ការិយាល័យការបរទេស បាននិយាយកាលពីថ្ងៃសុក្រថា ប្រទេសប៉ាគីស្ថាន នឹងដោះលែងអ្នកទោសឥណ្ឌាចំនួន៣៦០នាក់ក្នុងខែនេះ ខណៈអ្នកជិតខាងប្រដាប់ដោយអាវុធនុយក្លេអ៊ែរទាំងពីរ បានបញ្ចៀសការប្រឈមមុខដាក់គ្នា ដែលនាំឲ្យមហាអំណាចពិភពលោកជំរុញឲ្យមានការអត់ធ្មត់។
ភាពតានតឹងបានកើនឡើងខ្ពស់ចាប់តាំងពីការបំផ្ទុះគ្រាប់បែកអត្តឃាតដោយក្រុមសកម្មប្រយុទ្ធមានមូលដ្ឋាននៅប្រទេសប៉ាគីស្ថាន ក្នុងតំបន់កាស្មៀរដែលគ្រប់គ្រងដោយឥណ្ឌា បានសម្លាប់ទាហានប៉ារ៉ាឥណ្ឌាយ៉ាងតិច៤០នាក់ កាលពីថ្ងៃទី១៤ខែកុម្ភៈ ប៉ុន្តែហានិភ័យនៃជម្លោះបានកើនឡើងយ៉ាងខ្លាំងនៅថ្ងៃទី២៧ ខែកុម្ភៈនៅពេលដែលឥណ្ឌាបើកការវាយប្រហារអាកាសទៅលើអ្វីដែលខ្លួននិយាយថាជាមូលដ្ឋានហ្វឹកហាត់របស់ក្រុមសកម្មប្រយុទ្ធ។
នៅថ្ងៃបន្ទាប់ ប្រទេសប៉ាគីស្ថានបានបាញ់ទម្លាក់យន្ដហោះចម្បាំងឥណ្ឌាមួយគ្រឿងហើយចាប់ខ្លួនអ្នកបើកយន្តហោះប៉ុន្តែក្រោយមកបានដោះលែងវិញ។
លោក Mohammad Faisal អ្នកនាំពាក្យការិយាល័យកិច្ចការបរទេសប៉ាគីស្ថានបានប្រាប់ក្រុមអ្នកកាសែតថា “ប្រទេសប៉ាគីស្ថានបានសម្រេចចិត្តថា អ្នកទោសឥណ្ឌាចំនួន៣៦០នាក់ដែលមានអ្នកនេសាទ៣៥៥នាក់និងជនស៊ីវិល៥នាក់នឹងត្រូវបានដោះលែង”។
លោកនិយាយថាអ្នកទោសនឹងត្រូវបានដោះលែងជាបួនដំណាក់កាលចាប់ពីថ្ងៃទី៨ខែមេសា។
ដោយសារតែទំនាក់ទំនងរង្គោះរង្គើររវាងភាគីទាំងពីរ អ្នកទោសដែលបានបញ្ចប់ការជាប់ពន្ធនាគារជាញឹកញាប់គឺត្រូវជាប់ពន្ធនាគាររយៈពេលជាច្រើនខែឬច្រើនឆ្នាំទៀត។
យោងតាមបញ្ជីដែលបានដោះដូរគ្នាដោយភាគីទាំងពីរកាលពីខែមករាបានបង្ហាញថា មានអ្នកទោសប៉ាគីស្ថានចំនួន៣៤៧នាក់នៅក្នុងពន្ធនាគារឥណ្ឌាដែលក្នុងចំណោមនោះមាន២៤៩នាក់ត្រូវបានអ្នកនាំពាក្យពិពណ៌នាថាជាជនស៊ីវិលនិងអ្នកនេសាទ៩៨នាក់។
ដោយឡែក មានអ្នកទោសឥណ្ឌាចំនួន៥៣៧នាក់នៅក្នុងពន្ធនាគារប៉ាគីស្ថានដែលក្នុងនោះមាន៤៨៣នាក់ជាអ្នកនេសាទ៕ REUTERS
Source: Kampuchea Thmey Daily
0 Comments