រដ្ឋាភិបាលបារាំងបានបណ្តេញមន្ត្រីប៉ូលិសជាន់ខ្ពស់ម្នាក់នៅក្នុងទីក្រុងប៉ារីសកាលពីថ្ងៃចន្ទ បន្ទាប់ពីមានការធ្វើកូដកម្មចុងសប្តាហ៍ជាថ្មីទៀតក្នុងរដ្ឋធានីនេះ អំឡុងពេលនៃការតវ៉ា "អាវកាក់ពណ៌លឿង"។
ការបរាជ័យរបស់ប៉ូលិសក្នុងការទប់ស្កាត់បាតុកម្មនៅទីក្រុងប៉ារីសកុំឱ្យរាលដាលហួសពីការគ្រប់គ្រងបានប្រែក្លាយទៅជាការយកចិត្តទុកដាក់យ៉ាងខ្លាំងទៅលើយុទ្ធសាស្ត្ររបស់ពួកគេ។
ប៉ូលិសប្រហែល៥,០០០នាក់ត្រូវបានដាក់ពង្រាយនៅរដ្ឋធានីកាលពីថ្ងៃសៅរ៍ហើយវាជាចំនួនច្រើនជាងកុបករដែលបង្កភាពវឹកវរនៅចំពោះមុខប៉ូលិស។
នាយករដ្ឋមន្ត្រីលោក Edouard Philippe បាននិយាយនៅក្នុងសេចក្តីថ្លែងការណ៍តាមទូរទស្សន៍ថា "ព្រឹត្តិការណ៍នៅថ្ងៃសៅរ៍ចុងក្រោយនេះជាពិសេសលើមហាវិថី Champs-Elysees គឺមិនអាចទទួលយកបានទេហើយលោកប្រធានាធិបតីបានស្នើសុំឱ្យរដ្ឋាភិបាលផ្តល់នូវការឆ្លើយតបដែលជាតម្រូវការរបស់ស្ថានការណ៍នេះ" ។
បន្ទាប់ពីបានរិះគន់លើការណែនាំមិនសមរម្យឱ្យកងកម្លាំងសន្តិសុខប្រើប្រាស់គ្រាប់កាំភ្លើងកៅស៊ូ លោកបានប្រកាសថា មេប៉ូលិសក្រុងប៉ារីសឈ្មោះ Michel Delpuech អាយុ ៦៦ ឆ្នាំត្រូវបានបណ្តេញចេញហើយនឹងត្រូវបានគេជំនួសតំណែងនៅថ្ងៃពុធ។
លោកបាននិយាយថា អាជ្ញាធរបារាំងនឹងហាមឃាត់ការប្រមូលផ្តុំគ្នានៅលើហាវិថី Champs-Elysees និងកន្លែងផ្សេងទៀតប្រសិនបើអ្នកបង្ករឿងត្រូវបានគេប្រទះឃើញនៅទីនោះហើយលោកបានបន្ថែមថា ការពិន័យនឹងត្រូវបានបង្កើនពី៣៨ទៅ ១៣៥អឺរ៉ូសម្រាប់អ្នកដែលចូលរួមតវ៉ាដោយគ្មានការអនុញ្ញាត។
អាជីវកម្មជាង១០០ត្រូវបានខូចខាតកាលពីចុងសប្ដាហ៍នៅទីក្រុងប៉ារីសរួមទាំងហាងទំនើបនិងភោជនីយដ្ឋានជាច្រើនកន្លែងផងដែរលើហាវិថី Champs-Elysees៕
Source: Kampuchea Thmey Daily
0 Comments