ពួកជីហាដនិយមក្រុមរដ្ឋឥស្លាមរាប់សិបនាក់បានចាកចេញពីផ្លូវរូងក្រោមដីដើម្បីចុះចាញ់កងកម្លាំងដែលគាំទ្រដោយអាមេរិកនៅភាគខាងកើតប្រទេសស៊ីរីកាលពីថ្ងៃអាទិត្យមួយថ្ងៃបន្ទាប់ពី "រដ្ឋ Caliphate" របស់ពួកគេត្រូវបានគេប្រកាសថា បរាជ័យ។
ជនជាតិឃើដរបស់ស៊ីរីបានព្រមានថា ថ្វីបើមានការរលាយនៃរដ្ឋនេះក៏ដោយប៉ុន្តែពួកជីហាដនិយមបរទេសរាប់ពាន់នាក់ដែលពួកគេឃាត់ឃាំងគឺជាគ្រាប់បែកកំណត់ពេលដែលពិភពលោកចាំបាច់ត្រូវដោះជាបន្ទាន់។
អ្នកយកព័ត៌មាន AFP ម្នាក់បានសង្កេតឃើញមនុស្សរាប់សិបនាក់ដែលភាគច្រើនជាបុរសរត់ចេញពីមូលដ្ឋានជីហាដនៅក្នុងភូមិដាច់ស្រយាល Baghouz ក្បែរព្រំដែនអ៊ីរ៉ាក់ដើម្បីឡើងជិះរថយន្តភីកអាប់។
អ្នកនាំពាក្យជនជាតិឃើដឈ្មោះ Jiaker Amed បាននិយាយថា "ពួកគេគឺជាអ្នកប្រយុទ្ធក្រុម IS ដែលបានចាកចេញពីផ្លូវរូងក្រោមដីហើយបានចុះចាញ់នៅថ្ងៃនេះ" ។ លោក Amed បានបន្ថែមថា "អ្នកខ្លះទៀតនៅតែអាចកំពុងលាក់ខ្លួននៅខាងក្នុង"។
មេដឹកនាំពិភពលោកបានសាទរយ៉ាងឆាប់រហ័សចំពោះការប្រកាសកាលពីថ្ងៃសៅរ៍ដោយកងកម្លាំងប្រជាធិបតេយ្យស៊ីរីដែលដឹកនាំដោយពួកឃើដ។
ប៉ុន្តែមន្ត្រីការបរទេសកំពូលសម្រាប់តំបន់ពាក់កណ្តាលស្វយ័តឃើដបានព្រមានថា សមាជិកក្រុម IS ដែលត្រូវបានចាប់ខ្លួនក្នុងអំឡុងពេលនៃការវាយប្រហារគឺនៅតែបង្កជាការគំរាមកំហែងមួយ។
លោក Abdel Karim Omar បានប្រាប់ AFP ថា “មានយុទ្ធជនរាប់ពាន់នាក់រួមទាំងកុមារនិងស្ត្រីនិងមកពី៥៤ប្រទេសដោយមិនរាប់បញ្ចូលទាំងអ៊ីរ៉ាក់និងស៊ីរីទេដែលជាបន្ទុកដ៏ធ្ងន់ធ្ងរនិងគ្រោះថ្នាក់ដល់យើងនិងសហគមន៍អន្តរជាតិ”។
លោកក៏បានព្រមានពីគ្រោះថ្នាក់ដែលបង្កឡើងដោយបក្សពួករបស់ក្រុម IS ផងដែរ។
SDF កំពុងបន្តអនុវត្តប្រតិបត្តិការដើម្បីកម្ចាត់ជនជីហាដដែលនៅសេសសល់នៅក្នុងតំបន់នោះនិងរកឱ្យឃើញឃ្លាំងសម្ងាត់អាវុធ។
យោងតាម SDF បានឱ្យដឹងថា មនុស្សចំនួន៦៦,០០០នាក់បានចាកចេញពីទឹកដីក្រុម IS ចុងក្រោយចាប់តាំងពីខែមករាមកដែលរួមមានទាំងជនជីហា៥ពាន់នាក់និងសាច់ញាតិ២៤,០០០នាក់របស់ពួកគេផងដែរ៕AFP
Source: Kampuchea Thmey Daily
0 Comments