កំពង់ចាម ៖ បុរសម្នាក់ ត្រូវបានសមត្ថកិច្ចចាប់ខ្លួន ក្រោយពីប្រើហិង្សា វាយប្រហារភរិយារបស់ខ្លួនរហូតដល់ស្លាប់ ព្រោះតែប្រច័ណ្ឌ។
ប៉ូលិសបានអោយដឹងថា នៅថ្ងៃទី២៣ ខែមីនា ឆ្នាំ២០១៩ វេលាម៉ោង១៩ និង០០នាទី លោកអនុសេនីយ៍ឯក ម៉ួង ម៉ង់ឌី នាយប៉ុស្តិ៍នគរបាលរដ្ឋបាលជយោ បានទទួលព័ត៌មានថា នៅចំណុចផ្ទះឈ្មោះ ឃុត ផុន ភេទស្រី អាយុ៧៧ឆ្នាំ ក្នុងភូមិត្រពាំងល្ពៅ ឃុំជយោ ស្រុកចំការលើ មានករណីឃាតកម្ម កើតឡើង។
ប៉ូលិសបានបន្តថា ក្រោយពីបានទទួលព័ត៌មានភ្លាម កម្លាំងជំនាញព្រហ្មទណ្ឌ នៃអធិការដ្ឋាននគរបាលស្រុកចំការលើ ដឹកនាំដោយលោកវរសេនីយ៍ទោ ប៉ែន ទៀងចំរើន អធិការនគរបាលស្រុកចំការលើ សហការជាមួយកម្លាំងប៉ុស្តិ៍ជយោ ចុះស្រាវជ្រាវដល់កន្លែងកើតហេតុ ស្រាវជ្រាវករណីឃាកម្ម នៅចំណុចខាងលើ។
ប៉ូលិសបានបន្តថា ករណីខាងលើនេះ កើតឡើងកាលពីថ្ងៃនៅថ្ងៃទី២៣ ខែមីនា ឆ្នាំ២០១៩ វេលាម៉ោង១៨និង៤៥នាទី ប្រព្រឹត្តដោយជនសង្ស័យឈ្មោះ ច្រិច ដន ភេទប្រុស អាយុ៣៥ឆ្នាំ ជាតិខ្មែរ (ជាប្តី) នៅភូមិត្រពាំងល្ពៅ ឃុំជយោ ស្រុកចំការលើ បានយកដំបងឈើ វាយទៅលើជនរងគ្រោះ(ជាប្រពន្ធ) ឈ្មោះ ចន ថា អាយុ៣៨ឆ្នាំ ជាតិខ្មែរ បណ្តាលអោយរបួសក្បាល និងដងខ្លួនជាច្រើនកន្លែងរហូតដល់ស្លាប់។
ក្រោយធ្វើសកម្មភាពរួច ជនសង្ស័យបានរត់គេចខ្លួន បន្ទាប់មកកម្លាំងសមត្ថកិច្ចយើងបានធ្វើការស្រាវជ្រាវរកជនសង្ស័យរហូតដល់ម៉ោង២០ និង០០នាទីថ្ងៃដដែល បានធ្វើការឃាត់ខ្លួនជនសង្ស័យខាងលើ នៅចំណុចលើផ្លូវខេត្តលេខ២២២ ក្នុងភូមិត្រពាំងល្ពៅ ឃុំជយោ។ បន្ទាប់មកយើងបាននាំជនសង្ស័យខាងលើមកអធិការដ្ឋាននគរបាលស្រុកចំការលើ ដើម្បីកសាងសំណុំរឿងតាមនីតិវិធី។
តាមចម្លើយសារភាពរបស់ជនសង្ស័យ បានអោយដឹងថា ខ្លួនផឹកស្រាស្រវឹង ហើយមានទំនាស់ជាមួយប្រពន្ធ ដោយសាររឿង (ប្រច័ណ្ឌ) ក៏ជ្រុលដៃវាយប្រពន្ធរហូតដល់ស្លាប់៕
Source: Kampuchea Thmey Daily
0 Comments