គណៈកម្មាធិការជាតិអូឡាំពិកកម្ពុជា រៀបចំពិធីសូត្រមន្តចម្រើនព្រះបរិត្ត ដើម្បីទទួលអំណរសាទរពិធីបុណ្យចូលឆ្នាំថ្មី

គណៈកម្មាធិការជាតិអូឡាំពិកកម្ពុជា(NOCC) កាលពីរសៀលថ្ងៃ០៥ ខែមេសា ឆ្នាំ២០១៩ បានរៀបចំពិធីសូត្រមន្តចម្រើនព្រះបរិត្ត ដើម្បីត្រៀមទទួលអំណរសាទរ ពិធីបុណ្យចូលឆ្នាំខ្មែរ ប្រពៃណីជាតិ ឆ្នាំកុរ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃ ទី១៦ ខែមេសា ឆ្នាំ២០១៩ខាងមុខនេះ។

ពិធីនេះមានការអញ្ជើញចូលរួមពីសំណាក់លោកបណ្ឌិតថោង ខុន ប្រធានគណៈកម្មាធិការជាតិអូឡាំពិកកម្ពុជា រួមជាមួយសមាជិកប្រតិបត្តិ ព្រឹទ្ធាចារ្យកីឡា ព្រមទាំងលោក លោកស្រី ជាមន្ត្រីក្រោមឱវាទគណៈកម្មាធិការជាតិអូឡាំពិកកម្ពុជាជាច្រើននាក់ផងដែរ។

ពិធីសូត្រមន្តចម្រើនព្រះបរិត្តនេះ រៀបចំឡើងតាមទំនៀមទម្លាប់ព្រះពុទ្ធសាសនា ដើម្បីឧទ្ទិសកុសលផលបុណ្យជូនចំពោះដួងវិញ្ញាណក្ខន្ធ បុព្វការីជន ជីដូនជីតា ឪពុកម្តាយ និងញាតិកាទាំង៧សន្តាន ព្រមទាំងអតីតកីឡាករ កីឡាការិនី ដែលបានចែកឋានទៅកាន់បរលោកខាងមុខ សូមរំដោះរួចចាកផុតពីកម្មពៀរ វេរាទាំងឡាយ និងបានទៅសោយសុខក្នុងឋានសុគតិភពកុំបីឃ្លៀងឃ្លាតឡើយ។

ម្យ៉ាងវិញទៀតពិធីនេះ ក៏បានឧទ្ទិសបួងសួងដល់គុណបុណ្យព្រះរតនត្រ័យ ព្រះពុទ្ធ ព្រះធម៌ ព្រះសង្ឃ ជាពិសេសទេវតាឆ្នាំថ្មី ដែលនឹងយាងមកគ្រប់គ្រងថែរក្សាទឹកដីនៃព្រះរាជាណាចក្រកម្ពុជា នៅពេលឆាប់ៗខាងមុខនេះ សូមប្រោះព្រំប្រសិទ្ធិពរជ័យ បវរសួស្តី មហាប្រសើរ និងបរមសុខគ្រប់ប្រការដល់ថ្នាក់ដឹកនាំ និងមន្ត្រីអ្នកមុខអ្នកការ គណៈកម្មាធិការជាតិអូឡាំពិកកម្ពុជា។

ជាមួយនឹងពិធីសូត្រមន្តចម្រើនព្រះបរិត្តនេះ គណៈកម្មាធិការជាតិអូឡាំពិកកម្ពុជា នៅបានរៀបចំការផ្តល់អំណោយឧបត្ថម្ភដល់ព្រឹទ្ធាចារ្យកីឡានិងសម្តែងរបាំត្រុដិ ដេញឧបទ្រពចង្រៃ ដើម្បីទទួលបាននូវសិរីសួស្ដីជោគជ័យឆ្នាំថ្មី៕