ប្រធានាធិបតីអាមេរិកលោក Donald Trump បានធ្វើទស្សនកិច្ចនៅព្រំដែនម៉ិកស៊ិកកាលពីថ្ងៃសុក្រដើម្បីផ្ញើសារមួយទៅកាន់ជនអន្តោប្រវេសន៍ខុសច្បាប់និងអ្នកស្វែងរកសិទ្ធិជ្រកកោនថា កុំមកធ្វើអ្វី។
លោកបានថ្លែងអំឡុងកិច្ចប្រជុំមួយជាមួយមន្ត្រីល្បាតព្រំដែននិងមន្ត្រីផ្សេងទៀតនៅទីក្រុង Calexico នៃរដ្ឋ California ថា “ប្រព័ន្ធនេះពេញហើយ យើងមិនអាចទទួលយកអ្នកទៀតបានទេ។ ដូច្នេះសូមបង្វែរទិសដៅ នោះហើយជាផ្លូវ”។
ក្រោយនោះមិនយូរប៉ុន្មាន លោក Trump បានទៅមើលផ្នែកមួយនៃជញ្ជាំងព្រំដែនដែលកែលម្អថ្មីហើយបាននិយាយថា ជនអន្តោប្រវេសន៍ខុសច្បាប់ធ្លាប់បានចូលតាមនេះ។
ដំណើររបស់លោកទៅកាន់រដ្ឋ California បានកើតឡើងបន្ទាប់ពីលោកបានដកការគំរាមកំហែងពីមុនដើម្បីបិទព្រំដែនដែលជាហេតុបង្កឲ្យមានការភ័យខ្លាចអំពីការខូចខាតសេដ្ឋកិច្ចធ្ងន់ធ្ងរ។
ទោះបីជាយ៉ាងណាក៏ដោយ លោក Trump បានចាត់ទុកយុទ្ធនាការរបស់លោកប្រឆាំងនឹង “វិបត្តិ” នៅតាមព្រំដែនថាជាគន្លឹះនៃការប៉ុនប៉ងជាប់ឆ្នោតជាថ្មីក្នុងឆ្នាំ២០២០ហើយពេលវេលារបស់លោកនៅទីក្រុង Calexico គឺជាការរក្សាសារនោះនៅក្នុងជំហររឹងមាំ។
មុនពេលចាកចេញពីទីក្រុងវ៉ាស៊ីនតោនកាលពីព្រឹកថ្ងៃសុក្រ លោក Trump បាននិយាយថា ការគំរាមកំហែងមុនៗរបស់លោកដើម្បីបិទច្រកព្រំដែនគឺបានទទួលជោគជ័យក្នុងការបញ្ចុះបញ្ចូលអាជ្ញាធរម៉ិកស៊ិកឲ្យរារាំងដោយការបញ្ឈប់ជនចំណាកស្រុកនៅតាមផ្លូវររបស់ពួកគេទៅភាគខាងជើង។
លោកបាននិយាយថា “ខ្ញុំត្រូវតែនិយាយថា ប្រទេសម៉ិកស៊ិកធ្វើបានល្អខ្លាំងណាស់ក្នុងរយៈពេល៤ថ្ងៃចុងក្រោយនេះចាប់តាំងពីខ្ញុំនិយាយអំពីការបិទទ្វារព្រំដែន”។
លោក Trump បានបញ្ជាក់សារជាថ្មីថា ការបិទព្រំដែនមិនធ្វើឡើងនាពេលបច្ចុប្បន្ននេះទេប៉ុន្តែបាននិយាយថា លោកនឹងដាក់ពន្ធចំនួន២៥ភាគរយលើការនាំចូលរថយន្តពីប្រទេសម៉ិកស៊ិកជំនួសវិញប្រសិនបើការធ្វើចំណាកស្រុកខុសច្បាប់និងការរត់ពន្ធគ្រឿងញៀនមិនអាចគ្រប់គ្រងបាន។
លោក Trump ក៏បាននិយាយផងដែរថា លោកនៅតែអាចបញ្ជាឲ្យបិទព្រំដែននៅពេលក្រោយ។ លោកបានថ្លែងថា “ខ្ញុំអាចបិទវានៅពេលណាមួយប៉ុន្តែខ្ញុំចង់ធ្វើពន្ធគយជាង”៕ AFP
Source: Kampuchea Thmey Daily
0 Comments