ក្រោយប្រមុខរាជរដ្ឋាភិបាល សម្ដេចតេជោ ហ៊ុន សែន លើកឡើងពីភាពមិនប្រក្រតីក្នុងការកាត់ក្តីរបស់អាជ្ញាកណ្ដាលពេលប្រកួតដែលសង្កត់ធ្ងន់លើកីឡាប្រដាល់គុនខ្មែរ ដែលរៀបចំការប្រកួតនៅតាមស្ថានីយទូរទស្សន៍ ដោយការកាត់ក្តីមិនមានភាពត្រឹមត្រូវ យុត្តិធម៌ និងគោរព ក្រមសីលធម៌ និងវិជ្ជាជីវៈ សហព័ន្ធកីឡាប្រដាល់គុនខ្មែរ នៅព្រឹកថ្ងៃទី០៦ ខែមេសា ឆ្នាំ២០១៩ បានបើកកិច្ចប្រជុំមកទាន់មួយ ដើម្បីណែនាំជំរុញ និងដាក់បទបញ្ជាដល់មន្ត្រីបច្ចេកទេសឲ្យយកចិត្តទុកដាក់គោរពតាមអនុសាសន៍ដ៏ល្អរបស់ប្រមុខរាជរដ្ឋាភិបាល។
លោកឧត្ដមសេនីយ៍ តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានគាំទ្រ និងប្ដេជ្ញាគោរពតាមអនុសាសន៍របស់ សម្ដេចតេជោ ព្រមទាំងប្ដេជ្ញាអនុវត្តន៍កែលំអ នូវអ្វីដែលអនុវត្តកន្លងមកមិនត្រឹមត្រូវ ដូចជាការកាត់ក្តីរបស់អាជ្ញាកណ្ដាល ការដាក់ពិន្ទុ ដោយត្រូវតែគោរពទៅតាមក្រមសីលធម៌ និងវិជ្ជាជីវៈ។
ជាមួយនេះ សហព័ន្ធនឹងប្រជាជាមួយស្ថានីយ ដើម្បីជជែកពិភាក្សារិះរកវិធីសាស្ត្រ ធ្វើយ៉ាងណាឲ្យការរៀបចំការប្រកួត និងលទ្ធផល មានតម្លាភាព អាចទទួលយកបាន គឺឈ្នះដឹងឈ្នះ ចាញ់ដឹងចាញ់ មិនមែនអ្នកឈ្នះទៅជាចាញ់ អ្នកចាញ់ទៅជាឈ្នះទេ។
លោកឧត្ដមសេនីយ៍ តែម ម៉ឺន បញ្ជាក់ថា ប្រជាថ្ងៃនេះ គឺពីមែនជាការពិភាក្សាផ្លាស់ប្ដូរពិសោធន៍ការងារទេ គឺជាការដាក់បទបញ្ជាឲ្យអនុវត្តតែម្តង ហើយក៏ជាការដែលសហព័ន្ធត្រូវអនុវត្តនូវអភិក្រមទាំង៥របស់ សម្ដេចតេជា នាយករដ្ឋមន្ត្រី នៃកម្ពុជា គឺឆ្លុះកញ្ចក់ ងូតទឹក ដុលក្អែល ព្យាបាល និងវះកាត់។ ពាក់ព័ន្ធបញ្ហានេះ លោកប្រធានសហព័ន្ធប្រដាល់អះអាងថា ថ្វីត្បិតតែមិនទាន់បានកាត់សាច់ស្អុយចោលក៏ដោយ ក៏ចាប់ពីពេល នេះទៅ លោកនឹងរឹតបន្តឹងបញ្ហាវិន័យក្រមសីល ធម៌វិជ្ជាជីវៈដល់មន្ត្រីបច្ចេកទេស ហើយទើបឈានដល់ការអនុវត្តតាមអភិក្រមទី៥របស់សម្ដេចតេជោ គឺកាត់សាច់ស្អុយចោល។
ទន្ទឹមនេះ លោកឧត្ដមសេនីយ៍ តែម ម៉ឺន បានដាក់ចេញនូវផែនការបណ្ដុះបណ្ដាលមន្ត្រីបច្ចេកទេស ពិសេសអាជ្ញាកណ្ដាល ចៅក្រម ត្រូវតែមានការយល់ដឹងស៊ីជម្រៅទៅលើបញ្ហាការកាត់ក្តី ដាក់ពិន្ទុ ស្របតាមក្រមសីលធម៌វិជ្ជាជីវៈ។
គួរបញ្ជាក់ថា កាលពីថ្ងៃទី០៤មេសា ក្នុងពិធីសំណេះសំណាលនិងទទួលទានអាហារជាមួយគ្រួសារកីឡានិង ប្រមុខរាជរដ្ឋាភិបាលបានណែនាំឲ្យអាជ្ញាកណ្ដាលកីឡាប្រដាល់ត្រូវគោរពក្រមសីលធម៌ និងវិជ្ជាជីវៈ ដើម្បីផ្តល់ភាព សុក្រឹត្យ ដល់ កីឡាករ កីឡាការិនីនៅពេលប្រកួត។
សម្ដេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា អាជ្ញាកណ្ដាលកីឡាប្រដាល់ត្រូវតែទៅបណ្ដុះបណ្ដាលឡើងវិញ ដើម្បីឲ្យមានការ គោរពក្រមសីលធម៌ នឹងផ្តល់ពិន្ទុដោយមានសុក្រឹតភាព ទើបធានាឲ្យការប្រកួតរបស់កីឡាករ កីឡាការិនី មានភាពយុត្តិធម៌ទាំងអស់។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា មានប្រសាសន៍ថា ប្រសិនបើអាជ្ញាកណ្ដាល នៅតែមិនព្រមបណ្ដុះបណ្ដាលហើយមិនគោរពក្រមសីលធម៌វិជ្ជាជីវៈកាត់សេចក្តី អយុត្តិធម៌ ចំពោះ កីឡាករ កីឡាកា រិនីណាមួយនោះ សម្ដេចអាចនឹងចេញមុខដោះស្រាយដោយ ផ្ទាល់ចំពោះអំពើអយុត្តិធម៌នេះ៕
Source: Kampuchea Thmey Daily
0 Comments