រតនគិរី ៖ យុវជនម្នាក់ បានបង្កហិង្សាក្នុងគ្រួសារ វាយបំផ្លិចបំផ្លាញទ្រព្យសម្បត្តិក្នុងផ្ទះ អស់មួយចំនួនធំ ថែមទាំងប៉ុនប៉ងសម្លាប់ម្តាយបង្កើតខ្លួនឯងទៀតផង ត្រូវសមត្ថកិច្ចឃាត់ខ្លួន។
ករណីបង្កហិង្សាក្នុងគ្រួសារនេះ បានកើតឡើងកាលពីវេលាម៉ោង៦និង៤០នាទីល្ងាច ថ្ងៃចន្ទ ១៣កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៨ ខែមីនា ឆ្នាំ២០១៩ ស្ថិតក្នុងភូមិកាចក់ ឃុំកក ស្រុកបរកែវ។
មន្ត្រីនគរបាលស្រុកបរកែវបានឲ្យដឹងថា យុវជនដែលបានវាយបំផ្លិចបំផ្លាញទ្រព្យសម្បត្តិ មានឈ្មោះ ទីង ញីន ភេទប្រុស អាយុ២១ឆ្នាំ ជនជាតិទំពួន មានទីលំនៅភូមិ/ឃុំកើតហេតុខាងលើ។
មន្ត្រីនគរបាលបានបន្តថា សម្ភារៈដែលបានខូចខាតរួមមាន ម៉ូតូ១គ្រឿង ធុងបាស១ ទូរស័ព្ទដៃ១គ្រឿង ហើយបានគំរាមដុតលំនៅដ្ឋាន ថែមទាំងប៉ុនប៉ងរកសម្លាប់ម្ដាយបង្កើតមានឈ្មោះ ទីង អ្វែង អាយុ៥៣ឆ្នាំ ជនជាតិទំពួន។
ក្រោយពីសមត្ថកិច្ចមូលដ្ឋានទទួលបានព័ត៌មានរាយការណ៍ពីអាណាព្យាបាលយុវជនរូបនេះមក សមត្ថកិច្ច បានចុះមកអន្តរាគមន៍ធ្វើការឃាត់ខ្លួន និងបញ្ជូនមកកាន់អធិការនគរបាលស្រុកបរកែវដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments