កំពង់ចាម ៖ ករណីឃាតកម្មសម្លាប់ជីដូន និងចៅ កាត់ក្បាលយ៉ាងសាហាវ កាលពីថ្ងៃទី៣ ខែមេសាឆ្នាំ២០១៩ ត្រូវបានកម្លាំងសមត្ថកិច្ចចម្រុះ ចុះស្រាវជ្រាវកំណត់អត្តសញ្ញាណជនសង្ស័យ និងឃាត់ខ្លួនបានម្នាក់ហើយ។
ប៉ូលិសបានឲ្យដឹងថា ករណី ឃាតកម្ម កាត់ក្បាល យាយ និងចៅ ត្រូវបានសមត្ថកិច្ច បង្ក្រាបបានហើយ ដោយជនសង្ស័យមានឈ្មោះ ស៊ឹម ខេង ភេទប្រុស អាយុ៥៥ឆ្នាំ ជាតិខ្មែរ រស់នៅភូមិត្រពាំងបឹង ឃុំថ្មពូន ស្រុកព្រៃឈរ ខេត្តកំពង់ចាម។
លោកឧត្ដមសេនីយ៍ត្រី ហេង វុទ្ធី ស្នងការរង ទទួលផែនការងារនគរបាលព្រហ្មទណ្ឌ បានបញ្ជាក់ថា កាលពីថ្ងៃទី០៣ ខែមេសា ឆ្នាំ២០១៩ មានករណីឃាតកម្ម១ ដ៏សាហាវ ដែលជនរងគ្រោះ២នាក់ ត្រូវបានឃាតកកាត់ក្បាល យកទៅបាត់ គឺ ឈ្មោះ ពូ អូន ភេទស្រី អាយុ៦៥ឆ្នាំ និង ចៅ ឈ្មោះ ខេង សាវឿន ភេទស្រី អាយុ០៦ឆ្នាំ មានទីលំនៅភូមិទួលថ្ម ឃុំថ្មពូន ស្រុកព្រៃឈរ ខេត្តកំពង់ចាម។
ប្រភពព័ត៌មាននៅកន្លែងកើតហេតុបានឲ្យដឹងថា ជនសង្ស័យធ្លាប់មានទំនាក់ទំនងយ៉ាងជិតស្និទ្ធជាមួយជនរងគ្រោះយូរមកហើយ តែក្រោយមកក៏មានទំនាស់ជាមួយគ្នា ឈប់ទាក់ទងគ្នា រហូតមានករណីឃាតកម្មទៅលើជនរងគ្រោះ។
បច្ចុប្បន្ន ជនសង្ស័យ ត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលស្រុកព្រៃឈរ ដើម្បីបំពេញសំណុំបែបបទតាននីតិវិធី៕
Source: Kampuchea Thmey Daily
0 Comments