ភ្នំពេញ ៖ អគាររដ្ឋបាលខណ្ឌទួលគោក(សាលាខណ្ឌទួលគោក) ត្រូវបានមន្ត្រីដែលបម្រើក្នុងអគារនេះ រើអីវ៉ាន់ចេញ និងផ្លាស់ប្ដូរមកកាន់ទីតាំងថ្មីហើយ ក្រោយពីអគារចាស់ ត្រូវបានគេលក់កាលពី៧ឆ្នាំមុន។
អគាររដ្ឋបាលខណ្ឌទួលគោកថ្មី មានទីតាំង ស្ថិតនៅតាមបណ្តោយផ្លូវ៥៩៦ សង្កាត់បឹងកក់ទី២ ខណ្ឌទួលគោក (ខាងលិចវិទ្យាល័យឥន្ទ្រទេវី)។
អគាររដ្ឋបាលខណ្ឌទួលគោកថ្មីនេះ មានកម្ពស់៧ជាន់ បំពាក់ដោយជណ្ដើរយន្ត បង្កលក្ខណៈងាយស្រួលដល់មន្ត្រីរាជការ ក្នុងការបំពេញការងារ។ ក្នុងនោះសម្រាប់ការិយាល័យច្រកចេញចូលតែមួយខណ្ឌ ស្ថិតនៅជាន់ក្រោម នៃអគាររដ្ឋបាលនេះផងដែរ ដើម្បីបម្រើសេវាជូនប្រជាពលរដ្ឋបានល្អប្រសើរ។
មន្ត្រីរដ្ឋបាលខណ្ឌទួលគោកបានឲ្យដឹងថា អគាររដ្ឋបាលខណ្ឌទួលគោកចាស់ មានទីតាំងស្ថិតនៅតាមបណ្ដោយផ្លូវទេពផន ក្នុងសង្កាត់ផ្សារដេប៉ូទី១ ត្រូវបានគេសម្រេចលក់ដោយបានចេញ ស ជ ណ នៅឆ្នាំ២០១២ ប៉ុន្តែដោយការរកទីតាំងអគាររដ្ឋបាលថ្មីមិនទាន់បាននៅឡើយ ក៏នៅបន្តធ្វើការងារនៅក្នុងអគារចាស់នេះរហូតមក លុះមកដល់ចុងខែមេសានេះ ពោលគឺក្រោយពីអគារថ្មីត្រូវបានសាងសង់រួចរាល់ ទើបមន្ត្រីសាលាខណ្ឌទួលគោកធ្វើការរុះរើសម្ភារៈបម្រើការងារមកដាក់នៅទីតាំងថ្មី នេះតែម្ដង។
អគាររដ្ឋបាលខណ្ឌទួលគោកថ្មី ដែលត្រូវបានរឿងមកបំពេញការងារនេះ អគារកម្ពស់រហូតទៅដល់ ៧ជាន់ និងបំពាក់ទៅដោយជណ្តើរយន្តទំនើប ប៉ុន្តែអ្វីដែលធ្វើឲ្យមន្ត្រីមួយចំនួនមានការមានការទើសចិត្តនោះ គឺដោយសារទីតាំងថ្មីនេះមាន ទីតាំង តូចចង្អៀត ពិបាកចូលចត និងពិបាកដាក់សម្ភារៈផ្សេងៗទៀត។
គួរបញ្ជាក់ផងដែរថា នៅក្នុងអាណាចក្រខណ្ឌទួលគោកមាន អគាររដ្ឋបាលជាច្រើនកន្លែងត្រូវបានគេលក់ធ្វើការដោះដូរ ក្នុងនោះមានទាំង អគាររដ្ឋបាលខណ្ឌទួលគោក អធិការដ្ឋាននគរបាលខណ្ឌទួលគោក សាលាសង្កាត់បឹងកក់ទី១ សាលាសង្កាត់បឹងកក់ទី២ និងប៉ុស្តិ៍ប៉ូលីសរដ្ឋបាលផ្សារដេប៉ូទី២ជាដើម ហើយទីតាំងដែលគេលក់នោះសុទ្ធតែទីតាំងនៅលើមហាវិថីធំៗ មានតំលៃថ្លៃៗ ដែលអាចបើកអាជីវកម្មរកស៊ី ជាខ្នាតធំៗបាន៕
Source: Kampuchea Thmey Daily
0 Comments