សៀមរាប ៖ កម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្តសៀមរាប បានធ្វើការឃាត់ខ្លួនស្ត្រីម្នាក់ និងម្នាក់ទៀតគេចខ្លួន ករណី លូកហោប៉ៅភ្ញៀវទេសចរ ជាតិនិងអន្តរជាតិនាយប់ថ្ងៃចូលឆ្នាំថ្ងៃទី២ គឺថ្ងៃទី១៥ ខែមេសា ឆ្នាំ២០១៩ នៅតំបន់ផប់ស្ត្រីត ក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប។
លោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋានខេត្តសៀមរាប បានឲ្យដឹងថា ដោយទទួលបញ្ជាពីលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប និងលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលព្រហ្មទណ្ឌនៃស្នងការដ្ឋានខេត្តសៀមរាប ខាងលោកបានធ្វើការឃាត់ខ្លួន ជនសង្ស័យម្នាក់មានឈ្មោះ ស្រី សំនៀង ភេទស្រី អាយុ៣០ឆ្នាំ ពីករណីអំពើលួច (លូកហោប៉ៅ)។
លោកបន្តថា អង្គហេតុ នៅក្នុងថ្ងៃកើតហេតុខាងលើ ជនសង្ស័យមានឈ្មោះ ស្រី សំនៀង ភេទ ស្រី អាយុ៣០ឆ្នាំ និងបក្ខពួកម្នាក់ទៀតមាន ឈ្មោះ នួន ស្រីនីត ភេទស្រី អាយុ១៧ឆ្នាំ មានទីលំនៅភូមិ២៣ សង្កាត់បឹងកក់ ខណ្ឌទួលគោក រាជធានីភ្នំពេញ (គេចខ្លួន) បាននាំគ្នាធ្វើសកម្មភាព លូកកាបូប របស់គេ នៅបរិវេណផាប់ស្ត្រីត វេលាម៉ោង ២៣និង៣០នាទី ហើយខណៈពេលជនសង្ស័យ ឈ្មោះ ស្រី សំនៀង កំពុងធ្វើសកម្មភាពលូកយកសម្ភារៈរបស់គេនោះ សមត្ថកិច្ចបានដើរ ល្បាតឃើញទាន់ ក៏ចាប់បានភ្លាមៗ ចំណែកជនសង្ស័យឈ្មោះ នួន ស្រីនីត បានគេចខ្លួនបាត់។
លោកបន្តថា តាមចម្លើយសារភាព ជនសង្ស័យរូបនេះ បានធ្វើសកម្មភាពលួចបានទូរស័ព្ទ១គ្រឿង ម៉ាក Oppo កាលពីអំឡុងថ្ងៃទី០៩ ខែមេសា ឆ្នាំ២០១៩ នៅភ្នំពេញ (ដែលមានអត្តសញ្ញាណប័ណ្ណជនរងគ្រោះក្នុងទូរស័ព្ទ)។ ទិសដៅបន្ត កំពុងស្វែងរកបក្ខពួកបន្ត។
បច្ចុប្បន្នកម្លាំងនគរបាលជំនាញកំពុងកសាងសំណុំរឿងដើម្បីបញ្ជូនខ្លួនជនសង្ស័យដើម្បីបញ្ជូនទៅតុលាការចាត់ការបន្តតាមផ្លូវច្បាប់៕
Source: Kampuchea Thmey Daily
0 Comments