ភ្នំពេញ ៖ តារាចម្រៀងជាប់ងារជាតារាកំពូលទើសលោក ម៉ៃ សុគន្ធ ដែលទស្សនិកជន តែងបានស្គាល់គ្រប់គ្នារួចមកហើយនោះ ពេលនេះបានចាប់ផ្តើមបញ្ចេញនូវស្នាដៃបទចម្រៀងថ្មីរបស់ខ្លួនជាបន្តបន្ទាប់ដែលជាOriginal Songបង្កឲ្យមានការចាប់អារម្មណ៍ និងគាំទ្រពីសំណាក់មហាជន ដែលធ្លាប់តែរិះគន់លោកនាពេលកន្លងមក។
តាមការកត់សម្គាល់អំឡុងមិនដល់១ខែផងស្រាប់តែតារាចម្រៀងលោក ម៉ៃ សុគន្ធ បានទម្លាយផ្សព្វផ្សាយនូវស្នាដៃចម្រៀងOriginal Songមានចំនួន២បទ។ ខណៈដែលមានទស្សនិកជនមួយចំនួនយល់ឃើញថាតារាប្រុសរូបនេះកំពុងតែចាប់ផ្តើមផ្លាស់ប្តូរឥរិយាបទពីចម្លងបទបរទេសមកសាងស្នាដៃOriginal Songរបស់ខ្លួនវិញ។
ចំពោះចម្រៀងOriginal Song២បទរបស់លោក ម៉ៃ សុគន្ធ ដែលកំពុងតែទទួលបានការចាប់អារម្មណ៍និង គាំទ្រពីមហាជននោះគឺមានបទ វិប្បដិសារីក្មេងគ្រឿងញៀន និងបទ កាលីបស្រុកស្រែ (ដែលជាការនិពន្ធបទភ្លេងថ្មីដោយលោក សុខ រក្សា)។ ជាក់ស្តែងលោក ម៉ៃ សុគន្ធ បានបង្ហោះភ្ជាប់ជាមួយវីដេអូនៃបទចម្រៀងថ្មីរបស់ខ្លួនថា ចេញហើយ កាលីបស្រុកស្រែ យើងហ្នឹងណា……។
ដោយឡែកបើតាមការបង្ហើបរបស់លោក ម៉ៃ សុគន្ធ បាននិយាយថា នេះពុំមែនជាOriginal Songលើកដំបូងរបស់ខ្លួនននោះទេពោលគឺកន្លងមកលោកធ្លាប់មាន២ឬ៣បទមកហើយដែលបានបញ្ចេញផ្សព្វផ្សាយនៅលើបណ្តាញសង្គម។ ម្យ៉ាងទៀតចាប់ពីពេលនេះទៅ លោកនឹងបន្តការចេញចម្រៀង Original Song ជាបន្តបន្ទាប់ដើម្បីបន្សាបការចម្លងបទបរទេសមកច្រៀង ខណៈដែលបច្ចុប្បន្នមហាជនកំពុងឲ្យតម្លៃលើស្នាដៃរបស់កូនខ្មែរ។
តារាចម្រៀងលោក ម៉ៃ សុគន្ធ បានបន្ថែមទៀតថា បើអាចមានឱកាសលោកនឹងធ្វើបទចម្រៀងOriginal Songដើម្បីតម្រូវតាមទីផ្សារសិល្បៈរបស់ខ្មែរនាពេលបច្ចុប្បន្ន ដោយហេតុថាបទចម្រៀងCopyបរទេសមួយរយៈចុងក្រោយនេះ ហាក់ពុំសូវទទួលបានការគាំទ្រនិងឲ្យតម្លៃពីទស្សនិកជនដែលជាអ្នកគាំទ្រនោះឡើយ៕
Source: Kampuchea Thmey Daily
0 Comments