បាត់ដំបង ៖ ជនសង្ស័យ ម្នាក់ដែលជាប់ពាក់ព័ន្ធនឹងករណី ប្លន់កាលពីប្រមាណជាង១៧ឆ្នាំមុន ត្រូវបានកម្លាំងនគរបាលផ្នែកអនុវត្តន៍ដីកានៃស្នងការខេត្តបាត់ដំបងចាប់ខ្លួន នៅវេលាម៉ោង១១ និង ១៥នាទី ថ្ងៃត្រង់ នាថ្ងៃទី១៥ ខែមេសា ឆ្នាំ២០១៩ បន្ទាប់ពីជនសង្ស័យខាងលើ បានបង្ហាញខ្លួននៅនឹងផ្ទះរបស់ខ្លួន ដែលស្ថិតនៅភូមិឆាយបល្ល័ង្ក ឃុំធិបតី ស្រុកគាស់ក្រឡ ក្នុងឱកាសចូលឆ្នាំថ្មីប្រពៃណីខ្មែរ។
តាមការអោយដឹងពីមន្ត្រីផ្នែកអនុវត្តន៍ដីកាបានបញ្ជាក់ថា ជនសង្ស័យ រូបនេះមាន ឈ្មោះ ខាន់ ចន្ថា ភេទប្រុស អាយុ៤១ឆ្នាំ រស់នៅភូមិ ឃុំ ខាងលើ ដោយ ជននេះត្រូវបានចាប់ខ្លួនតាម «ដីកាបង្គាប់ឲ្យចាប់ខ្លួន» លេខ១៧៩ ដចខ ចុះថ្ងៃទី២២ តុលា ឆ្នាំ២០០៣ របស់ចៅក្រមស៊ើបសួរ លោក សួស សំអាត នៃ សាលាដំបូងខេត្តបាត់ដំបង។
បើយោងតាមដីកានេះគឺជនសង្ស័យ ឈ្មោះ ខាន់ ចន្ថា នេះ ត្រូវបានតំណាងអយ្យការចោទប្រកាន់ពីបទ «ប្លន់ទ្រព្យសម្បត្តិ» ដែលបានប្រព្រឹត្ត នៅចំណុចក្រុមហ៊ុនណាវ៉ារ៉ាត់ ស្ថិតក្នុងភូមិកន្ទួត ឃុំធិបតី ស្រុកគាស់ក្រឡ កាលពីថ្ងៃទី២៥ វិច្ឆិកា ឆ្នាំ២០០២ កន្លងទៅ ប៉ុន្តែក្រោយប្រព្រឹត្តបទល្មើសរួច ជននេះបានរត់គេចខ្លួន ទៅ នៅប្រទេសថៃរហូត លុះត្រឡប់ចូលស្រុកវិញក្នុងឱកាសបុណ្យ ចូលឆ្នាំថ្មីប្រពៃណីខ្មែរនាឆ្នាំនេះ ក៏ត្រូវកម្លាំងជំនាញចាប់ខ្លួនតាមដីកាតែម្ដង។
ជាមួយនឹងការចាប់ខ្លួន ពិរុទ្ធជនខាងលើនេះ ជនសង្ស័យដែលជាពិរុទ្ធជន បានបង្ហើបនូវរឿងរ៉ាវខ្លះៗ ថា ខ្លួនពិតជាបានប្រព្រឹត្តនូវអំពើប្លន់មែន ហើយក្រោយពេលប្រព្រឹត្តបទល្មើសរួច ខ្លួនក៏បានរត់គេចទៅសម្ងំលាក់ខ្លួននៅប្រទេសថៃរហូត ដែលមកទល់នឹងពេលនេះ មានរយៈពេល១៧ឆ្នាំហើយ។ ប៉ុន្តែក្នុងរយៈពេលនៃការរត់គេចខ្លួននេះ ខ្លួនធ្លាប់ចរចាជាមួយមន្ត្រីនគរបាលនៅស្រុកគាស់ក្រឡ (សុំមិនបញ្ចេញ ឈ្មោះ) ដើម្បីបញ្ចប់សំណុំរឿងជាថ្នូរនឹងការសូកលុយរាប់លានរៀល។
ជនសង្ស័យ រូបនេះបាននិយាយបន្តថា ខ្លួនបានសូកលុយជូនមន្ត្រីនគរបាលម្នាក់ នៅស្រុកគាស់ក្រឡ និងបងថ្លៃរបស់ ខ្លួនម្នាក់ទៀតដែលជាសមត្ថកិច្ចដែរ និងមានឋានៈស្មើអធិការ ដើម្បីឲ្យជួយរត់ការបញ្ចប់សំណុំរឿងបទឧក្រិដ្ឋនេះ ហើយមន្ត្រីនគរបាលទាំងនោះក៏បានអះអាងធានាបញ្ចប់សំណុំរឿងនេះជាមួយតុលាការរួចរាល់ហើយដែរ ប៉ុន្តែនៅពេលខ្លួនត្រឡប់ពីប្រទេសថៃមកស្រុកកំណើត ដើម្បីចូលរួមពិធីបុណ្យចូលឆ្នាំថ្មីប្រពៃណីខ្មែរ នាឆ្នាំនេះក៏ត្រូវសមត្ថកិច្ចចាប់ខ្លួនតែម្ដង។
ជននេះក៏បាននិយាយដែរថា តាមពិតខ្លួនមិននឹកស្មានថា នៅជាប់ទោសទណ្ឌបែបនេះទេ ព្រោះសំអាងថា បានបង់លុយឲ្យមន្ត្រីនគរបាលរាប់សិបលានរួចហើយក្នុងការរត់ការ ដើម្បីបញ្ចប់រឿងរួចហើយ ទើបខ្លួនហ៊ានចូលស្រុក តែបែរជានៅតែជាប់ទោសដដែល ។
ទោះបីជាយ៉ាងនេះក៏ដោយ បើតាមមន្ត្រីផ្នែកអនុវត្តដីកានៃស្នងការដ្ឋាននគរបាលខេត្ត ដែលដឹកនាំដោយលោក វរសេនីយ៍ត្រី កង សុផាណ្ណា នាយរងការិយាល័យព្រហ្មទណ្ឌកម្រិតធ្ងន់ គឺ ក្រោយអនុវត្តដីកា កម្លាំងជំនាញបានបញ្ជូនជនល្មើសរូបនេះជូនទៅតុលាការ ដើម្បីចាត់ការបន្តតាមនីតិវិធីហើយ ៕
Source: Kampuchea Thmey Daily
0 Comments