នាយករដ្ឋមន្ត្រី​នូ​វែ​ល​ហ្សេ​ឡង់​ប្តេជ្ញា​មិន​និយាយ​អំពី​ឈ្មោះ​របស់​ឃាតក

នាយករដ្ឋមន្ត្រី​ប្រទេស​នូ​វែ​ល​ហ្សេ​ឡង់​លោកស្រី Jacinda Ardern បាន​ប្តេជ្ញា​កាលពី​ថ្ងៃ​អង្គា​រថា​នឹងមិន​និយាយ​ពី​ឈ្មោះ​របស់​ខ្មាន់កាំភ្លើង​ដែល​វាយប្រហារ​នៅ​វិហារ​ឥស្លាម​ពីរ​កន្លែង​ទេ ​ខណៈពេល​លោកស្រី​បើក​សម័យប្រជុំ​សភា​មួយ​ជាមួយនឹង​សារ​សន្តិភាព​ដល់​ជន​មូស្លីម​។​

លោកស្រី Ardern បាន​សន្យាថា “​ខ្មាន់កាំភ្លើង​នឹងត្រូវ​ប្រឈម​នឹង​ច្បាប់​ពេញលេញ​ក្នុងប្រទេស​នូ​វែ​ល​ហ្សេ​ឡង់​”​។

លោកស្រី​បាន​ប្រាប់​សមាជិកសភា​អំពី​ជនជាតិ​អូស្ដ្រាលី​អាយុ​២៨​ឆ្នាំ​ដែល​រង​ការចោទប្រកាន់​វាយប្រហារ​នេះ​ថា “​គាត់​បាន​ស្វែងរក​អ្វី​ជាច្រើន​ពី​ទង្វើ​ភេរវកម្ម​របស់គាត់​ប៉ុន្តែ​អ្វី​តែមួយ​នោះ​គឺជា​ការ​ថ្កោលទោស​។ នោះ​ហើយ​ជា​មូល​ហេតុដែល​អ្នក​មិនដែល​លឺ​ខ្ញុំ​និយាយ​ពី​ឈ្មោះ​របស់គាត់​។ គាត់​គឺជា​ភេរវជន​។ គាត់​គឺជា​ឧក្រិដ្ឋជន​។ គាត់​គឺជា​អ្នក​ជ្រុលនិយម​។ ប៉ុន្តែ​នៅពេល​ខ្ញុំ​និយាយ គាត់​នឹងមិន​ត្រូវបាន​បញ្ចេញ​ឈ្មោះ​ទេ​។ ខ្ញុំ​សូម​អង្វរ​អ្នក និយាយ​ពី​ឈ្មោះ​របស់​អ្នក​ដែល​បាន​បាត់បង់​ជីវិត​ជាជាង​ឈ្មោះ​របស់​បុរស​ដែល​បាន​យក​ជីវិត​របស់​ពួកគេ​”​។​

មេដឹកនាំ​វ័យ​៣៨​ឆ្នាំ​រូបនេះ​បាន​បើក​សុន្ទរកថា​របស់លោក​ស្រី​នៅក្នុង​សភា​ជាមួយ​និមិត្តសញ្ញា​នៃ​ការស្វាគមន៍​ដែល​បានប្រកាស​ទូទាំង​ពិភព​ឥស្លាម​។​
​លោកស្រី​និយាយថា “​សូម​ឲ្យ​សន្តិភាព ក្តីមេត្តា​ករុណា​និង​ពរជ័យ​របស់​ព្រះ​អាឡោះ​នឹង​នៅ​ជាមួយ​អ្នក​ផងដែរ​”​។​

លោកស្រី​បាន​បិទ​សុន្ទរកថា​របស់លោក​ស្រី​ដោយ​កត់សម្គាល់ថា “​នៅ​ថ្ងៃ​សុក្រ​ដែលមាន​រយៈពេល​មួយ​សប្តាហ៍​ចាប់តាំងពី​ការវាយប្រហារ​មក សមាជិក​នៃ​សហគមន៍​មូស្លីម​នឹង​ប្រមូល​ផ្តុំគ្នា​សម្រាប់​ការថ្វាយ​បង្គំ​នៅថ្ងៃនោះ​។ សូម​ឲ្យ​យើង​ដឹង​អំពី​ទុក្ខសោក​របស់​ពួកគេ​”​។​

មតិយោបល់​របស់លោក​ស្រី​បាន​កើតឡើង​ខណៈដែល​សាច់ញាតិ​រាប់សិប​នាក់​នៃ​អ្នកស្លាប់​បានចាប់ផ្តើម​ធ្វើដំណើរ​ម​ក​ពី​ជុំវិញ​ពិភពលោក​មុន​ពិធី​បុណ្យសព​។​
​រហូតមកដល់​ពេលនេះ ដំណើរ​យឺតយ៉ាវ​នៃ​ការកំណត់​អត្តសញ្ញាណ​និង​ឯកសារ​វេជ្ជសាស្ត្រ​បានធ្វើ​ឲ្យ​ការ​បញ្ចុះសព​មិនអាច​ធ្វើទៅ​រួចហើយ​បង្កើន​ទុក្ខព្រួយ​ដល់​ក្រុមគ្រួសារ​។​

គួរ​បញ្ជាក់ថា បន្ទាប់ពី​ការបាញ់ប្រហារ​សម្លាប់រ​ង្គា​ល​នេះ លោកស្រី Ardern បាន​សន្យាថា​នឹងធ្វើ​កំណែទម្រង់​ច្បាប់​កាំភ្លើង​របស់​ប្រទេស​នូ​វែ​ល​ហ្សេ​ឡង់​៕ AFP

​

Source: Kampuchea Thmey Daily