នៅថ្ងៃចន្ទ នាយករដ្ឋមន្ត្រីចក្រភពអង់គ្លេសលោកស្រី Theresa May បានរៀបចំកិច្ចប្រជុំជាបន្ទាន់មួយនៃគណៈរដ្ឋមន្ត្រីរបស់លោកស្រីចំពេលមានសេចក្តីរាយការណ៍អំពីការប៉ុនប៉ងធ្វើរដ្ឋប្រហារដោយសហសេវិកជុំវិញការចាត់ចែងរបស់លោកស្រីលើ Brexit។
លោកស្រី May នឹងជួបជាមួយរដ្ឋមន្ត្រីជាច្រើនរូបដែលនិយាយថា មានផែនការទម្លាក់លោកស្រីនៅដើមសប្តាហ៍ដ៏សំខាន់មួយផ្សេងទៀតនៅក្នុងការដកខ្លួនរបស់ចក្រភពអង់គ្លេសចេញពីសហភាពអឺរ៉ុបដែលគេនឹងអាចមើលឃើញថា សមាជិកសភានឹងចាប់យកការគ្រប់គ្រងលើដំណើរការនេះពីរដ្ឋាភិបាល។
ក្រុមអ្នកតាក់តែងច្បាប់ត្រូវបានគេកំណត់ថានឹងបោះឆ្នោតនៅល្ងាចថ្ងៃចន្ទនេះថាតើត្រូវបង្ខំឲ្យសភាធ្វើតាមនូវអ្វីដែលគេហៅថា “ការបោះឆ្នោតណែនាំ” ដើម្បីវាស់ស្ទង់ការគាំទ្រសម្រាប់ជម្រើស Brexit ជាច្រើនដែរឬក៏អត់។
ទន្ទឹមនឹងនេះដែរ លោកស្រី May ត្រូវតែសម្រេចចិត្តអំពីពេលវេលាក្នុងការស្នើសុំឲ្យពួកគេបោះឆ្នោតម្តងទៀតលើកិច្ចព្រមព្រៀងលែងលះរបស់លោកស្រីដែលពួកគេបានច្រានចោលទាំងស្រុងចំនួនពីរដងរួចមកហើយ។
ក្រោមកាលវិភាគថ្មីដែលត្រូវបានដាក់ដោយមេដឹកនាំអ៊ឺរ៉ុបកាលពីសប្តាហ៍មុន ឥឡូវនេះលោកស្រីមានពេលរហូតដល់ថ្ងៃទី១២ខែមេសាដើម្បីឈ្នះការគាំទ្ររបស់សមាជិកសភាសម្រាប់កិច្ចព្រមព្រៀងនេះឬត្រូវស្វែងរកជម្រើសដែលអាចសម្រេចបានមួយដែលអាចរាប់បញ្ចូលទាំងការពន្យារពេលដល់ Brexit ផងដែរ។
យោងតាមកាសែត Sunday Times បានឲ្យដឹងថា បន្ទាប់ពីភាពរអាក់រអួលកាលពីសប្តាហ៍មុន លោកស្រី May បានចំណាយពេលចុងសប្ដាហ៍នៅឯលំនៅដ្ឋាន Chequers របស់លោកស្រីស្របពេលមានការប៉ុនប៉ងធ្វើរដ្ឋប្រហារគណៈរដ្ឋមន្ត្រី។
កាសែតនេះបានរាយការណ៍ថា ខ្លួនបាននិយាយទៅកាន់រដ្ឋមន្ត្រីជាន់ខ្ពស់ចំនួន១១រូបដែលបានបញ្ជាក់ថា ពួកគេចង់ឲ្យលោកស្រីនាយករដ្ឋមន្ត្រីបើកផ្លូវសម្រាប់អ្នកដទៃហើយគ្រោងនឹងប្រឈមមុខជាមួយលោកស្រីនៅឯគណៈរដ្ឋមន្ត្រីនៅថ្ងៃចន្ទ។
សភាបានជាប់គាំងអស់រយៈពេលជាច្រើនខែមកហើយជុំវិញ Brexit ដោយសារសមាជិកសភាមិនអាចសម្រេចបានអំពីរបៀបដើម្បីអនុវត្តការបោះឆ្នោតប្រជាមតិឆ្នាំ២០១៦ក្នុងការចាកចេញដែលជាហេតុធ្វើឲ្យមានការបែកបាក់គ្នានៅទូទាំងប្រទេស។
កាលពីថ្ងៃសៅរ៍ ក្រុមអ្នករៀបចំបានប៉ាន់ប្រមាណថា អ្នកគាំទ្រអឺរ៉ុបចំនួន១លាននាក់បានដើរដង្ហែតាមកណ្តាលទីក្រុងឡុងដ៍ដើម្បីទាមទារឲ្យមានការបោះឆ្នោតជាសាធារណៈមួយទៀតលើការចាកចេញពីប្លុកនេះ៕ AFP
Source: Kampuchea Thmey Daily
0 Comments