លី​គ​កំពូល​ម៉ាឡេស៊ី​ ៖​ ក្លិប ធា​រី ចន្ថា​ប៊ី​ន រកបាន​ជ័យជម្នះ​ខណៈ​ក្លិប​របស់ ចាន់ វឌ្ឍនាកា រង​បរាជ័យ

​នៅ​ឆ្នាំ​២០១៩ នេះ​មាន​កីឡាករ​សមាជិក​ក្រុម​ជម្រើសជាតិ​កម្ពុជា ចំនួន​២​នាក់​កំពុង​ប្រកប​អាជីព​នៅ​លី​គ​កំពូល​ម៉ាឡេស៊ី (Malaysia Super League) ដោយ​ក្នុងនោះ​មាន​កីឡាករ ចាន់ វឌ្ឍនាកា ជា​សមាជិក​ក្លិប​បាល់ទាត់ PKNS (Kelab Bolasepak Perbadanan Kemajuan Negeri Selangor) និង​កីឡាករ ធា​រី ចន្ថា​ប៊ី​ន សមាជិក​របស់​ក្លិប​Terengganu FA​។

សម្រាប់​លទ្ធផល​ប្រកួត​សប្ដាហ៍​ទី​១១ ថ្មីៗ​នេះ​វិញ​ក្រុម​Terengganu FA ធ្វើដំណើរ​ទៅ​ដណ្តើម​ជ័យជម្នះ​ពី​ក្រុម​ម្ចាស់ផ្ទះ​Petaling Jaya City ដោយ​លទ្ធផល ២​ទល​១ លើ​ទីលាន​កីឡដ្ឋាន Stadium Petaling Jaya ក្នុង​ទីក្រុង Petaling Jaya នៅ​យប់​ថ្ងៃទី​២៧​ខែមេសា ឆ្នាំ​២០១៩ ថ្មីៗ​នេះ ខណៈ​ក្រុម PKNS បាន​យកឈ្នះ​លើ​ក្រុម​ភ្ញៀវ Kuala Lumpur ៣​ទល់​២ លើ​ទីលាន​កីឡដ្ឋាន Stadium Shah Alam ក្នុង​ទីក្រុង Shah Alam នៅ​យប់​ថ្ងៃទី​២៧ ខែមេសា ឆ្នាំ​២០១៩ ដូចគ្នា​។



សូម​រំលឹក​ថា ​រដូវ​កាល​ឆ្នាំ​២០១៩ នៅ​លី​គ​កំពូល​ប្រទេស​ម៉ាឡេស៊ី​មាន​សមាជិក​ចំនួន​១២​ក្រុម ដែល​ត្រូវ​ប្រកួត​ពី​ថ្ងៃ​ទី​១ ខែកុម្ភៈ ដល់​ថ្ងៃទី​២១ ខែកក្កដា ឆ្នាំ​២០១៩​។ ក្រុម​ទាំង​១២​ត្រូវ​ប្រកួត​សន្សំ​ពិន្ទុ​ចំនួន​២​ជើង ហើយ​ក្រុម​ជើងឯក​ទទួល​កៅអី​ទៅលេង​វគ្គ​ចែក​ពូ​ល​ពានរង្វាន់​កម្រិត​ទ្វីបអាស៊ី (AFC Champions League group stage) និង​ក្រុម​ជើងឯក​រង​ទទួលបាន​រង​ទទួលបាន​កៅអី​ចូល​លេង​វគ្គ​ជម្រុះ​ពានរង្វាន់ AFC Champions League ជុំ​ទី​២​។ ចំណែក​ក្រុម​បាត​តារាង​ចំនួន​២​ក្រុម វិញ​ត្រូវ​ធ្លាក់​ទៅលេង​នៅ​ពានរង្វាន់​លី​គ​លំដាប់​ទី​២Malaysia Premier League​។

សម្រាប់​ប្រកួត​សប្ដាហ៍​ទី​១២ វិញ​ក្រុម PKNS ត្រូវ​ប៉ះ​ក្រុម Perak នៅវេលា​ម៉ោង​៨​យប់​ថ្ងៃទី​៣ ខែឧសភា ឆ្នាំ​២០១៩ លើ​ទីលាន​កីឡដ្ឋាន​Stadium Shah Alam ក្នុង​ទីក្រុង Shah Alam ខណៈ​ក្រុម​Terengganu វិញ​ត្រូវ​បន្តធ្វើ​ដំណើរ​ទៅកាន់​ទីក្រុង​Manjung ដោយ​ប៉ះ​ម្ចាស់ផ្ទះ PKNP នៅវេលា​ម៉ោង​៨​យប់​ថ្ងៃទី​៤ ខែឧសភា ឆ្នាំ​២០១៩ លើ​ទីលាន​កីឡដ្ឋាន​Mini Manjung Stadium​។



ចំពោះ​ប្រទេស​កម្ពុជា ធ្លាប់មាន​កីឡាករ​៤​នាក់​ចេញទៅ​ប្រកប​អាជីព​នៅ​លី​គ​កំពូល​ប្រទេស​ម៉ាឡេស៊ី កាលពី​ឆ្នាំ​២០១៨ កន្លង​ទៅ​ដោយ​ក្នុង​នោះ​មាន​កីឡាករ ចាន់ វឌ្ឍនាកា ចូលរួម​ក្លិប Pahang FA ហើយ​កីឡាករ កែវ សុខ​ផេង ចូលរួម​ក្លិប PKNP កីឡាករ ប្រាក់ មុន្នី​ឧ​ត្ត​ម ចូល​ក្លិប​Negeri Sembilan និង​កីឡាករ ធា​រី ចន្ថា​ប៊ី​ន ចូលរួម​ក្លិប​Terengganu FA​។ ក្នុងចំណោម​កីឡាករ​ទាំង​៤​មាន​៣​នាក់​ត្រូវ​ក្លិប​សម្រេច​បញ្ចប់​កិច្ចសន្យា​ត្រឹម​ពាក់កណ្ដាល​រដូវ​កាល​ហើយ​មានតែ ធា​រី ចន្ថា​ប៊ី​ន ប៉ុណ្ណោះ​ក្លិប​រក្សា​កិច្ចសន្យា​រហូតដល់​ចប់​រដូវ​កាល​ព្រមទាំង​បន្ត​កិច្ចសន្យា​រហូតដល់​ឆ្នាំ​២០១៩​នេះ​ទៀត​៕

Source: Kampuchea Thmey Daily