សៀមរាប ៖ សមត្ថកិច្ចមូលដ្ឋាននៃក្រុងសៀមរាបបានឲ្យដឹងថា ជនសង្ស័យម្នាក់ ជាមុខសញ្ញាចាស់ធ្លាប់លួចម៉ូតូជាច្រើនដង និងជាប់គុក៤ដងចេញមកវិញលួចម៉ូតូនៅក្នុងក្រុងសៀមរាប ត្រូវនគរបាលជំនាញ តាមប្រមាញ់នៅថ្ងៃចូលឆ្នាំរហូតឃាត់ខ្លួនតែម្តង។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្ដាលព្រហ្មទណ្ឌ នៃស្នងការដ្ឋានខេត្តសៀមរាប បានឲ្យដឹងថា កម្លាំងនគរបាលជំនាញ បានធ្វើការតាមដានរហូតឈានដល់ឃាត់ខ្លួនជនសង្ស័យម្នាក់ឈ្មោះព្រិន ជឿន ភេទប្រុស អាយុ៣៦ឆ្នាំ ពាក់ព័ន្ធនឹងករណីអំពើលួច(លួចម៉ូតូ) ហើយជាមុខសញ្ញាទើបចេញពីពន្ធនាគារកាលពីថ្ងៃទី២៨ ខែមីនា ឆ្នាំ២០១៩កន្លងទៅថ្មីៗនេះ។ នៅថ្ងៃទី០៦ខែមេសាឆ្នាំ២០១៩ វេលាម៉ោង០៦និង២០នាទីនៅក្នុងបរិវេណហាងយីហោពូ ស្ថិតនៅភូមិវិហារចិន សង្កាត់ស្វាយដង្គំ មានករណីអំពើលួច(លួចម៉ូតូ) បង្កឡើងដោយជនសង្ស័យខាងលើ បានចូលទៅលួចម៉ូតូរបស់ជនរងគ្រោះឈ្មោះម៉ម ឆាលី ភេទប្រុស អាយុ២២ឆ្នាំ រស់នៅភូមិកើតហេតុខាងលើ ម៉ាកហុងដាស្កូពី ពណ៌ស ស៊េរីឆ្នាំ២០១៥ លេខតួលេខម៉ាស៊ីន៨០៤២៩៥៥ រួចជិះគេចខ្លួន។
នៅថ្ងៃទី១៥ ខែមេសា ឆ្នាំ២០១៩ វេលាម៉ោង១៦និង០០នាទី ជនសង្ស័យត្រូវបានកម្លាំងនគរបាលព្រហ្មទណ្ឌកម្រិតធ្ងន់ ឃាត់ខ្លួន រួចប្រគល់ឲ្យអង្គភាពអធិការដ្ឋាននគរបាលក្រុងសៀមរាបសួរនាំបន្ត។ លោកវរសេនីយ៍ទោ នួន ស័ក្តិចំរើនរិទ្ធ អធិការរងទទួលការងារព្រហ្មទណ្ឌក្រុងសៀមរាប បានឲ្យដឹងថា ជនសង្ស័យខាងលើនេះ ធ្លាប់ជាប់គុក៤ដងមកហើយ ករណីលួចម៉ូតូ។ ពេលគេចេញពីគុកមកគឺតែងតែមកលួចបន្តដដែល។ ក្រោយពេលសួរនាំជនសង្ស័យ និងយោងតាមកាមេរ៉ាសុវត្ថិភាពផងនោះ ជនសង្ស័យបានសារភាពថា ខ្លួនពិតជាបានធ្វើសកម្មភាពលួចម៉ូតូរបស់ជនរងគ្រោះ ហើយយកទៅលក់នៅឯស្រុកអន្លង់វែង ខេត្តឧត្តរមានជ័យ ទៅឲ្យមនុស្សប្រុសម្នាក់ ក្នុងតម្លៃ២០០ដុល្លារ។
បច្ចុប្បន្នកម្លាំងនគរបាលជំនាញកំពុងកសាងសំណុំរឿងដើម្បីបញ្ជូនខ្លួនជនសង្ស័យខាងលើនេះ ទៅតុលាការដើម្បីចាត់ការបន្តតាមផ្លូវច្បាប់៕
Source: Kampuchea Thmey Daily
0 Comments