ស្ទឹងត្រែង ៖ ថ្នាក់ដឹកនាំក្រសួងវប្បធម៌និងវិចិត្រសិល្បៈ បានស្នើឲ្យមន្ទីរវប្បធម៌ខេត្តស្ទឹងត្រែងបំផុសស្មារតីដល់យុវជនជំនាន់ក្រោយ ឲ្យថែរក្សានិងអភិរក្សសម្បត្តិវប្បធម៌ខ្មែរ ពិសេសសម្បត្តិវប្បធម៌ក្នុងភូមិសាស្ត្រឲ្យនៅគង់វង្ស និងចៀសវាងកុំឲ្យនាំគ្នាចម្លងយកវប្បធម៌បរទេស។
ក្នុងទិវាវប្បធម៌ជាតិលើកទី២១ នៅសាលាខេត្តស្ទឹងត្រែងកាលពីថ្មីៗនេះ ឯកឧត្តម ហ៊ឺ.វីរៈ រដ្ឋលេខាធិការក្រសួងវប្បធម៌និងវិចិត្រសិល្បៈ បានស្នើឲ្យមានការចូលរួមថែរក្សាសម្បត្តិវប្បធម៌រាប់បញ្ចូលទាំងវប្បធម៌រូបិយ និងអរូបិយ មានដូចជាអក្សរសាស្ត្រ រូបចម្លាក់ ក្បាច់ផ្កាភ្ញី សំលៀកបំពាក់ របាំ ល្ខោន ចម្រៀងបុរាណ សម័យ ជាដើម។
ឯកឧត្តមពន្យល់ថា ការអភិរក្សសម្បត្តិវប្បធម៌ក្នុងភូមិសាស្ត្រនេះ ធ្វើឡើងរួមមានស្នាដៃបទចម្រៀងអធិរាជស៊ីន ស៊ីសាមុត ក៏ជាចំណែកមួយនៃវប្បធម៌របស់ខ្មែរផងដែរ។ ជាងនេះទៀត មន្ត្រីជំនាញពាក់ព័ន្ធនៅតាមមូលដ្ឋាន ដែលមានតំបន់ប្រវត្តិសាស្ត្រ ត្រូវតែបង្កើនកិច្ចសហការជាមួយបងប្អូនប្រជាពលរដ្ឋថែរក្សាកុំឱ្យបាត់បង់សំណាកដើម ព្រោះវាមានសារៈសំខាន់ដល់ការស្រាវជ្រាវ និងមានប្រយោជន៍បម្រើដល់វិស័យទេសចរណ៍។
លោកស្រីញើច សារឿនប្រធានស្តីទីមន្ទីរវប្បធម៌និងវិចិត្រសិល្បៈ ខេត្តស្ទឹងត្រែង បានលើកឡើងថា កន្លងមកមន្ទីរធ្លាប់បាន ផ្សព្វផ្សាយច្បាប់ពាក់ព័ន្ធ នឹងការអភិរក្សវប្បធម៌ជាញឹកញាប់ដែរ រួមទាំងការរៀបចំទិវាវប្បធម៌ជាតិ ដើម្បីលើកស្ទួយវប្បធម៌ជាតិ ក្រោមប្រធានបទ(យុវជនដើម្បីវប្បធម៌)។
លោកស្រីបន្តថា ៖ នៅឆ្នាំ២០១៩នេះ មន្ទីរបានលើកគម្រោងបន្ថែមលើកស្ទួយតម្លៃសម្បត្តិវប្បធម៌ដូនតាជាពិសេសកេរដំណែលបទចម្រៀងលោក ស៊ីនស៊ីសាមុត ដែលមានដើមកំណើតនៅខេត្តស្ទឹងត្រែង ត្រូវបានក្រសួងវប្បធម៌ចាត់ទុក ជាចំណែកមួយនៃវប្បធម៌ និងបានដាក់ងារជាអធិរាជសំឡេងមាសថែម ទៀតនៅក្នុងសម័យបច្ចុប្បន្ននេះ។
គួររំលឹកថា ៖ កន្លងមក មន្ទីរវប្បធម៌និងវិចិត្រសិល្បៈ សហការគ្នាជាមួយមន្ទីរអប់រំយុវជននិងកីឡាខេត្តរួមទាំងស្ថាប័នពាក់ព័ន្ធ បានផ្សព្វផ្សាយគ្រប់ទម្រង់វប្បធម៌ឲ្យបានទូលំទូលាយរួចមកហើយ ដល់ស្រទាប់យុវជនដើម្បីលើកកម្ពស់សីលធម៌សង្គម និងតម្លៃវប្បធម៌ខ្មែរឲ្យមានកិត្តិនាមកាន់តែល្បីល្បាញថែម ទៀត។
សូមបញ្ជាក់ថា នៅខេត្តស្ទឹងត្រែងក្រៅពីបទចម្រៀងរបស់អធិរាជសំឡេងមាសស៊ីន ស៊ីសាមុត នៅមានតួប្រាសាទសិលាចារិកជាមរតកដូនតា ដែលនៅសេសសល់ចំនួន៩កន្លែង បង្ហាញពីសម្បត្តិវប្បធម៌ក្នុងភូមិសាស្ត្រ ដែលទាមទារឲ្យមានការថែរក្សានិងអភិរក្សឲ្យនៅគង់វង្ស៕
Source: Kampuchea Thmey Daily
0 Comments