បង់​ក្លា​ដែ​ស ​បញ្ឈប់​ជនភៀសខ្លួន​រ៉ូ​ហ៊ីង​យ៉ា​១១៥​នាក់​ ដែល​ព្យាយាម​ធ្វើដំណើរ​ទៅ​ម៉ាឡេស៊ី

ក្រុមមន្ត្រី​បាន​និយាយ​នៅ​ថ្ងៃ​សៅរ៍​ថា ប៉ូលិស​បង់​ក្លា​ដែ​ស បាន​រារាំង​ជនភៀសខ្លួន​រ៉ូ​ហ៊ីង​យ៉ា​ចំនួន​១១៥​នាក់ ​មិន​ឲ្យ​គេ​រត់ពន្ធ​ចូលទៅក្នុង​ប្រទេស​ម៉ាឡេស៊ី ​តាម​ទូក​នេសាទ​ ដែល​គ្មាន​សុវត្ថិភាព​ ប៉ុន្តែ​មិនមាន​ជនសង្ស័យ​ជួញដូរ​ណា​ម្នាក់ ​ត្រូវបាន​ឃាត់ខ្លួន​ទេ​។​

ក្រុម​នេះ​គឺ​មកពី​ជំរំ Kutupalong ក្បែរ​ព្រំដែន​បង់​ក្លា​ដែ​ស​ជាប់​ប្រទេស​មី​យ៉ាន់​ម៉ា​ដែលជា​កន្លែង​តាំង​ទីលំនៅ​ជនភៀសខ្លួន​ធំ​បំផុត​នៅលើ​ពិភពលោក​។ ពួកគេ​ត្រូវបាន​បញ្ឈប់​នៅពេល​ពួកគេ​ធ្វើដំណើរ​ទៅរក​ទូក​នៅ​ឈូង​សមុទ្រ Bengal ។​

ប្រតិ​ប​ត្ដិ​ការដែល​បាន​កើតឡើង​កាលពី​យប់​ថ្ងៃ​សុក្រ​មួយ​នេះ​គឺជា​រឿងរ៉ាវ​ចុងក្រោយ​បំផុត​ដែល​ទាក់ទង​នឹង​ជនភៀសខ្លួន​រ៉ូ​ហ៊ីង​យ៉ា​ដែល​កំពុង​ស្វែងរក​ការចាកចេញ​ពី​ជំរំ​នេះ​ទៅកាន់​ប្រទេស​ម៉ាឡេស៊ី​ដែលជា​ប្រទេសមួយ​មាន​ប្រជាជន​កាន់សាសនា​មូស្លីម​ភាគច្រើន​។​

មន្ត្រីប៉ូលិស​បង់​ក្លា​ដែ​សលោក Anwar Hossain បាន​ប្រាប់ AFP ថា “​យើង​បាន​បញ្ឈប់​ម៉ូតូ​កង់​បី​ចំនួន​១៥​គ្រឿង​ហើយ​ជួយសង្គ្រោះ​បាន​បុរស​៥០​នាក់ ស្ត្រី​៣៩​នាក់​និង​កុមារ​២៦​នាក់​។ ប៉ុន្តែ​យើង​មិនអាច​ចាប់​អ្នកជួញដូរ​ណា​ម្នាក់​បានទេ​”​។​

មន្ត្រី​ដដែល​បាន​និយាយថា ជនជាតិ​រ៉ូ​ហ៊ីង​យ៉ា​ដែល​បាន​បង់ប្រាក់​មួយចំនួន​ទៅ​ឲ្យ​អ្នកជួញដូរ​រួច​ទៅហើយនោះ​នឹងត្រូវ​នាំយក​ត្រលប់​ទៅ​ជំរំ​វិញ​។​

ជនជាតិភាគតិច​រ៉ូ​ហ៊ីង​យ៉ា​ប្រហែល​៧៤០,០០០​នាក់​បាន​រត់​ភៀសខ្លួន​ទៅកាន់​ប្រទេស​បង់​ក្លា​ដែ​ស​បន្ទាប់ពី​ការបង្ក្រាប​យ៉ាង​ឃោរឃៅ​នៅក្នុង​ប្រទេស​មី​យ៉ាន់​ម៉ា​នៅ​ខែសីហា​ឆ្នាំ​២០១៧​។​

ពួកគេ​បាន​ចូលរួម​ជាមួយ​ជនជាតិ​រ៉ូ​ហ៊ីង​យ៉ា​ចំនួន​៣០០,០០០​នាក់​ផ្សេងទៀត​ដែល​កំពុង​រស់នៅក្នុង​ជំរំ​ដែលមាន​មនុស្ស​ច្រើន​កកកុញ​រួចទៅហើយ​នៅក្នុង​តំបន់ Cox's Bazar បន្ទាប់ពី​អំពើហិង្សា​លើក​មុន​។​

មនុស្ស​រាប់ពាន់នាក់​បាន​ប្រថុយ​ជីវិត​របស់​ពួកគេ​ធ្វើដំណើរ​ទៅកាន់​ប្រទេស​ម៉ាឡេស៊ី​និង​ថៃ​តាម​ទូក​នៅពេល​ឈូង​សមុទ្រ Bengal មាន​ភាពស្ងប់ស្ងាត់​មុន​រដូវ​មូសុង​មកដល់​នៅ​ចុងខែ​មីនា​។​

គិត​ត្រឹម​ពេលនេះ​ក្នុងឆ្នាំនេះ កងកម្លាំង​សន្តិសុខ​បង់​ក្លា​ដែ​សបាន​បញ្ឈប់​មនុស្ស​ជាង​៣០០​នាក់​ពី​ការប៉ុនប៉ង​ធ្វើដំណើរ​លើ​ទូក​នេសាទ​តូចៗ​ដែល​ក្រុម​អ្នកជំនាញ​និយាយថា មិន​សមស្រប​សម្រាប់​ការធ្វើដំណើរ​ក្នុង​សមុទ្រ​ជ្រៅ​៕ AFP

​

Source: Kampuchea Thmey Daily