បាត់ដំបង ៖ អ្នកបើកបរត្រាក់ទ័រម្នាក់ ដែលជាអ្នកស៊ីឈ្នួលភ្ជួរដីចម្ការឲ្យគេ បានរងរបួសយ៉ាងធ្ងន់ធ្ងរ ដោយបានបញ្ជូនទៅសង្គ្រោះបន្ទាន់នៅឯមន្ទីរពេទ្យផងដែរ ខណៈដែលជនរងគ្រោះកំពុងភ្ជួរដីចម្ការស្រាប់តែជាន់ទៅលើគ្រាប់មីនតោន បណ្តាលឲ្យផ្ទុះឡើងតែម្តង។
សំឡេងផ្ទុះគ្រាប់ និងធ្វើឲ្យមានការភ្ញាក់ផ្អើលនេះបានកើតឡើងនៅវេលាម៉ោង៥និង៥០នាទីល្ងាច ថ្ងៃទី១១ ខែមេសា ឆ្នាំ២០១៩ ចំណុចស្រង់តូចស្ថិតនៅភូមិប៊ួរុន ឃុំត្រែង ស្រុករតនៈមណ្ឌល ខេត្តបាត់ដំបង ដែលធ្វើឲ្យសមត្ថកិច្ចចុះត្រួតពិនិត្យភ្លាមៗទៅលើទីតាំងនោះដែរ។
នៅក្នុងហេតុការណ៍នោះគេសង្កេតឃើញ ជនរងគ្រោះដែលជាអ្នកបើកបរត្រាក់ទ័រ ឈ្មោះ ម៉ុន យី ភេទប្រុស អាយុ២១ឆ្នាំ ទីលំនៅបច្ចុប្បន្ន ស្នាក់នៅភូមិអូរត្រែង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន មានមុខរបរស៊ីឈ្នួលបើកត្រាក់ទ័រ ភ្ជួរដីចម្ការឲ្យ ឈ្មោះ ថោង សារ៉ាត់ ភេទប្រុស អាយុ៥០ឆ្នាំ ជាប្រជាពលរដ្ឋស្នាក់នៅភូមិប៊ួរុន បណ្តាលឲ្យជាន់មីនតោនផ្ទុះរបួសធ្ងន់។
ដោយឡែក ត្រាក់ទ័រ បានជាន់ទៅលើគ្រាប់មីនតោននៅផ្នែកកង់ខាងមុខ បណ្ដាលឲ្យផុងទៅក្នុងរណ្ដៅដី ដោយសារតែកម្លាំង នៃការផ្ទុះ ឯជនរងគ្រោះ ក៏ត្រូវបានប្រជាពលរដ្ឋចាត់បញ្ជូនភ្លាមៗទៅកាន់មន្ទីរពេទ្យ ដោយសារតែសភាពមុខរបួសវាធ្ងន់ធ្ងរខ្លាំងពេក។
បើតាមកម្លាំងជំនាញបានសន្និដ្ឋានថា យុទ្ធភណ្ឌមិនទាន់ផ្ទុះនេះ អាចជាប្រភេទគ្រាប់មីនតោន ដែលនៅសេសសល់ពីសម័យសង្គ្រាម ហើយមិនមាននរណាប៉ះពាល់វា ដោយពេលនេះគេសង្ស័យថា ក្រោយភ្លៀងអាចធ្វើឲ្យដីចម្ការមានសភាពជ្រាយទើបអាចកិនដល់វា៕
Source: Kampuchea Thmey Daily
0 Comments