ភ្នំពេញ ៖ កាលពីថ្ងៃទី០៤ ខែមេសា ឆ្នាំ២០១៩ វេលាម៉ោង១១និង០០នាទី មានបុរសម្នាក់ បានចូលទៅជួលកាំភ្លើងបាញ់ស៊ីបនៅទីលានបាញ់ស៊ីបរបស់លោកឧត្ដមសេនីយ៍ សុខ ខេមរិន្ទ ក្នុងខណ្ឌសែនសុខ ប៉ុន្តែនៅគ្រាប់ចុងក្រោយ ជននោះ បានបង្វែរកាណុងកាំភ្លើងបាញ់ចូលសៀតផ្កាខាងស្ដាំខ្លួនឯងបណ្ដាលឲ្យស្លាប់មួយរំពេច។
ក្រោយកើតហេតុយ៉ាងរន្ធត់ ដែលគេមើលឃើញតាមរយៈវីដេអូឃ្លីបរយៈពេល២៤វិនាទី នៅទីលានបាញ់ស៊ីបនោះ អ្នកគ្រប់គ្រងទីលានបាញ់ស៊ីបព្យាយាមលាក់កំបាំងមិនផ្ដល់ព័ត៌មានឲ្យអាជ្ញាធរមូលដ្ឋានដឹងភ្លាមៗទេ សូម្បីតែអត្តសញ្ញាណរបស់ជនរងគ្រោះ ហើយការធ្វើកោសល្យវិច័យ ក៏ជាសមត្ថកិច្ចក្រសួងមហាផ្ទៃដែរ។ រហូតដល់ថ្ងៃទី០៥មេសា ទើបសកម្មភាព នៃការធ្វើអត្តឃាតនៅក្នុងទីលានបាញ់ស៊ីបនោះ បានបែកធ្លាយនៅលើបណ្ដាញសង្គមហ្វេសប៊ុក និងអំពីអត្តសញ្ញាណ នៃជនរងគ្រោះ។
បើតាមសមត្ថកិច្ចមូលដ្ឋានបានបញ្ជាក់ថា ជនដែលធ្វើអត្តឃាតនោះមាន ឈ្មោះ កែវ សុថារិទ្ធ ភេទប្រុស អាយុ៤១ឆ្នាំ មានទីលំនៅភូមិដំណាក់ធំ១ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ គាត់មានជំងឺប្រចាំកាយ មិនអាចព្យាបាលបាន ហើយទំនងជាផ្ដើមពីបញ្ហានេះ ទើបគាត់សម្រេចចិត្តធ្វើអត្តឃាត។
ប្រភពបានបន្តថា កាលពីព្រឹកថ្ងៃកើតហេតុ នាថ្ងៃទី៤ ខែមេសា ឆ្នាំ២០១៩ ជនរងគ្រោះបានទៅជួលកាំភ្លើងបាញ់ស៊ីបនៅទីលាន៩១១ ម្តងហើយ ពេលបាញ់រួចក៏ចេញមកវិញ។ លុះនៅវេលាម៉ោងខាងលើ គាត់ក៏បានចូលទៅជួលកាំភ្លើងខ្លី ម៉ាកឡុក បាញ់នៅក្លឹបបាញ់កាំភ្លើង ទីលានរបស់ លោក សុខ ខេមរិន្ទ នៅក្បែរអង្គភាពតម្រួតបទបញ្ជា នៃអគ្គស្នងការដ្ឋាននគរបាលជាតិ ស្ថិតនៅសង្កាត់ត្រពាំងក្រសាំង ខណ្ឌពោធិ៍សែនជ័យវិញម្ដង ដោយបាញ់ចំនួន៥គ្រាប់ បាញ់លើកទី១ បាញ់អស់៣គ្រាប់ សំដៅផ្ទាំងស៊ីប បាញ់លើកទី២ តម្រង់ផ្ទាំងស៊ីប១គ្រាប់ ហើយ១គ្រាប់ចុងក្រោយ ស្រាប់តែគាត់លើកកាំភ្លើងបង្វែរកាណុងមកបាញ់សៀតផ្កាខាងស្ដាំខ្លួនឯងស្លាប់យ៉ាងរន្ធត់តែម្តង។
តាមរយៈវីដេអូឃ្លីបនៃការធ្វើអត្តឃាត គេកត់សម្គាល់ឃើញថា គ្រូបង្វឹកនៅទីលានបាញ់ស៊ីបកន្លែងកើតហេតុមិនមែន មិនប្រុងប្រយ័ត្នទេ ប៉ុន្តែជនរងគ្រោះមានចេតនាសម្លាប់ខ្លួនឯងឲ្យខាងតែបាន ទើបគ្រូបង្វឹកមិនអាចអន្តរាគមន៍បានទាន់ពេលវេលា។
នេះជាមេរៀនមួយសម្រាប់សមត្ថកិច្ចប្រចាំការនៅទីលានបាញ់ស៊ីប ដែលគប្បីពិនិត្យអំពីស្មារតី ទឹកមុខ និងចេតនារបស់អតិថិជនដែលចូលមករកសេវាបាញ់ស៊ីបនេះ៕
Source: Kampuchea Thmey Daily
0 Comments