រដ្ឋមន្ត្រីក្រសួង​ព័ត៌មាន​ ស្វាគមន៍​ការ​បើក​ការិយាល័យ​វិទ្យុ​VOA​នៅ​កម្ពុជា​ឡើងវិញ

ភ្នំពេញ ៖ លោក​ខៀវ កាញារិទ្ធ រដ្ឋមន្ត្រីក្រសួង​ព័ត៌មាន​នៅតែ​ស្វាគមន៍​ការបើក​ការិយាល័យ​វិទ្យុ​សំឡេង​សហរដ្ឋអាមេរិក​VOA ឡើងវិញ​នៅក្នុង​ប្រទេស​កម្ពុជា ដើម្បី​សម្រួល​ដល់​ដំណើរការ ការងារ​របស់​វិទ្យុ​VOA ក្នុង​ការ​ធ្វើយ៉ាងណា​ឲ្យ អ្នកសារព័ត៌មាន​ទាំងអស់​បាន​បំពេញ កាតព្វកិច្ច​របស់ខ្លួន​បាន​ទៅ​ដោយ​រលូន​និង​វិជ្ជាជីវៈ។

ក្នុង​ឱកាស​ទទួល​ជួបពិភាក្សា​ការងារ​ជាមួយ​លោក Mehmood Kazmi ប្រធាន​ផ្នែក​អភិវឌ្ឍន៍​ពាណិជ្ជកម្ម​នៃ US Agency for Global Media នៅ​ក្រសួង​ព័ត៌មាន កាលពី​ថ្ងៃទី​២២ ខែមីនា ឆ្នាំ​២០១៩ កន្លងទៅនេះ លោក ខៀវ កាញារីទ្ធ រដ្ឋមន្ត្រី ក្រសួង​ព័ត៌មាន បាន​បញ្ជាក់​ថា ក្នុង​រយៈពេល​កន្លងមក​នេះ ក្រសួង​ព័ត៌មាន​កម្ពុជា បាន​សំដែង​នូវ​ការ​ស្វាគមន៍ ហើយ​តែងតែមាន​ការសម្រួល ដល់​ដំណើរការ របស់​វិទ្យុ​VOA ក្នុង​ការ​ធ្វើ​យ៉ាងណា​អោយ អ្នកសារព័ត៌មាន​ទាំងអស់​បាន​បំពេញ​កាតព្វកិច្ច​របស់​ខ្លួន​បាន​ទៅ​ដោយ​រលូន​។

លោក​បាន​បន្ត​ថា ទាក់ទង​និង​បញ្ហា​ពន្ធដារ ជាមួយ​វិទ្យុ​VOA គឺជា​រឿង​ផ្សេង​ដាច់ដោយឡែក ពី​ក្រសួង​ព័ត៌មាន ប៉ុន្តែ​បើ​តាម​ដឹង​VOA បាន​នឹង​កំពុងតែ ធ្វើ​កិច្ចការ​នេះ​ជាមួយ​ខាង​ពន្ធដារ​ហើយ។

គួរ​រំលឹក​ថា បញ្ហា​មិន​បង់​ពន្ធដារ​របស់​វិទ្យុ​VOA និង​កាសែត​ឌឺ​ខាំ​បូ​ឌា​ដេលី អគ្គនាយកដ្ឋាន​ពន្ធដារ​បាន​ដាក់​ពាក្យបណ្ដឹង​ទៅ​សាលាដំបូង​រាជធានី​ភ្នំពេញ​ហើយ ប៉ុន្តែ​តុលាការ​មិនទាន់​ចាត់ការ​យ៉ាងដូចម្ដេច​ទេ ដោយ​ត្រូវ​ទុក​ពេល​វេលា​អោយ​គូរ​ភាគី​សម្របសម្រួល​ដើម្បី​បំពេញ​កាតព្វកិច្ច​បង់ពន្ធ​សិន៕

Source: Kampuchea Thmey Daily