ្លួនឯងរងរបួសធ្ងន់ធ្ងរ។
ករណីផ្ទុះគ្រាប់កែច្នៃនេះបានកើតឡើងនៅវេលាម៉ោង១០និង២៥នាទីព្រឹក ថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៩ ខែមីនា ឆ្នាំ២០១៩ ចំណុចដងទន្លេសេសាន ស្ថិតនៅក្នុងភូមិសាស្ត្រភូមិប៉ាតាង ឃុំសេសាន ស្រុកអូរយ៉ាដាវ។
មន្ត្រីនគរបាលស្រុកអូរយ៉ាដាវបានឲ្យដឹងថា ជនរងគ្រោះមានឈ្មោះ រម៉ាស ធាន់ ភេទប្រុស អាយុ២៥ឆ្នាំ ជនជាតិច្រាយ រស់នៅភូមិ/ឃុំ កើតហេតុខាងលើ រងរបួសធ្ងន់ បែកភ្នែកខាងស្តាំ ដាច់ប្រអប់ដៃខាងឆ្វេង និងត្រង់ភ្លៅខាងឆ្វេងផងដែរ។
ក្រោយពេលកើតហេតុ ជនរងគ្រោះ ត្រូវបានក្រុមគ្រួសារដឹកបញ្ជូនមកសង្គ្រោះបន្ទាន់នៅមណ្ឌលសុខភាពស្រុកអូរយ៉ាដាវ ដើម្បីជួយសង្គ្រោះភ្លាមៗផងដែរ។
សូមបញ្ជាក់ថា ករណីផ្ទុះគ្រាប់កែច្នៃបោកត្រីធ្វើអំពីរំសេវផាវនេះ កន្លងមកមានប្រជាពលរដ្ឋបានរងរបួសជាបន្តបន្ទាប់ ដោយសារករណីខាងលើនេះ ប៉ុន្តែអាជ្ញាធរមូលដ្ឋានពុំមានចំណាត់ទាល់តែសោះទៅលើពលរដ្ឋដែលបានប្រើប្រាស់គ្រាប់បែកកែច្នៃមួយនេះ។ ឬមួយអាជ្ញាធរមូលដ្ឋានទាំងនោះអសមត្ថភាពក្នុងការគ្រប់គ្រង?៕
Source: Kampuchea Thmey Daily
0 Comments