ភ្នំពេញ ៖ នៅវេលាម៉ោង៨និង៣០នាទីព្រឹក ថ្ងៃទី២៥ ខែមីនា ឆ្នាំ២០១៩ នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា នឹងអញ្ជើញ ជាអធិបតីដ៏ខ្ពង់ខ្ពស់ប្រគល់សញ្ញាប័ត្រដល់និស្សិតសាកលវិទ្យាល័យភ្នំពេញអន្តរជាតិ (PPIU) ១,២៤៥នាក់ នៅវិទ្យាស្ថានជាតិអប់រំ។
របាយការណ៍សាកលវិទ្យាល័យភ្នំពេញអន្តរជាតិបានឲ្យដឹងថា និស្សិត ដែលទទួលសញ្ញាប័ត្រនេះ មាន និស្សិតបញ្ចប់ការសិក្សាកម្រិតបរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់។
ក្នុងចំណោមនិស្សិត ទទួលសញ្ញាប័ត្រនេះមាននិស្សិតអាហារូបករណ៍របស់ សម្ដេចតេជោ ហ៊ុន សែន ៦៦នាក់ (នារី ២៨នាក់) និងនិស្សិតពិការកាយសម្បទាចំនួន៣នាក់។
សូមបញ្ជាក់ថា សាកលវិទ្យាល័យអន្តរជាតិភ្នំពេញ គឺជាគ្រឹះស្ថានអប់រំថ្នាក់ឧត្ដមសិក្សាមានឈ្មោះបោះសំឡេងមួយនៅក្នុងប្រទេសកម្ពុជា និងបានចូលរួម យ៉ាងសកម្មជាមួយរាជរដ្ឋាភិបាលកម្ពុជាក្នុងការបណ្ដុះបណ្ដាលធនធានមនុស្សបំពេញតម្រូវការអភិវឌ្ឍន៍ប្រទេសជាតិ។
ក្នុងឆ្នាំសិក្សា២០១៨-២០១៩ សិស្សថ្នាក់វិជ្ជាជីវៈ និងនិស្សិត កំពុងសិក្សាប្រមាណ៣,៩៧២នាក់ ក្នុងនោះនារី ២,១១២នាក់ ក្នុងនោះ និស្សិតបរទេសសិក្សាថ្នាក់បរិញ្ញាបត្រចំនួន១៤នាក់ (នារី៨នាក់) មាន ជនជាតិថៃ៥នាក់ នារី៤នាក់, ឥណ្ឌូណេស៊ី៣នាក់ នារី២នាក់, ឡាវ ២នាក់ និងភូមិ ៤នាក់ នារី ២នាក់។ ជាមួយគ្នានេះ និស្សិតសាកលវិទ្យាល័យភ្នំពេញអន្តរជាតិ ៩នាក់ នារី៥នាក់។
ដោយឡែក គិតចាប់ពីឆ្នាំសិក្សា២០០២-២០០៣ ដល់ឆ្នាំសិក្សា ២០១៧-២០១៨កន្លងមកនេះ និស្សិតបញ្ចប់ការសិក្សាសរុបចំនួន១០,០១៥នាក់ ក្នុងនោះនារី៣,៤៧៧នាក់៕
Source: Kampuchea Thmey Daily
0 Comments