បាត់រថយន្តប្រភេទ៥តោន ពីក្រុងព្រះសីហនុពេលព្រឹក រកឃើញនៅភ្នំពេញពេលរសៀលដោយសារប្រព័ន្ធGPS

Cambodia News March 22, 2019

ភ្នំពេញ ៖ រថយន្តប្រភេទ៥តោនមួយគ្រឿង ត្រូវតៃកុងប្រើល្បិចប្រាប់ម្ចាស់ថា យករថយន្តទៅជួសជុល ស្រាប់តែបាត់មិនអាចទាក់ទងបាន ពេលមើលតាមGPS ក៏ដឹងថា ជនសង្ស័យ បានបើកពីខេត្តព្រះសីហនុ មកដល់ភ្នំពេញ ហើយ ត្រូវម្ចាស់ និងក្រុមគ្រួសារតាមរកឃើញតែរថយន្ត ឯអ្នកបើកបររត់គេចខ្លួនបាត់ស្រមោល។

ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង១និង៤៥នាទីរសៀលថ្ងៃទី២១ ខែមីនា នៅត្រង់ចំណុចមុខក្រុមហ៊ុនផលិតទឹកសុទ្ធវីតាល់ ផ្លូវលេខ៥៩៨ ភូមិទួលថ្ងាន់ សង្កាត់ទួលសង្កែ២ ខណ្ឌឫស្សីកែវ។

ម្ចាស់រថយន្ត ឈ្មោះ ទុំ ចាន់រតនា ភេទប្រុស អាយុ៣១ឆ្នាំ រស់នៅខេត្តព្រះសីហនុ មានស្រុកកំណើតនៅភូមិសូយោង ឃុំសូយោង ស្រុកបារាយណ៍ ខេត្តកំពង់ធំ។ ចំណែករថយន្តដែលជនសង្ស័យប៉ុនប៉ងលួចមិនបានសម្រេចនោះ ម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ3E-0980 ប្រភេទចំណុះ៥តោន អ្នកបើកបរមិនត្រូវបានស្គាល់ឈ្មោះឡើយ ទើបតែចូលធ្វើការបើកបររថយន្តខាងលើបានត្រឹមតែមួយអាទិត្យប៉ុណ្ណោះ។

តាមប្រភពព័ត៌មាននៅកន្លែងកើតហេតុបានឲ្យដឹងថា នៅវេលាព្រឹកថ្ងៃ២១ ខែមីនា ឆ្នាំ២០១៩ ជនសង្ស័យខាងលើ បានប្រាប់ម្ចាស់រថយន្តថា រថយន្តខូច ហើយខ្លួនបានយករថយន្តចេញពីភូមិ១ សង្កាត់១ ក្រុងព្រះសីហនុ ខេត្តព្រះសីហនុ ទៅជួលជុល ក្រោយពីបើករថយន្តចេញមក ជនសង្ស័យបិទទូរស័ព្ទរហូត ទាក់ទងអត់បានសោះ។

ប្រភពបានបន្តថា បន្ទាប់មក ម្ចាស់មានការសង្ស័យ ភ្ញាក់ផ្អើល បាននាំគ្នាដើររកពេញក្រុងព្រះសីហនុ តែរកមិនឃើញ ហើយក៏បានទាក់ទងទៅក្រុមហ៊ុនបង់រំលស់ ព្រោះរថយន្តខាងលើទើបតែបង់រំលស់ មិនទាន់ចប់ ហើយខាងក្រុមហ៊ុនបានភ្ជាប់ប្រព័ន្ធជីភីអេស ភ្ជាប់នឹងរថយន្តនោះ រហូតដល់ម៉ោងកើតហេតុ ខាងក្រុមហ៊ុនបានទាក់ទងមកម្ចាស់ប្រាប់ថា រថយន្តត្រូវបានជនសង្ស័យបើកមកចតចោលនៅចំណុចខាងលើ។ បន្ទាប់មក ម្ចាស់រថយន្ត ក៏បានទាក់ទងមកក្រុមគ្រួសារដែលរស់នៅភ្នំពេញឲ្យទៅមើល ខណៈមកដល់ ក៏ឃើញចតចោលនៅចិញ្ចើមផ្លូវ មានស្នាមដោះស្លាកលេខមុខក្រោយបាត់អស់ ហើយជនសង្ស័យបានគេចខ្លួនបាត់ស្រមោល។

ក្រោយពីឃើញរថយន្ត ក្រុមគ្រួសារបានរត់ប្តឹងសមត្ថកិច្ចប៉ុស្តិ៍ទួលសង្កែ២ ឲ្យចុះពិនិត្យកន្លែងកើតហេតុ ដោយធ្វើសោ បានបើកទ្វារពិនិត្យរកឃើញស្លាកលេខតែមួយសន្លឹក ហើយមួយសន្លឹកទៀតបាត់។ បន្ទាប់មក សមត្ថកិច្ចបានយករថយន្តទៅរក្សាទុកនៅប៉ុស្តិ៍នគរបាលទួលសង្កែ២ ដើម្បីឲ្យម្ចាស់យកឯកសារពាក់ព័ន្ធទៅយករថយន្តត្រឡប់ទៅផ្ទះវិញ៕