ក្លិបព្រះខ័នរាជស្វាយរៀង ត្រូវធ្វើដំណើរទៅខេត្តតាកែវ ដើម្បីប្រកួតសប្តាហ៍ទី៣ ក្នុងពានរង្វាន់លីគកំពូលកម្ពុជា (Metfone Cambodia League) រដូវកាល២០១៩ ជាមួយម្ចាស់ផ្ទះគិរីវង់សុខសែនជ័យ ក្នុងប្រកួតក្រៅលើកទី២នេះនឹងធ្វើឡើងនៅទីលានកីឡដ្ឋានគរុកោសល្យភូមិភាគតាកែវ វេលាម៉ោង៣និង៣០នាទីរសៀលថ្ងៃអាទិត្យ ទី៧ ខែមេសា ឆ្នាំ២០១៩នេះ។ ប្រកួតនេះមានផ្សាយផ្ទាល់តាមហ្វេសប៊ុករបស់ផេក Metfone Cambodian League ផងដែរ។
លោក Conor Nestor គ្រូបង្វឹករបស់ក្រុមព្រះខ័នរាជស្វាយរៀង បានលើកឡើងមុនការប្រកួតមកដល់ថា «យើងត្រូវតែគោរពគូប្រកួត និងធ្វើការខ្លាំងតាមអាចទៅបាន។ ពិតណាស់ អាចថាជាប្រកួតដំបូងរបស់គេដែលអាចឲ្យពួកគេអាចរកគ្រាប់បាល់ និងហាក់ដូចជាមានភាពរស់រវើកពេលលេងជាមួយ វិសាខា ដោយខ្ញុំមានអារម្មណ៍គេអត់សំណាងដោយគួរតែនាំមុខនាវគ្គទី១។ ដូច២ប្រកួតដំបូងរបស់យើងចឹង យើងត្រូវតែគោរពគូប្រកួត និងធ្វើការខ្លាំងតាមអាចទៅបាន។ គីរីវង់ មិនមែនជាក្រុមស្រួលយកឈ្នះនោះទេ ខ្ញុំច្បាស់ណាស់ថា រដូវកាលនេះពួកគេនឹងអាចឈ្នះការប្រកួតជាច្រើន»។
គ្រូបង្វឹកជនជាតិអៀកឡង់ខាងលើបានបង្ហាញពីកត្តាព្រួយបារម្ភមួយចំនួនអំពីការផ្លាស់ប្តូរទីលានដោយសារកីឡដ្ឋានគិរីវង់សុខសែនជ័យ ត្រូវបានត្រៀមរៀបចំសម្រាប់ពិធីបុណ្យជាតិ ព្រះរាជពិធីច្រត់ព្រះនង្គ័ល។ លោកថា « វាជាទីលានខុសគ្នាដែលយើងធ្លាប់លេងជាមួយកាលពីប្រកួតមិត្តភាពកន្លងមក។ យើងបានឃើញរូបភាពហើយយើងសង្ឃឹមថា អ្នកគាំទ្រកីឡាបាល់ទាត់នៅកម្ពុជា ពេញចិត្តនឹងការប្រកួតជាមួយទីលានដែលយើងអាចលេងបាល់ទាត់បាន។ ប៉ុន្តែយើងជាកីឡាករអាជីព ទោះបីទីលានបែបណាក៏យើងត្រូវតែសម្របខ្លួន»។
លោក Conor Nestor បានបន្តថា «ក្រុមទាំងមូលបានធ្វើការយ៉ាងលំបាកពេញមួយសប្តាហ៍ហើយពួកគេចង់រក្សាអារម្មណ៍ដែលឈ្នះ។ យើងមានការព្រួយបារម្ភតិចតួចដោយសារផលប៉ះពាល់នៃទីលានកាលពីសប្តាហ៍មុន ប៉ុន្តែប្រសិនបើអ្នកខ្លះមិនអាចលេងបាននោះវាគឺជាឱកាសមួយសម្រាប់អ្នកដទៃ»។ សម្រាប់បញ្ហាកីឡាកររបួសវិញ សួន សុវណ្ណ មិនទាន់ប្រាកដពីការវិលត្រលប់ ខណៈ រស់ គង់សំរេច នៅតែបន្តឈឺ។ អ្នកផ្សេងទៀតបានត្រលប់មកការហ្វឹកហាត់ ប៉ុន្តែ កែ លីហេង, ហេង គីមហុង និង សំអឿន ពិដោរ ពុំទាន់រួចរាល់ក្នុងការប្រកួតនោះទេ។
សូមបញ្ជាក់ថា ក្រុមព្រះខ័នរាជស្វាយរៀង កំពុងតែឈរកំពូលតារាងលីគកំពូលកម្ពុជា នាពេលបច្ចុប្បន្នក្រោយប្រកួតបាន២លើកឈ្នះទាំង២លើកមាន៦ពិន្ទុពោលគឺក្រោយឈ្នះលើក្រុមអគ្គស្នងការនគរបាលជាតិ (ប៉ូលិស) ២ទល់០ និងបន្តឈ្នះម្ចាស់ផ្ទះសូលទីឡូអង្គរ ១ទល់០៕
Source: Kampuchea Thmey Daily
0 Comments