ភ្នំពេញ ៖ ប្រធាននាយកប្រតិបត្តិធនាគារ អេស៊ីលីដារំពឹងថា នៅឆ្នាំ២០១៩នេះ ធនាគារអេស៊ីលីដានឹងទទួលបានប្រាក់ចំណេញកើនដល់ជាង១០០លានដុល្លារអាមេរិក ខណៈឆ្នាំ២០១៨កន្លងទៅធនាគារទទួលបានប្រាក់ចំណេញប្រមាណជាង៨៤លានដុល្លារអាមេរិកប៉ុណ្ណោះ។
ថ្លែងប្រាប់ក្រុមអ្នកយកព័ត៌មានក្រោយចូលរួមពិធីសូត្រមន្ត ប្រោសព្រំលើករាសី និងរៀបចំពិធីជប់លៀងអបអរសាទរក្នុងឱកាសបុណ្យចូលឆ្នាំប្រពៃណីជាតិខ្មែរជូនបុគ្គលិកនិងអតិថិជនរបស់ខ្លួនកាលពីល្ងាចថ្ងៃទី០៦ ខែមេសា ឆ្នាំ២០១៩ លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានមានប្រសាសន៍ថា«យើងនឹងអាចសម្រេចបានតាមផែនការតាមការគ្រោងទុកដោយទទួលបានប្រាក់ចំណេញប្រមាណជាង១០០លានដុល្លាសហរដ្ឋអាមេរិក ដោយមិនមានបញ្ហាអីទេដោយសារតែស្ថានភាពសេដ្ឋកិច្ចមានអំណោយផល»។
លោកបណ្ឌិតបានបន្តថាជាក់ស្តែង នៅដើមឆ្នាំ២០១៩នេះ សន្ទុះនៃការរីកចម្រើនរបស់អេស៊ីលីដា មានការរីកចម្រើនខ្លាំងបើធៀបនឹងឆ្នាំមុនៗ ដោយសារការរីកលូតលាស់នៃសេដ្ឋកិច្ចរបស់កម្ពុជា ដែលក្នុងឆ្នាំ២០១៨ មានកំណើនខ្ពស់ខ្លាំង រហូតដល់៧.៥ភាគរយ ហើយសម្រាប់ឆ្នាំ២០១៩នេះ អាចមានកំណើនជាង៧ភាគរយទៀត។
លោកបណ្ឌិត អ៊ិន ចាន់នីបាន បន្តទៀតថា ទោះបីជាបច្ចុប្បន្នកម្ពុជាជួបបញ្ហាខ្វះខាតការផ្គត់ផ្គង់អគ្គិសនីនៅរដូវប្រាំងនេះក៏ដោយក៏មិនមានប៉ះពាល់ដល់ប្រតិបត្តិការរបស់អេស៊ីលីដានោះដែរដោយសារតែនៅគ្រប់សាខាទាំងអស់ មានបំពាក់ម៉ាស៊ីនភ្លើងសម្រាប់គាំទ្រប្រតិបត្តិការ គឺមិនមានការអាក់ខានអ្វីឡើយ។
ទាក់ទិននឹងពិធីសូត្រមន្ត ប្រោសព្រំលើករាសី និងរៀបចំពិធីជប់លៀងអបអរសាទរក្នុងឱកាសបុណ្យចូលឆ្នាំប្រពៃណីជាតិខ្មែរជូនបុគ្គលិកនិងអតិថិជនលោកលោកបណ្ឌិត អ៊ិន ចាន់នីបានបញ្ជាក់ថាពិធីនេះរៀបចំឡើងក្នុងគោលបំណង ដើម្បីជួបជុំគ្នាសប្បាយរីករាយ រឹតចំណងសាមគ្គីភាព ក្នុងទំនាក់ទំនងការងារ និងជាការលើកទឹកចិត្តដល់គ្រប់កម្មករនិយោជិតដែលបានខិតខំអស់ពីកម្លាំងកាយចិត្តនិងបញ្ញាស្មារតីបំពេញការងារតាមតួនាទីរបស់ខ្លួនប្រកបដោយជោគជ័យនិងរីកចម្រើនជាបន្តបន្ទាប់។
ជាងនេះទៅទៀតពិធីនេះធ្វើឡើងក៏ដើម្បីរួមរក្សាវប្បធម៌ ប្រពៃណីជាតិខ្មែរដ៏ផូរផង់ឱ្យឋិតឋេរគង់វង្សជានិច្ចនិរន្តរ៍និងជាឱកាសមួយសម្រាប់ឱ្យកម្មករ និយោជិតធនាគារអេស៊ីលីដា ភីអិលស៊ី គ្រប់លំដាប់ថ្នាក់ គ្រប់តួនាទី បានជួបជុំគ្នារីករាយអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក្រោយពីបានខិតខំបំពេញការងារអស់កម្លាំងកាយចិត្តនិងបញ្ញា អស់រយៈពេលពេញមួយឆ្នាំកន្លងមកដើម្បីទទួលបាននូវសិរីមង្គលសេចក្តីសុខចម្រើន ថាមពលថ្មីទាំងអស់គ្នាអំពីទេវតាឆ្នាំថ្មី ។
លោកបណ្ឌិតបន្តថាលើសពីនេះកម្មវិធីនេះក៏ដើម្បីថ្លែងអំណរគុណចំពោះអតិថិជន សាធារណជន និងអាជ្ញាធរគ្រប់លំដាប់ថ្នាក់ដែលបានគាំទ្រយ៉ាងពេញទំហឹងដល់ប្រតិបត្តិការរបស់ធនាគារអេស៊ីលីដាភីអិលស៊ី ។
គួរបញ្ជាក់ថាជារៀងរាល់ឆ្នាំធនាគារអេស៊ីលីដា ភីអិលស៊ី តែងតែរៀបចំកម្មវិធីអបអរសាទរ បុណ្យចូលឆ្នាំថ្មី ដោយមានការចូលរួមពីសំណាក់កម្មករនិយោជិតគ្រប់លំដាប់ថ្នាក់និងក្រុមគ្រួសារក្នុងគោលបំណងដើម្បីជួបជុំគ្នាសប្បាយរីករាយ រឹតចំណងសាមគ្គីភាពក្នុងទំនាក់ទំនងការងារ និងជាការលើកទឹកចិត្តដល់គ្រប់កម្មករនិយោជិតដែលបានខិតខំអស់ពីកម្លាំងកាយចិត្តនិងបញ្ញាស្មារតីបំពេញការងារតាមតួនាទីរបស់ខ្លួន ប្រកបដោយជោគជ័យនិងរីកចម្រើនជាបន្តបន្ទាប់។
មិនត្រឹមតែប៉ុណ្ណោះធនាគារក៏បានអញ្ជើញអតិថិជនក៏ដូចជាអាជ្ញាធរគ្រប់ជាន់ថ្នាក់ចូលរួមដើម្បីប្រសិទ្ធពរជ័យឆ្នាំថ្មីជាមួយសមាជិកមហាគ្រួសារអេស៊ីលីដា នៅតាមបណ្ដាការិយាល័យសាខានីមួយៗដោយមានកម្មវិធីកំសាន្តសប្បាយ ការរាំកម្សាន្តចង្វាក់ប្រពៃណី និងល្បែងប្រជាប្រិយខ្មែរ ដូចជា លាក់កន្សែង ចោលឈូង ទាញព្រ័ត្រ និងលេងអង្គញ់ជាដើម៕
Source: Kampuchea Thmey Daily
0 Comments