ស្ទឹងត្រែង ៖ សម្តេច ពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានក្រើនរំលឹកនៅចំពោះមុខកងកម្លាំងប្រដាប់អាវុធនៅខេត្តស្ទឹងត្រែងឱ្យបង្កើនកិច្ចសហការកាន់តែខ្លាំងឡើងនូវកិច្ចការងារការពារសុខសន្តិភាពជូនជាតិមាតុភូមិ។
ក្នុងពិធីអញ្ជើញចុះសួរសុខទុក្ខ ដល់នាយទាហាន នាយទាហានរង និងពលទាហាន នៃកងកម្លាំងប្រដាប់អាវុធទាំងបី និងមន្ត្រីរាជការស៊ីវិល នៅក្នុងយោធភូមិភាគទី១ ខេត្តស្ទឹងត្រែង នាថ្ងៃទី៧ ខែមីនា ឆ្នាំ២០១៩សម្តេចពិជ័យសេនា ទៀ បាញ់ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ប្រសាសន៍ថា ៖ កងកម្លាំងទាំង៣ និងមន្ត្រីរាជការស៊ីវិលគ្រប់លំដាប់ថ្នាក់ ត្រូវចូលរួមសកម្មថែមទៀត ក្នុងការជួយថែរក្សា សុខសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈ ព្រោះនេះជាសុវត្ថិភាពសង្គម ដែលទាមទារឲ្យមានការចូលរួម ផ្នែកស្មារតីរបស់យើងទាំងអស់គ្នា។
សម្តេចពិជ័យសេនា ទៀ បាញ់ បានមានប្រសាសន៍បន្ថែមថា ៖ ជាងនេះទៀតបងប្អូនប្រជាពលរដ្ឋទាំងអស់ត្រូវ មានជំនឿចិត្តលើការដឹកនាំរបស់ រាជរដ្ឋាភិបាល ដែលដឹកនាំដោយសម្តេចអគ្គមហាសេនាបតីតេជៅហ៊ុនសែនបច្ចុប្បន្នកំពុងបោះជំហានទៅមុខមានភាពរីកចម្រើនធ្វើឱ្យប្រទេសជាតយើងមានកំណើនសេដ្ឋកិច្ច ប្រជាពលរដ្ឋរស់នៅមានជីវភាពធូរធារ។
សម្តេចឧបនាយករដ្ឋមន្ត្រី បានកោតសរសើរ ដល់ស្មារតីកងកម្លាំងទាំងអស់ ដែលបានខិតខំអនុវត្តតួនាទី ភារកិច្ច លើកិច្ចការងារនានា ដែលថ្នាក់លើប្រគល់ជូន ជាពិសេស លើការងារការពារបូរណភាពទឹកដី នៅតាមបណ្តោយខ្សែបន្ទាត់ព្រំដែន បានយ៉ាងល្អប្រសើរ។
ឯកឧត្តម ឧត្តមសេនីយ៍ឯក ហ៊ួត ឈាង មេបញ្ជាការយោធភូមិភាគទី១ មានប្រសាសន៍ថា ៖ នៅតាមបណ្តោយខ្សែបន្ទាត់ព្រំដែនកម្ពុជា-ឡាវ នៅគ្រាបច្ចុប្បន្ននេះ គឺគ្មានអ្វីដែលកើតឡើងគួរឲ្យកត់សម្គាល់នោះទេ។
ឯកឧត្តម ឧត្តមសេនីយ៍ឯក បន្ថែមថា ៖ អ្វីដែលគួរឲ្យកត់សម្គាល់នោះវិញ គឺស្ថានភាពប្រទេសជាតិ មានសុខសន្តិភាពពេញលេញ មានការអភិវឌ្ឍជឿនលឿន ជាលំដាប់ ក្រោមការដឹកនាំប្រកបដោយភាពឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា។
សូមបញ្ជាក់ថា ៖ ក្នុងពិធីជួបសួរសុខទុក្ខនេះ សម្ដេចសេនាពិជ័យឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានឧបត្ថម្ភថវិកាមួយចំនួន ដល់គ្រប់អង្គភាពកងកម្លាំងប្រដាប់អាវុធទាំង៣ នៃយោធភូមិភាគទី១ ខេត្តស្ទឹងត្រែង ផងដែរ៕
Source: Kampuchea Thmey Daily
0 Comments