ខេម ប្រកាសឲ្យប្រុងប្រយ័ត្នចំពោះPageក្លែងក្លាយ ដែលយកឈ្មោះនិងរូបភាពខ្លួនទៅបង្កើតក្នុងន័យមិនល្អ

ភ្នំពេញ ៖ តារាចម្រៀងសំឡេងស្អកប្រចាំផលិតកម្មថោនលោក ខេម នារសៀលថ្ងៃទី១២ ខែមីនា ឆ្នាំ២០១៩នេះ បានចេញមុខប្រកាសជាសាធារណៈនៅលើបណ្តាញសង្គមហ្វេសប៊ុករបស់ខ្លួនខណៈដែលមានជនអនាមិក បានលួចយកឈ្មោះនិងរូបភាពរបស់ខ្លួនទៅបង្កើតPageហ្វេសប៊ុកក្នុងន័យមិនល្អ ដើម្បីទាញយកផលប្រយោជន៍ផ្ទាល់ខ្លួន។

ជាការកត់សម្គាល់នេះពុំមែនទើបជាលើកទីមួយដែលទើបកើតមានឡើងចំពោះតែតារាចម្រៀងលោក ខេម នោះទេ ពោលគឺកន្លងមកធ្លាប់មានអ្នកសិល្បៈមួយចំនួនមកហើយ ដែលបានរងគ្រោះតាមរយៈសកម្មភាពនៃការលួចយកឈ្មោះឬរូបថតទៅបង្កើតជាAccount Facebook និង Pageក្លែងក្លាយដោយមានចេតនាបោកប្រាស់ឬកេងយកផលប្រយោជន៍ផ្ទាល់ខ្លួនពីសំណាក់មហាជន។

បើតាមសំណេររៀបរាប់សរសេរភ្ជាប់ជាមួយរូបភាពនៃផេកក្លែងបន្លំលោក ខេម បាននិយាយថាជម្រាបសួរពុកម៉ែបងប្អូនគ្រប់គ្នាថានេះមិនមែនជាផេករបស់ខ្ញុំទេ អញ្ចឹងហើយសូមបងប្អូនជួយស៊ែរហើយកុំយល់ច្រឡំអោយសោះ ក្រែងលពេលណាមួយគាត់ធ្វើរឿងអ្វីមិនល្អហើយមានឈ្មោះខ្ញុំក្នុងនេះ អរគុណ។

ជាមួយនឹងការប្រកាសរបស់សាមីខ្លួនលោក ខេម ខាងលើនេះដែរ ភា្លមៗនោះ បានធ្វើឲ្យអ្នកគាំទ្រមួយចំនួនបានលើកឡើងថា ខ្ញុំឆ្ងល់ណាស់អូន អត់មានរូបនិងឈ្មោះទេអីបានជាចូលចិត្តយករូបនិងឈ្មោះគេ។ គិតអញ្ចឹងដែរខ្ញុំខំComment អត់តបសោះឃើញអ្នក Comment ផ្សេង បងនិយាយផ្សេង គិតថាផេកហ្នឹងដឹងតែមិនមែនបង…..។

សូមបញ្ជាក់ថា ករណីនេះមិនមែនកើតមានចំពោះតែតារាចម្រៀងឬសម្តែងនោះទេគឺសូម្បីតែមជ្ឈដ្ឋានមហាជនឬមន្ត្រីនៃថ្នាក់ដឹកនាំមួយចំនួនក៏តែងតែជួបប្រទះនូវបញ្ហានៃការលួចយក Account Facebook និងការបង្កើត Account Facebookដើម្បីក្លែងបន្លំតាមរយៈរូបភាពបោកប្រាស់ផ្សេងៗផងដែរ៕